Read Sangtam Naga ZEFANIA 1 Bible Online

ZEFANIA 1 - Sangtam Naga bible

ZEFANIA 1

¹Amon tsurü Josia Juda la yangthsade, yusi hi ABÜDONGBAnü Zefania khyang jücho. (Zefania tsü Amaria, Gedalia ko Kushi khu Hezekia Yangthsaba chahnü trahchocho.)

²ABÜDONGBAnü yocho, “Limih la liba amüi tsurü, kanglungrü ko nguh apüm Ihnü changjünung.

³Ihnü amütsarü khülusohnung. Ihnü amüi tsurü atümung changjünung, ko süsü münyingnung. Ih, ABÜDONGBAnü choko.

⁴“Jerusalem ko Juda la liba nyitsarü Ihnü khingchinung. Hütsüla Baal tsingrang mübürü amütrüh mii Ihnü changjünung, ko kyothri mübürü bebürü mii arühnü mülümchehnung.

⁵Kuhmung chah küdupü nyü, chonu ko chenghiti mübürü Ihnü changjünung. Ih mübürü ko I yocho nyinung yuchümrü, ta adesü Molek tsingrang nengla mii yuchümre, arühsü Ihnü changjünung.

⁶Sürünü ximüla I khanglang müroro, sürünü I yang müroro mahkhang arüh nüsohnung mütsingdhengro, arüh Ihnü changjünung.”

⁷ABÜDONGBA nyümong tsü amünyeh lile; hütsüeko ajingte longlüm lieng. ABÜDONGBAnü amüyurü kangmübü roh-i kyüsehnung rungnümle.

⁸ABÜDONGBAnü yore, “Hütsü nyümong adirüti Yangthsaba tsurüti, ko yangpirü liyah bichirü atümung Ihnü khingchinung.

⁹Müyudsirü kyo mübürü ko arüh abüdongrü kuh jengsohnung sürünü mapsehnü kengchoro, arüh atümung khingchinung.”

¹⁰ABÜDONGBAnü yore, “Hütsü nyümong Jerusalem la Nguh Tbükhüm te trakhitrayo yuva nührünü yuchinung. Yangdi asi lahpi me tracho ko akhang chah yuva arangcheh khong nührünü yuchinung.

¹¹Nührü yangdi jinglang lirünü hi yuchide meshüng ko traang, tunüo shithsaphülerü atümung sünung.

¹²“Hütsüde Ihnü dsi bipü Jerusalem yangchinung. Abürü chah longlang lirü sürünü ‘ABÜDONGBA nü atsa amütsa tusü münguchire pü choro Ihnü arüh khingchinung.’

¹³Arüh kuh müzüpjünung ko arüh kuh thsangnyangjünung. Arühnü thsaba kuhla arüh mülinung mahkhang arühnü khyümcho shükusih arühnü müyongnung.”

¹⁴ABÜDONGBA nyümong arangcheh tsü amünyeh, khütang amünyeh ko zah role. Hütsü akha nyümong tsü, athrungrünü mii lümdhama tranung!

¹⁵Hütsü rihlong chüro nyümong, achongcha ko roto nyümong, athsangnyang ko achangba nyümong, ama ko amarürah nyümong, anyah ko nyükhinü phati nyümong.

¹⁶Khode rühti yuvanü jeng nyümong ko yangdi tbükhüm ko roshengvi mahba athrungrü chita yuva nyümong khüdu linung.

¹⁷ABÜDONGBAnü yore, “Amüi tsurü chah Ihnü hitari achangba hirojünung ko nyitsarü atümungnü nahtohrü kyo hümchinung. Arühnü Ih nyüm amünyi shitpahko, ko ade arüh shüh kih roh-i tungnung, ko arüh asü me tsü alih la sühtpah jonung.”

¹⁸ABÜDONGBAnü Abi rihlong chüro nyümong arüh hon ko taripinü mii mükhümchonung. Limih apüm Abi zii michangnü changjünung. Abinü alih la lirü atümung chah achangka, dhrongyeng, achangka hirojünung.