Read Sangtam Naga HAGGAI 1 Bible Online

HAGGAI 1 - Sangtam Naga bible

HAGGAI 1

¹Persia la Darius kang anyüu yangthsade, choo adhüroh-uba akhudi nyümong la, ABÜDONGBAnü azikehrü Haggai khu chotacho. Yusi tsü Shealtil tsurü, Juda la governor Zerubabel ko Jehozadak tsurü Amungthriba Bebüba, Joshua nyüh nengdang licho.

²Akohba ABÜDONGBAnü Haggai te yocho, “Amübükuh thsalinung becho müchiepü hiri nyitsarünü yore.”

³Hütsünü ABÜDONGBAnü azikehrü Haggai khu yusi hi jücho:

⁴“I müyurüti, amübükuhlü thsangnyang yohpüpü nührü khüta müking thsacho kuhla linung?

⁵Nührü chah tu tikehrünang münguo?

⁶Nührünü khütang shure ta azikyah du xare. Nührünü tsure, ta khodesü mi müjengre; nührünü yongre ta khodesü xomüdhrümre! Nührünü müpire, ta mülangchire. Ko shehsherünü ashehcho tsü akhitpeh tping la yohre.

⁷Tunü hi tikehro nührünü mümüdheo?

⁸Azonglang tsü küdung, Sing hirung, ko Amübükuh tsü thsaching; hütsüde Ih künyangnung ko Ih ahechi la ngunung.

⁹“Nührünü khütang longdicho, ta azikyah du xacho. Ko khode hütsü nührünü kuh chii hilungcho, Ihnü mehpehcho. Tuepü Ihnü hütsüta nguchicho? Tunüo Amübükuhlü thsangnyang lipü nührü atümungnü palu kukhi nengdang du müpahre.

¹⁰Hütsünü tsing mürore ko tusü müchürore.

¹¹Limih chah, akhangti chah, luh la, shükusiluh la, olive singsih luh la, ko alihnü chixiba tsahma apüm chah, nyitsarü ko kanglungrü, ko nührünü chisinung müküpba apüm michah Ihnü trüpsehnyü hirojüko.”

¹²Achotsü Zerubabel ko Joshua ko Babylon yangtsi langnü thalirü atümungnü arüh ABÜDONGBA Tsingrang yu nyicho. Arühnü ABÜDONGBA riwürü, azikehrü Haggai dro yocho nyicho.

¹³Hütsüde müyurü te Haggainü ABÜDONGBA yusi tsü yocho. “Ih nührü te linung hütsü Ih anyengchoba.”

¹⁴Amübükuh thsalinung nengdang ABÜDONGBAnü atümung thsümüsucho. Juda la governor Zerubabel; Amungthriba Bebüba Joshua, ko yangtsi langnü thalirü atümung. Arühnü arüh Tsingrang, Akohba ABÜDONGBA amübükuh,

¹⁵Darius Yangthsathsaba kang anyüh, choo dhüroh, nyümong mükyüpü müyüu la Amübükuh thsachinung dikehcho.