Read Sangtam Naga MATHI 1 Bible Online

MATHI 1 - Sangtam Naga bible

MATHI 1

¹Hiba hi Jisu Khrista jümürü chung, Abraham chahnü trahchocho khüdu, David chahnü licho.

²Abraham tinü David Yangthsaba chii, jümürü chung hiroh-i: Abraham, Isak, Jakob, Juda ko abi jünirüti; hütsüpü Perez ko Zera (arüh atpa tsü Tamar thsacho), Hezron, Ram, Aminadab, Nashon. Salmon, Boaz (atpa tsü Rahab thsacho), Obed (atpa tsü Ruth), Jesse ko David Yangthsaba.

⁶David tinü Israelrü Babylon lang yangtsilang nowü bekhyah chii, jümürü chung hiroh-i: David, Solomon (atpa tsü Uria nitpü thsacho), Rehoboam, Abija, Asa, Jehoshafat, Jehoram, Uzia, Jotham, Ahaz, Hezekia, Manase, Amon, Josia ko Jihoiakin ko abi jünirüti.

¹²Babylon lang yangtsi nowü bekhyah tinü Jisu surocho chii, jümürü chung hiroh-i: Jihoiakin, Shealtil, Zerubabel, Abiud, Eliakim, Azor, Zadok, Akim Eliud, Eliazar, Mathan, Jakob ko Josef, sünü Mesia dsiba Jisu atpa Mary te kukangcho.

¹⁷Hütsüde, Abraham tinü David chii shang dhüre-müyü, ko David tinü Babylon la yangtsicho chii shang dhüre-müyü, ko hütsü tinü Khrista surocho chii shang dhüre-müyü licho.

¹⁸Jisu Khrista khüta surocho hütsü hiroh-i lile. Atpa Mary tsü Josef te müxingtapü licho, ta anyüh kuh mükangede, abükyü tsü Anbü Amüsa khu afü müdengpehcho.

¹⁹Josef tsü lede yuje chorü nyüh khüdu, ta abinü Mary tsü misha ashah mükhyüsohnyücho; hütsünü müxingta liba tsü abinü rangnü zanung arah külüpcho.

²⁰Abinü hütsü roh-i lüm lide, Abüdongba ninglang riwürü khüdunü melang abi te chüro yocho, “David tsurü Josef, nü nitpü thsanung Mary khyünung tu tüdrü. Tunüo Anbü Amüsa khu abükyü afü müdeng lile.

²¹Abükyünü adhrezarü khüdu nümüsunung, ko nühnü abi neng Jisu dsinung, tunüo abinü anyitsarü arüh münyi lanü khümchonung.”

²²Abüdongbanü atikehnung nengdang azikehrü khu tu yocho hi atümung ade tikehre.

²³“Amüthsengcheh lazarü khüdu fü müdeng kangnung ko azarü khüdu nümüsunung, ko abi te Immanuel pü dsinung” (khüi adüzü, “Ihsa te Tsingrangba lile”).

²⁴Hütsüpü Josef jesucho ko Abüdongba riwürünü abi te yocho roh-i, abinü Mary khyücho.

²⁵Ta azarü tsü müsuro delü abinü abükyü te mümükhongcho. Ko Josefnü aneng Jisu dsijücho.