Read Sangtam Naga ZEKARIA 1 Bible Online

ZEKARIA 1 - Sangtam Naga bible

ZEKARIA 1

¹Persia la Darius Yangthsapü kang anyüh choo keh-u la, azikehrü Zekaria, Iddo shümtsurü, ko Berekia tsurü yangnü ABÜDONGBAnü hiba yu jücho.

²Akohba ABÜDONGBAnü Zekaria khu müyurü te hita yocho, “Ih ABÜDONGBAnü, nührü jümürü te zichürocho,

³ta Ihnü ade nührü te yore, ‘Ih yang ximülang, ko Ih nüh yang ximülanung.

⁴Nührü jümürü tükyo. Adelü amünyi akang ko amünyi la mülinung papadenü azikehrünü I yusi arüh te yoko. Ta arühnü I yu müsijo münyire mahkhang yocho münyire.

⁵Nührü jümürüti ko hütsüri azikehrüti adelü akang müle.

⁶I dikehrü azikehrüti khu Ihnü nührü jümürü khyang yuzeng ko amüzahnung jücho, ta arühnü hütsü mükhyücho, ko hütsü ngang arüh chongchako. Hütsüpü du Ih Akohbong ABÜDONGBAnü lümcho roh-i, arüh aleng Ihnü arüh khingchichoepü lasih thsamüla Ih müdhecho.’ ”

⁷Darius yangthsapü kang anyüh choo dhüre-kheh-u (Shebat choo), nyümong mükyüpü müyüu la, Tsingrangbanü aromang müngucheh khüdu I khyang jücho.

⁸ABÜDONGBA riwürü khüdu kuri amoh chah püm Ihnü ngucho. Abi khanglang aparü kuriti amoh, amüdri ko myrtle singdong athru yaba ngah khüdu la Ih yalisohcho.

⁹Ihnü abi te tsingcho, “Adirü, hiri kuriti adüzü tuo?” Abinü lalingcho, “Arüh tunang Ihnü nü te ngunung.

¹⁰ABÜDONGBAnü alimih tsü xodhengnung arüh müthehcho.”

¹¹Arühnü ninglang riwürü te yocho: “Ihrünü limih apümlang wüko ko limih apüm alongdi müli ko achangba surola li nguko.”

¹²Hütsüde riwüba tsünü yocho, “Akohbong ABÜDONGBA, Jerusalem ko Juda la yangditi te kang nyühre zichüro rore. Adesü khüdoi nyahli arüh te zichüro linung?”

¹³ABÜDONGBAnü ninglang riwürüti kihcho yocho,

¹⁴ko Akohbong ABÜDONGBAnü tu yocho hütsü sobhonung I te riwüba tsünü yocho: “I Amüsa yangdi Jerusalem nengdang Ihnü dee soh müi lümre,

¹⁵ko naying, yangtsa la künyangta liba yuchoti te Ih khütang wahre. Tunüo Ihnü I nyitsarü te rangcho lide, hiri yuchotinü I nyitsarü amütsauba chongchasohre.

¹⁶Hütsünü yangdi te achomang ngunung Ih thali rocho. I amübü kuh thali khyünung, ko I yangdi külüpchinung.”

¹⁷Adesü riwübanü I te sobhonung yocho: “Abi yangditi thali müwajünung ko adesü Jerusalem tronü yangdi tsü apu yo kanglinungepü, Akohbong ABÜDONGBAnü yore.”

¹⁸Adesü misü jüh müyü müngucheh ngucho.

¹⁹“Hiri shujüh adüzü tuo?” pü I te chotayaba ninglang riwürü te Ihnü tsingdhengcho. Abinü lalingcho, “Arüh tsü Juda, Israel ko Jerusalem nyitsarüti shupishuzasohba alimih tase nengdang yore.”

²⁰Hütsüpü ABÜDONGBAnü ikengrü müyü ahamsing bipü I te ngusohcho.

²¹Ihnü tsingdhengcho, “Hiri tu nguchinung rocho?” Abinü lalingcho, “Juda limih sehchi changjü anyitsarüti shupishuzajüba yuchoti drüsohnung ko changjünung rocho.”