Read Sangtam Naga ZEKARIA 13 Bible Online

ZEKARIA 13 - Sangtam Naga bible

ZEKARIA 13

¹“Akohbong ABÜDONGBAnü yore, “Hütsü bekhyah chihde, David tsutpu ko Jerusalem nyitsarüti münyi ko kyothri mübüba lanü müsachehjünung, Ihnü yongna khüdu khangthrujünung.

²Hütsüde limih lanü kyothri mübüba nengti Ihnü khyümüinung, ko sünüsü arüh adelü mülümchehnung. Azikehrüepü lümba apüm Ihnü khyümüipehjünung ko kyothri mübünyüba khyümüipehjünung.

³Hütsüpü khürü mütozah choyohnyükhang, au ko atpa khungnü abi süsohnung yonung, tunüo abinü ABÜDONGBA yu chorerü, ta arahkheh-uthring chore. Khode abinü choyohnang, au ko atpa khungnü thrasehnung.

⁴Hütsü bekhyah chii rode, azikehrü sünüsü abi müngucheh nengdang mümüthsehnung, mahkhang nyitsarü kihyochünungthsa azikehrü jengki mükhyünung.

⁵Hütsü mülih abinü yonung, ‘Ih azikehrü khüdu mah. Ih luthsarü khüdue. I akang ayung luthsare.’

⁶Ko khürünü abi te ‘Nü drengkhu chah aihati tsü tuo pü tsingdhengkhang?’ abinü lalingnung, ‘Shangrü kuh lanü thsakehchoe.’ ”

⁷Akohbong ABÜDONGBAnü yore, “Jesung, nohsheng, ko I nengdang nguchiba San-nyahba tsü being! Abi kyüsehng, ko santi tsü tsipitsizanung.

⁸Ihnü limih apümlang I nyitsarüti benung ko nyitsarü nohlüm asang la anyüh sünung.

⁹Ko nying lirü nohlüm asanguba tsü michangnü taripi mülucho roh-i Ihnü arüh müsachehjünung. Hon roh-i Ihnü arüh müchehdhengnung. Hütsüde arühnü I te kihchinung, ko Ihnü arüh te lalingnung. Arüh I nyitsarüepü Ihnü arüh te yonung, ko Ih tsü arüh Tsingrangepü arühnü nyengchonung.”