Read Sangtam Naga ZEKARIA 11 Bible Online

ZEKARIA 11 - Sangtam Naga bible

ZEKARIA 11

¹Lebanon, nührü Cedar sing trüp-pehnungthsa nührü kukhang khangthrung!

²Traang ko meshüng, cypres singdong, Cedar khülupehko; hütsüri ahechi singdongti thsangnyangpehko! Traang ko meshüng, Bashan langsing, Mürong amarürah kingthrümpehko!

³Yangthsarütinü longri trare; arüh ahechi khupehko! Kihkhünyingti rengcho nyieng; Jordan jüp arüh rangmükuh thsangnyangpehko.

⁴ABÜDONGBA I Tsingrangnü I te yocho, “Amapsehnung liba santi nyahba nguchi nguching.

⁵Abüdongrünü arüh mapsehre ko arüh mümülangre. Arühnü shuh tsü ire ko yore, ‘ABÜDONGBA Seing! Ihrü alirüe!’ San nyahrü arühbürü nüsü san mümüire.”

⁶(ABÜDONGBAnü yocho, “Ihnü adelü limih la süsü mümüinung. Nyitsarünü atümung arühbürü yangthsarü pohki Ipunü yohpüjünung. Hütsüri yangthsarütinü alimih sehnahnung, ko Ihnü mükhümchonung.”)

⁷San lihrü ko irühnü Ih mülihcho, ko amapsehnung liba san-nyahrü tsü Ih kangcho. Ihnü ja anyüh hirocho: Khüdu te Ihnü “Achomang”, ko khüdu te “Akehta” dsicho. Ko Ihnü santi tsü xükümcho.

⁸I thrünyirü aparü san nyahrü asang te Ihnü mürangchocho, ko choo khüdu lanü arüh apüm iipehcho.

⁹Hütsüpü Ihnü atii te tsü yocho. “Adelü Ih nührü nyahrü müthsanung. Sürü asünung liro arüh süsohng. Sürü athsangnyangnung liro, thsangnyangsohng. Anyingcho tsü arüh khüdunü khüdu changsohcho.”

¹⁰Hütsüpü Ihnü “achomang” ja tsü hirocho ko ABÜDONGBAnü yucho atümung te külüpba azengtacho tsü thsangnyangnung nengdang hütsü khyahsahcho.

¹¹Hütsüta hütsü nyümong azengtacho tsü thsangnyangcho. San lihrü ko airünü Ih dheng yacho, Ihnü nguchicho khu ABÜDONGBAnü chotachoepü arühnü müdhecho.

¹²Ihnü arüh te yocho, “Nührünü lümkhang, I nyükheh ngang jüng. Ta mülümkhang, tüjü.” Achotsü arühnü I nyükheh ngang taripi sangre jücho.

¹³ABÜDONGBAnü I te yocho, “Hütsü amübükuh thsibong la yohpüng.” Achotsü arühnü khüi amüi I khyang jücho, hütsü taripi sangre tsü khyo amübü thsibong la yohjücho.

¹⁴Hütsü “Akehta” dsiba anyüuba ja tsü khyo Ihnü khyahsahcho ko Juda e Israel nyüh akehta thsangnyangcho.

¹⁵Adesü ABÜDONGBAnü I te yocho, “Adesü san nyahba nguchi nguching, ade hilü amii müle.

¹⁶Ihnü I san nyahnung san nyahrü khüdu yohpücho, ta santi drüsoh liba abinü müxüküm, achahcho müyangchi; lerohpeh liba mükyangjü, ko nying liba mükang. Hütsü mülih, abinü anyünyeh-uba shuh tsure ko arüh müzi mürahnahjüre.

¹⁷Hütsü amüdekheng san-nyahba tsü ahohah! Abinü abi santi thrüchahchüpehko. Chitanü abi tase changjünung. Apükyang kungkehpenung, ko anahtse tsalang tohpehnung.”