Read Sangtam Naga ZEFANIA 3 Bible Online

ZEFANIA 3 - Sangtam Naga bible

ZEFANIA 3

¹Jerusalem, achangba, abürü nyitsarü nyüpmüsehba yangdi, ahohah!

²Abinü ABÜDONGBA te yocho münyirü ko thsingyucho mükhyüchore. ABÜDONGBA chah mülonglang mahkhang Abi arüku müching.

³Abi adirüti tsü kangdi kyo rengre; abi yukharü tsü nyangnyü khüu chii arüh mii müpehjüba amünyo rangfü kyole.

⁴Azikehrü tsü longmülangba ko akihyochürü; bebürünü Amüsa tsü münyijüre ko arühbürü tsanung phi Tsingrangba yuzeng khyümüla bichire.

⁵Ta ABÜDONGBA tsü yangdi la lile; Abinü khodesü amüthsalang münguchire. Nyangnyü mükhu müyurü khyang mütiphehpü yuje hirojüre. Ta amümüsarünü mütozah amütsa nguchire ko müshahre.

⁶ABÜDONGBAnü yore, “Ihnü alimih apüm wohpehko; Ihnü arüh yangditi thsangnyangjücho ko arüh tbü ko roshengvi khülusohko. Yangdi tsishoko; yanglong adeng, süsü müle.

⁷Hütsükhang, I müyurünü I jengreng drünung ko I thsingyucho nyinung ko I docho arühnü khodesü münbüchünungepü Ihnü lümcho. Ta tunyah müli amüngu roh-i arühnü amütsa du bichicho.

⁸“ABÜDONGBAnü yocho, “Yieng, Ihnü yuchoti mülangjüba nengdang ying. I rihlong zii arüh khyang müdhesohnung yuchoti ko yangditi nübülungnung Ihnü dhrongchehko. I rihlong michangnü lihküp changjünung.

⁹“Hütsüde Ihnü yuchoti thsamülajünung, ko I chah khu aparü tsingrang te müdangkhidangnangsohnung. Arüh atümungnü I yu nyinung.

¹⁰Ashu la liba Ethiopia la tsipitsiza liba I nyitsarünü I khyang amübü hirojünung.

¹¹Hütsütade, nührü I müyurünü Ih nyümcho nengdang müshahsohnung. Amüthseh ko ahongzi atümung Ihnü khyümüinung ko I Amüsa khang chah nührünü khodesü Ih nyüm müyanung.

¹²Hütsüla alonglüm ko aküna nyitsarü I arüku yangchirü lisohnung.

¹³Amütrüh Israelrü sütesü amütsa münguchinung, arahkheh müchonung, mahkhang kihyochünung mümüküpnung. Arüh süsü müdrüpü müwajo khümcho linung.”

¹⁴Israelrü, akünyangnü züde khi thsaang! Jerusalem! Nü lasih apümnü künyang!

¹⁵ABÜDONGBAnü nü akhingchi changkajüko; Abinü nü rorüh apüm khyükhujüko. ABÜDONGBA Israel Tsingrang nührü te lile; adelü tu adrünung müle.

¹⁶“Zion yangdi, tüdrü! Nü kheh tükyah pü arühnü Jerusalem te yonung nyümong role.

¹⁷ABÜDONGBA Tsingrang nührü te lile; Abi ziinü akoh jüre. ABÜDONGBAnü nü chah künyangnung, ko Abi amüi la nü khyang akang asi jünung.

¹⁸Nyitsarünü thsüti la künyangcho kyo Abinü nü khyanglangnü khi thsanung ko künyangnung.” ABÜDONGBAnü yore, “Ihnü nührü chokehchola ko ashah khyümüijüko.

¹⁹Bekhyah tsü tsehle! Nüh sehchirü Ihnü khingchinung, Jahloh-hilohrü khümchonung ko yangpirü noronung Arüh ashah khyünü adhichi kangsohnung, ko lihküprünü arüh senung.

²⁰Bekhyah tsü tsehle! shupishuza liba müyurü Ihnü noronung; limih la Ihnü nüh anengkhong kangsohnung ko nüh thali müwajünung.” ABÜDONGBAnü choko.