Read Sangtam Naga HABAKUK 2 Bible Online

HABAKUK 2 - Sangtam Naga bible

HABAKUK 2

¹Ihnü roshengvi la küdunung ko ABÜDONGBAnü I khyang tu yosohnung ko I longmüsü nengdang tu lalingnang Ihnü dhengnung.

²ABÜDONGBAnü I te hi lalingcho: “Khüdupi dhengdenü khichehnungthsa, Ihnü nü te tu mishacho lungtpah la tsitsa thrahng.

³Thrahyohng, tunüo hi tikehnung ade becho müchie. Ta bekhyah zah role, ko Ihnü nü te tu nguro hütsü tikehnung. Hi khainü rorüh müjang, ta hütsü ying; hütsü mümünupü yuje tikehnung.

⁴Ko yusi tsü hi: ‘Münyirü akang mülinung, ta amüsarü yudsinü arüh akang linung.’ ”

⁵Kuthsi tsü akihyochürü. Müxümüngurü tsü amüthseh ko jangmüzi asülih roh-i khodesü longmünyüpre. Hütsünü arühnü yucho adrong arühbürü nengdang kohchehre.

⁶Amükohrünü akohrü müthsamünyüre. Arühnü yore, “Bürü yo nühnü khyüre, ta nüh ahohah! Khüdoi nyahli thsite teerü te khingnü ching nüh alirü kangnung?”

⁷Ta nühnü mümüdhepü, nühnü kohchehrü te nüh thsite teerü kangnung ko ajehyoh khing chingnung. Arorühnü ro nüh dhrümchinung. Arühnü nüh rohchonung.

⁸Nühnü yucho adrong nyitsarü chahnü kengchoko, ta nühnü müpsehcho ngang ko limih nyitsarü ko yangditi nyüm ashüh khatohcho ngang akang lirünü nü chahnü kengchonung.

⁹Nüh ahohah! Akengchochonü nü kukhi alirü kangcho ko nüpu kukhi dhsürü lanü khümchonung nühnü müküpcho.

¹⁰Ta nü lümchungnü nü kukhi khyang ashah hirocho; yucho adrong changjüchonü nüpu chah du athsangnyang hirocho.

¹¹Lung tbünü mii nüh nyüm züdere ko zikunü lalingre.

¹²Nüh Ahohah! Nühnü yangdi khüdu amütsa nguchinü thricho ko mapsehchonü hütsü külüpcho.

¹³Nühnü kohchehcho yuchoti adeng la kyahko, ko arühnü thsacho apüm mitru kangko. Akohbong ABÜDONGBAnü hi nguchiko.

¹⁴Ta kihjü kihdi jengmülümcho roh-i ABÜDONGBA ahechi lümlongnü alimih jeng linung.

¹⁵Nüh Ahohah! Nü zichürode nü kurümrüti mükhimüngu ashah khyüsohcho; arüh müchacho roh-i nühnü arüh khüluchisohcho.

¹⁶Hütsü mülih nühsü adhichi mülih ashah khyünung. Nüpunü yongnung ko khüluchinung. ABÜDONGBAnü nüpu akhingchi shing nü khyang yongsohnung ko nü adhichi tsü ashah kangnung.

¹⁷Nühnü Lebanon mürong kyükhangko; nüh ade kyüpehnung. Nühnü hütsüla kanglungrüti changsohcho; ade kanglungrünü nüh drümüyangsohnung. Nühnü mapsehcho ngang ko alimih nyitsarü ko yangditi nyümcho ngang hi tikehnung.

¹⁸Kyothri tu thsütahro? Hi nyitsarünü külüpcho du ko hinü nü te arahkheh du yore. Yu müchoba tsingrang khüdunü, akülüprünü abi chah longlangsohnung atsa tu nguchiro?

¹⁹Nüh ahohah! Nühnü singchang khüdu te “Jesung!” ko lung te “Yamüsung” pü yore. Kyothri khüdunü nü te lango mishajünung do? Hon ko taripinü müshüticho thsanung kohle, ta abi chah akang müle.

²⁰ABÜDONGBA Abi amüsa Amübükuh la lile! Alih la lirü atümungnü abi bete sahmüthsa lieng.