Read Sangtam Naga ZEKARIA 14 Bible Online

ZEKARIA 14 - Sangtam Naga bible

ZEKARIA 14

¹ABÜDONGBA tsü yukha chah pümnung becho chihle. Hütsüpü Jerusalem kengchonung, ko akengchocho tsü nührü nahtse tenü changtanung.

²ABÜDONGBAnü Jerusalem nyüm mongchiinung yuchoti apüm nübülungnung. Yangdi tsü khyünung, kuh tsü zühnung, ko khingkurüti khing thsangnyangnung. Nyitsarünü changsho rang tsinung, ta anyingcholü yangdi lanü mühitsinung.

³Hütsüpü ABÜDONGBA shemüsunung, ko atsicho la Abinü khatacho roh-i, Abinü hiri yuchoti nyüm mongchiinung.

⁴Hütsüde Abinü Jerusalem nyüchüro lahpi olive zong chah yanung. Hütsüde olive zong anyüh kang nyüchüro lanü nyüzüdu chii tsohrüpnung. Changsho kihku lahpi ko changsho kihjing lahpi khyümüinung.

⁵Hiba zong anyüh kang chang liba ngah khu nührü tsichehnung. Juda Yangthsaba Uzziah chichah alihyo zingde nührü tpurü roh-i nührü tsinung. ABÜDONGBA I Tsingrang Abi yola ninglang riwürü Abinü nüpü ronung.

⁶Hütsü bekhyah chihde, arüsahkünang mahkhang müdhrang müjüronung mahkhang amarürah mülinung.

⁷Yürüp la mii lede tsingse du linung. Hi tikehnung ABÜDONGBAnü du müdhele.

⁸Hütsü nyümong rode, Jerusalem lanü kih amüseng changsho Asü Kihdi ko changsho Mediteranean lang pohnung. Hi kang ayung poh du pohnung, tsingkang müyü ayung.

⁹Hütsüde limih apüm michah ABÜDONGBA tsü yangthsanung. Nyitsarü müipi Tsingrangba apu nengla Abi mübünung.

¹⁰Kihkulang Geba lanü kihjinglang Rimon chii mükyah apüm angah kangsohnung. Mükang liba limih lanü Jerusalem dhikehnung; Yangdi tsü Benjamin tbükhüm lanü papade tbükhüm liba Comer tbükhüm chii, ko Hananel roshengvi lanü Yangthsaba cikih nyehji chii.

¹¹Hütsüla adelü adrünung mülipü nyitsarüti tbachi linung.

¹²Jerusalem la rothsarü yucho apüm michah ABÜDONGBAnü adrünung adhsa hirojünung. Arüh akang linü arüh shutsa sühnah tsinung; arüh nahtse ko amüle sühnah tsinung.

¹³Hütsüde ABÜDONGBAnü nyitsarü müipi abürü müshümba rangnung ko mapsehnungthsa Tsingrangbanü yüyümingming ko drüsohnung.

¹⁴Judarünü Jerusalem khüm chitanung. Arühnü yuchoti kuthsi, hon, taripi ko jengki khütang zühnung.

¹⁵Arorüh müdongji la kuri, Gaduza, ut ko Gadu, ko kanglungrü apüm michah adrünung adhsa-ara küdusohnung.

¹⁶Jerusalem mahrü yuchoti apüm la akang lirütinü kang mütoh Akohbong ABÜDONGBA tsü Yangthsaba apu mübünung ko Mütpahvi thsüti mungnung hütsüla wünung.

¹⁷Yucho khürünü Akohbong ABÜDONGBA tsü Yangthsabaepü mümübükhang, arüh lih la tsing mürosohnung.

¹⁸Ijiprünü mütpahvi Thsüti mümungkhang, ABÜDONGBAnü Abi mümübürü yucho michah müthehnung thsaranü arüh xüpnung.

¹⁹Hiba akhingchi hi Ijiprü ko Mütpahvi Thsüti mümungba yuchoti chahsü küdunung.

²⁰Hiri nyümong la kuri chah shuküp lanü “ABÜDONGBA khyang khakhuchüjücho” pü thrahkeh linung. Amübükuh la chongkya füh tsü bholu chah liba roh-i du Amüsa linung.

²¹Jerusalem ko Juda apüm la chongkya füh tsü Akohbong ABÜDONGBA mübüba la bichinung pathsa yohpünung. Kangmübü jürütinü amübü jücho shuh chongnung hütsüri bichinung. Hütsü bekhyah rode, Akohbong ABÜDONGBA Amübükuh la shithsabhülehrü mülinung.