Read Sangtam Naga ZEKARIA 12 Bible Online

ZEKARIA 12 - Sangtam Naga bible

ZEKARIA 12

¹ABÜDONGBA chahnü Israel nengdang yusi hi lile. ABÜDONGBA sünü ning kimüyacho, alimih thricho, ko nyitsarü khyang akang jücho, Abinü yore,

²“Jerusalem tsü Ihnü yongkha shing khüdu roh-i kangjünung; abi mükang yuchotinü yongnung ko amücharü kyo khüluchinung. Ko arühnü Jerusalem mahde Juda la yangditisü mahnung.

³Ta khode hütsü bekhyah chihnang, Ihnü Jerusalem tsü lung amüling khüdu kyo kangsohnung, ko khüiba yuchonü hütsü dhimüsunung müküpnang lerohpehnung. Limih yucho apümnü abükyü mahnung tsungphung khüdu kangnung.

⁴Hütsüde arüh kuri chah pümrüti abinü nehsohnung ko kuri chah pümrüti mükyangsohnung. Ihnü Juda nyitsarüti michah khengyengnung, ta Ihnü arüh rorüh kuriti nahtohsohnung.

⁵Hütsüde Juda tsutpunü arühbürü te yonung, ‘Akohbong ABÜDONGBAnü apu nyitsarü Jerusalem la lirüti khyang suhre jüko.’

⁶“Hütsütade Ihnü Juda tsutpu tsü rangmüla michang ko luh anyicho la arühnü mükangmüshü yuchoti changjünung. Jerusalemrülü palu yangdi la khümcho linung.

⁷“David tsutpu ko Jerusalemrü adhichi ngunung tenü Judarünü ngunung adhichi adiu thsasohnung. Ih, ABÜDONGBAnü, Juda athrungrüti khyang akhu akoh jünung.

⁸Hütsüde ABÜDONGBAnü Jerusalem la lirü khümnung, ko arüh yola suh müzeh-uba miinü David roh-i re azeh kangsohnung. David tsutpunü riwürü, Tsingrangba apu kyo arüh nünung.

⁹Hütsütade, Jerusalem mahnyürü yucho apüm Ihnü changjünung.

¹⁰“David tsutpu ko Jerusalem la aparüti Ihnü achomang anbü ko dangkhidangnang anbünü jengjünung. Arühnü thraseh süsohba chah arühnü dhengnung, ko müthsümseh liba tsuzarü khüdu nengdang tracho roh-i arühnü abi metranung. Aukhuba sücho roh-i arühnü süto metranung.

¹¹Hütsü bekhyah Jerusalem la metraba tsü Megido ngah la Hadad Rimon me tracho roh-i linung.

¹²Limih la palu kukhi nengdang kukhi müipi abürü jangjang metranung: David chahnü trahchocho kukhi, Nathan chahnü trahchocho kukhi, Levi chahnü trahchocho kukhi, Shimei chahnü trahchocho kukhi, ko aparü kukhi apüm. Kukhi müipi abürü jangjang me tranung, ko kukhi müipi adhrerü khingkurü tenü za metranung.