Read Sangtam Naga ZEKARIA 4 Bible Online

ZEKARIA 4 - Sangtam Naga bible

ZEKARIA 4

¹I te chota yaba ninglang riwüba tsü thali rocho ko Ih yüpseh licho kyo khamüsucho.

²Abinü yocho, “Nühnü tu nguro?” Ihnü lalingcho, “Hon-nü külüpcho dsimüdongsing khüdu.” “Akuchah tsü tuji yohnung tbhüza khüdu kehcho. Dsimüdongsing chah tsü dsi dhünyeh ko hütsü müipi la pita zehcho.

³Dsimüdongsing müshüm olive singdong anyüh khüulang khüdu khüulang khüdu licho.”

⁴Achotsü Ihnü riwüba te tsingcho, “Adirü, hiri hi tu adüzüo?”

⁵Abinü I te tsingdhengcho, “Nühnü mümüdherü do?” Ihnü lalingcho, “Adirü, Ihnü mümüdhe.” (Arü 10b—14, Yukheh chungkehtasohnung hirocho lile.)

⁶ABÜDONGBA chahnü yu hi Zerubabel te yonung ninglang riwürünü I te yocho: “Athrungrü tasenü mah, mübü tasenü mah, ta I nbü khu kohsohnung.

⁷Nü bete azong toh-i athsungkyang linye changpehnung. Nühnü amübükuh tsü thsachinung, ko nühnü lung achangkathsa müdongde, ‘Tsarale, Tsarale!’ ” pü müyurünü züdenung.

⁸ABÜDONGBA chahnü apa yusi khüdu Ih yang rocho.

⁹Abinü yocho, “Zerubabelnü amübü kuphi tsü dikehko, ko abinü thsakanung. Hi tikehde, ABÜDONGBAnü Ih arüh yang müthehchoepü arühnü müdhenung.

¹⁰Azikehba tsü khairachonü arüh mükünyangcho. Ta Zerubabelnü münyehli amübükuh thsacho arühnü ngunung ko arüh künyangnung.” Ninglang riwürünü I te yocho, “Dsi dhünyeh tsü limih apüm nguba ABÜDONGBA nahtse dhünyeh lile.”

¹¹Hütsüpü Ihnü abi te tsingdhengcho, “Dsimüdongsing anyüdinglang olive singdong anyüh adüzü tuo?

¹²Ko olive tuji tungkehba hon müsü anyüh müshüm olive jengza anyüh adüzü tuo?”

¹³Abinü I te tsingcho, “Nühnü mümüdherü do?” Ihnü lalingcho, “Adirü, Ihnü mümüdhe.”

¹⁴Hütsüpü abinü yocho, “Hiri nyitsarü anyüh hi limih apüm ABÜDONGBA Tsingrangnü Abi dikehnung müyühjo throchehcho lile.”