Read Sangtam Naga ZEKARIA 7 Bible Online

ZEKARIA 7 - Sangtam Naga bible

ZEKARIA 7

¹Darius yangthsapü kang müyüu, choo düku (Kislev choo) amüyüu nyümong, ABÜDONGBAnü I khyang yusi hi jücho.

²Bethelrünü Sharezer ko Rezemelek ko arüh nyitsarü Akohba ABÜDONGBA Amübükuh lang amüwa chingnung

³ko bebürü ko azikehrü te hi tsingdhengnung müthehcho: “Amübükuh thsangnyangcho nengdang, kang hidoi Ihsanü nguchi rocho roh-i, choo müngau tsü Ihsanü mütozah kongnung do?”

⁴Ih yang roba ABÜDONGBA yusi tsü hi.

⁵Abinü yocho, “Arühnü kang nyühre choo amüngau ko dhünyeh-u la kongnü me traba tsü I jengreng jo nguchicho mah pü alih la müyurü ko bebürü te young.

⁶Ko arühnü tsuba ko yongba tsü, arüh longnyüpnung nengdang du thsacho.”

⁷Jerusalem rii jode ko arüh yangdi mükang lijengcho du mah, ta adesü kihjing lahpi ko nyüzüdu lang azong jingdümpi nyitsarünü jeng li bekhyah, ABÜDONGBAnü müngulang azikehrü khu yocho.

⁸ABÜDONGBAnü Zekaria khyang yusi hi jücho:

⁹“Akhudinü I nyitsarü khyang yuzeng hi jücho: ‘Yuje yu khaang, palu jünirü te amüi ko yanglilüm ngung.

¹⁰Chomirü, mürürü, shirü mahkhang ailümrü tüsehchi; ko sünü lasiking la ajünirü nyüm rah tükülüp.’

¹¹“Ta I müyurütinü münyinung hongzire. Arühnü arüh lasiking khangtire ko arüh lasiking lung roh-i müküpre.

¹²Tunüo papade Ihnü azikehrü khu müthehba adoba tsü arühnü münyire, Ih dee wahpehko.

¹³Ihnü yode arühnü münyichonü, arühnü kihchide Ihnü mülalingcho.

¹⁴Tsingxinyübong roh-i arüh limih palang linung Ihnü fopehcho. Hiba alih asu hi süsü mülipü naying pehjücho.”