Read Sangtam Naga ZEKARIA 8 Bible Online

ZEKARIA 8 - Sangtam Naga bible

ZEKARIA 8

¹Akohba ABÜDONGBAnü hiba yusi Zekaria khyang jücho:

²“Ihnü abi müyurü khura müichonü, abi rorüh thrünyinungthsa müisohba amüi asohnü Ihnü Jerusalem tronung nahkoh thsare.

³Ihnü Ih Amüsa yangdi, Jerusalem lang thalinung, ko hütsüla linung. Hütsü yuje choba yangdi pü dsinung ko Akohbong ABÜDONGBA khang tsü Amüsa khang pü dsinung.

⁴Thali ashirü ko ashilarü sürü ja bipü tsehro, arühnü yangdi yanglong la pümnung.

⁵Ko thali yanglong tsü jeng dhreza lazarünü shajanung.

⁶“Ade pehjüpü liba yuchoti nengdang hi amükohnung roh-i thsanung, ta hütsü I nengdang amükohnung mah.

⁷I müyurü notsiba lih la tsünü Ihnü arüh khümchonung,

⁸ko nyüchüro ko nyüzüdu langnü arüh Jerusalem la linung noronung. Arüh I nyitsarü thsanung, ko Ih arüh Tsingrang thsa, yuje ko longlangnü yangthsanung.

⁹“Rezehng! I amübükuh thsachinung kuphi dikehde azikehrünü yoba yu abübü tsü chünye nührünü yuchire.

¹⁰Hütsü amüngulü, sünüsü nyitsarü ko kanglungrü mülihnung mükohcho, ko süsü arorüh chahnü khümcho mülicho. Ihnü nyitsarü khüdunü khüdu nyümtasohcho.

¹¹Ta adelü hiba lih la nying lirüti yucho Ihnü pathsa xükümre.

¹²Arühnü atbachi la chisinung. Arüh shüsinü asih sihjünung, alihnü tsahmarü tsasohnung, ko tsing bholo ronung. Amüwanung hiri apüm I lih la nying liba nyitsarü khyang jünung.

¹³Juda ko Israelrü! ‘Juda ko Israel chah küduba chokehchola tsü nührü chahsü küdusohng!’ pü atsicho la yangpirütinü khüdunü khüdu chokehcholacho. Ta Ihnü nührü khümchonung, hütsüde ‘Juda ko Israel khyang jüba amüwanung tsü nührüsü ngusohng!’ pü hütsüri yangpirünü arüh-e arührü chotacho. Hütsüeko re zehng ko tüdrü.”

¹⁴Akohbong ABÜDONGBAnü yore, “Nührü jümürünü I zichürosohde, Ihnü arüh khingchinung lümcho ko Ihnü I lümcho mümülichi, ta Ihnü lümcho tsü nguchicho.

¹⁵Ta ade Ihnü Jerusalem ko Juda müwajünung lümre. Hütsüeko tüdrü.

¹⁶Nührünü hiri nguching: khüdunü khüdu te yuje choung, yukhachah yangtsa hironungthsa thsakehjünung rah tükülüp.

¹⁷Yuchümnü arahkheh yuzi tüya. Ihnü arahkheh, yuje mücho ko shühkhatohba thrünyire.”

¹⁸Akohbong ABÜDONGBAnü Zekaria khyang yusi hi jücho:

¹⁹“Choo amüyüu, amüngau, dhünyeh-u, ko adhüreu la kongba tsü Judarü nengdang alongphi ko akünyang kangnung. Nührünü yuje ko yangtsa müing.”

²⁰Akohbong ABÜDONGBAnü yore, “Yangdi adrong lanü Jerusalem lang nyitsarüti ronung becho chihle.

²¹Yangdi khüdu lanü rorünü yangdi palangnü rorüh te yonung, ‘Ihsanü Akohbong ABÜDONGBA mübünung ko Abi amüwa chingnung wonung. Ihrü yola rung!’

²²Yucho adidi lanü nyitsarü adrong Jerusalem lang Akohbong ABÜDONGBA mübünung ko amüwa chingnung ronung.

²³Hütsü nyümong yangpirü dhüre Jihudarü khüdu yang ropü yonung, Ihrüsü nührü yola zehnyüre, tunüo nührü te Tsingrangba zehlepü ihrünü yuchire.”