Read Sangtam Naga MALAKI 3 Bible Online

MALAKI 3 - Sangtam Naga bible

MALAKI 3

¹Akohba ABÜDONGBAnü lalingre, “I lang rungnümnung Ihnü I yusi hirü müthehnung. Hütsüde nührünü yingba ABÜDONGBA dhrongyengnü Abi amübükuh la ronung. Nührünü nahmürahba yusi hirü ronung ko I azengtacho sobhonung.”

²Ta Abi roba nyümong sünü rangchonung? Abi rode sünü yachehnung? Abi idhse tahchehba michang kyo apho atsa kyo linung.

³Abi taripi mülurü ko müthsengchehrü kyo yukhanung ronung. Idhse nguchirünü taripi ko hon müthsengchehcho kyo, ABÜDONGBA yusi hirünü bebürüti müsachehjünung, ko arühnü ABÜDONGBA khyang athsalang amübü jünung.

⁴Hütsüde Judarü ko Jerusalemrünü papade hiroba roh-i amübü tsü ABÜDONGBAnü khyüchochehba thsanung.

⁵Akohbong ABÜDONGBAnü yore, “Nührü yukhanung Ih ronung, ko Ihnü amongrü, nahtranahxengrü, arahkheh yuzi jürü, shehsherü amii kihyochürü, chomilarü, mürürü ko shuparü nyüpmüsehrü, ko I jengreng müdrürü atümung nyüm Ihnü langjünung.

⁶“Ih ABÜDONGBA, ko Ih mümülichire. Hütsüeko, nührü Jakob trah sehsehlü müchang.

⁷Nührü jümürü kyo, nührü I yuzeng lanü ximüla tsiko ko mübichi. Ih yang thali rung, ko Ih nührü yang thalinung. Ta nührünü tsingdhengre, ‘Nü yanglang thali ronung ihrünü tu nguchinung?’

⁸Ihnü nührü te tsingdhengre, Nyüh khüdunü Tsingrangba chahnü kengchonung athsalang do? Mah, ta nührünü I chahnü kengchore. ‘Khütapü?’ ko nührünü yore. Dhüre nohlüm ko amübü la.

⁹Nührü atümung chokehcholako, tunüo yucho apümnü I chahnü kengchoko.

¹⁰Amübükuh la tsuyongnung kükyo linungthsa, nührü dhüre nohlüm ajeng hirung. Akohbong ABÜDONGBAnü yore, Ih thsatsodheng, Ihnü ninglang kukhang khangthrupü amüwa thangchi jo a müjünang.

¹¹Ihnü nührü tsahma kangzahnü müthsangnyangsohnung ko shükusishü mütsenglüp sihsohnung.

¹²Hütsüde lihküpnü nührü te akünyang pü dsinung, tunüo nührü lih tsü alinung atsa thsanung.

¹³“ABÜDONGBAnü yore, “Nührünü Ih nyümra choko. Ta nührünü tsingdhengrü, ‘Ihrünü nüh nyüm tu chocho?’

¹⁴Nührünü yocho, ‘Ih Tsingrangba dikehnung müdhsüdah. Abinü yocho nguchinung mahkhang ihrü thsamehcho nengdang mülang pehjüng pü ngusohnung tu thsütahro?

¹⁵Ihsanü ngucho roh-i amüthseh nyitsarü künyang lire. Amütsarü tsü amüwa ngurü du mah, ta arüh nguchi amütsanü Tsingrangba thsatsüre, ta tu müthsare.’ ”

¹⁶Hütsüde ABÜDONGBA drürünü arüh-e arührü chotare, ko arüh chotacho Tsingrangbanü nyire ko yuchire. Abi bete ABÜDONGBA drürü ko jengreng jürü lümkehba vakha khüdu la arüh neng thrahyohcho.

¹⁷ABÜDONGBAnü yore “Arüh I nyitsarü thsanung.” “Ihnü nguchi nyümong arüh Ipu yo thsanung. Aunü abi dikehba atsudhre müicho roh-i Ihnü arüh müinung.

¹⁸Hütsüde anyüpili, amüsarü ko amünyirü kahla, I dikehrü ko Ih müdikehrü kahla tu tikehnang I nyitsarütinü ngunung.”