Read Sangtam Naga ZEKARIA 6 Bible Online

ZEKARIA 6 - Sangtam Naga bible

ZEKARIA 6

¹Ihnü müngucheh apa khüdu ngucho. Hiba bekhyah imünyeng zong anyüh kah lanü kuri kari müyü chürochi Ihnü ngucho.

²Akhudiba kuri kari tsü kuri amohti, anyüuba tsü kuri anyahtinü,

³asanguba tsü kuri athrutinü ko müyüuba tsü kuri müdrimütrahtinü tphahcho.

⁴Hütsüde Ihnü riwüba te tsingcho, “Adirü, hiri tu adüzüo?”

⁵Abinü lalingcho, “Hiri hi nyübong müyü; Arüh limih apüm ABÜDONGBA chahnü ade du rore.”

⁶Kuri anyahtinü tphahba tsü kihkulang Babylon yang, kuri athru tsü nyüzüdulang, ko kuri müdrimütrati tsü kihjing limih lang tsiyacho.

⁷Müdrimütrah kuriti chürode, arühnü limih xodhengnung müwünung mürangcho. Riwürü tsünü yocho, “Wüng ko limih tsü xodheng!” ko arühnü wücho.

⁸Hütsüde riwüba tsünü I te züde yocho, “Kihkulang Babylon lang wüba kuritinü ABÜDONGBA rihlong chüroba kihchoko.”

⁹ABÜDONGBAnü I khyang yusi hi jücho.

¹⁰Abinü yocho, “Arangtsirü Heldai, Tobija ko Jedaia chahnü jiyüti khyüng ko Zefania tsurü Joshua kuh lang zah wüng: Hiri nyitsarü atümung Babylon la yangtsi lanü thaliko.

¹¹Arühnü jüba hon ko taripi tsünü kuthri külüpm, ko hütsü Jehozadak tsurü Joshua Bebü amungthriba thah la thrijüng.

¹²Akohbong ABÜDONGBAnü yorepü abi te young, ‘Nyitsarünü süte Ajengza dsiro abi licho la abinü müwajünung ko ABÜDONGBA amübükuh thali thsanung.

¹³Hütsü abinü thsanung ko Yangthsaba jengreng abinü ngunung, ko abinü apu müyurü michah thsanung. Bebürü khüdu abi Yangthsaba pümji müshüm yanung, ko arühnü atbachi ko akehta la müjang nguchinung.’

¹⁴Heldai, Tobija Jedaia ko Josia nengla Yangthsaba kuthri tsü ABÜDONGBA Amübükuh la amünbüchünung yohpünung.”

¹⁵Ashula lirütinü ro ABÜDONGBA kuh thsachi la tronung. Ko khode hi thali thsanang, Akohbong ABÜDONGBAnü nührü yang Ih müthehchoepü nührünü müdhenung. Nührünü ABÜDONGBA nührü Tsingrang yuzeng ajeng nyikhang hiri apüm tikehnung.