Read Sangtam Naga MATHI 12 Bible Online

MATHI 12 - Sangtam Naga bible

MATHI 12

¹Tunyah mülipü Sabath nyümong khüdu Jisunü luh lahkhu tsicho. Amonoti yangcho, achotsü arühnü fürü müyeh tsunung dikehcho.

²Khode Farisirünü hi ngucho, arühnü Jisu te yocho, “Dheng, Sabath nyümong nü monotinü hiroh-i nguchiba tsü Ihsa Yuzeng nyüm nguchire!”

³Jisunü lalingcho, “David ko anyitsarütinü arüh yangseh lide tu nguchicho nührünü mükhidhengcho do?

⁴Abinü Tsingrangba kuhla züducho, ko abi ko abi nyitsarünü bebürü dunü tsunung mülaba, Tsingrangba khyang mübücho hümthse arüh nengdang amütsuba hümthse yuzeng nyüm arühnü tsucho.

⁵Mahkhang Sabath nyümong mükhu amübükuh la liba Bebürütinü Sabath nyümong yuzeng thsangnyangrü ta arüh mümülangjürü, hütsü nührünü Mosa Yuzeng la mükhidhengcho ang?

⁶Ihnü nührü te yore, hila amübükuh tenü adiu lango lile.

⁷Amüsa yunü yore, ‘Ihnü müruba tsü kanglungrü kangmübü mah, ta achomang.’ Hiba adüzü tunang nührünü müdherelanglü, nührünü amülanglang müliba khyang mümülangjünung;

⁸tunüo Nyitsarü Tsurü tsü Sabath nyümong michahsü Abüdongba.”

⁹Jisunü hütsü müdüm pehjücho ko Sinagog lang wücho,

¹⁰ko hütsüla nyüh khüdu akheh süpü licho. Hütsüla nyitsarü khürü Jisunü amüthsalang nguchicho mülang rangnyo licho, hütsünü arühnü abi te tsingdhengcho, “Sabath nyümong kyangjünung tsü Ihsa yuzengnü mülarü mah-o?”

¹¹Jisunü lalingcho, “Nührü nyüh khüdu yo San khüdu Sabath nyümong shukuh la shohyohkhang tu tonung? Abinü hütsü mütphahchenung ang?

¹²Ko nyitsarü khüdu tsü San khüdu tenü awüu lile! Hütsünü, Ihsa Yuzengnü Sabath nyümong khürü tronung mülare.”

¹³Hütsüpü abinü akheh süba nyitsarü te tsü yocho, “Nü kheh müyungchüng.” Abinü hütsü müyungchücho, ko hütsü khüulang roh-i tsapehcho.

¹⁴Hütsüde Farisirünü tsicho ko Jisu süsohnung arah külüpcho.

¹⁵Khode Jisunü abi nyüm arah külüpcho yuchicho, abinü hütsü müdüm lanü tsipehcho; ko sühdi amülah abi iiwücho. Abinü füthsarü atümung kyangjücho,

¹⁶ko abi nengdang aparü te müchochinung yuzeng jücho.

¹⁷Abinü hi Tsingrangbanü Azikehrü Isaya khu yochoba tikehsohnung nguchicho:

¹⁸“Hila I dikehbong lile, Sü Ihnü throchehcho, Sü Ihnü müiro, ko sü chah I long kyangro. Ihnü abi chah I nbü müthehnung, ko abinü yochoti te I yukhaba seyohjünung.

¹⁹Abinü mürehtanung mahkhang müzüdenung, mahkhang yanglong la zii müchonung.

²⁰Abinü suh müzehrü te künanung, ko rotorü te müinung. Yuje khyang akoh müngusohde müshehnung,

²¹ko yuchoti atümung alongdi yohpünung.”

²²Hütsütade amünyi nbünü rangcho anatoh ko amongdongrü nyüh khüdu khürünü Jisu yang norocho. Jisunü abi kyangjücho, ko abinü chonung ko ngunung kohcho.

²³Jisunü nguchicho ngu amülung atümungnü nyemüyang yocho, “Hi David tsurü mah-o?”

²⁴Khode Farisirünü hi yuchicho, arühnü yocho, “Arüh Aziba Beelzebulnü hütsüroh-i nguchinung abi khyang zii jücho dunü abinü amünyi iipehjüre.”

²⁵Jisunü arüh lümba tsü müdhecho, achotsü abinü arüh te yocho, “Khüiba Yanglih abürü jangjangthsa changnah khüdunü khüdu te khatanang hütsü anyahli mülinung. Ko khüiba yangdi mahkhang kukhi abürü jangjangthsa changnah khüdunü khüdu te khatanang hütsü khülunung!

²⁶Hütsüeko Satan yanglih la amülung khüdunü khüdu te khatakhang, hütsü adüzü amülung-mülung changnahpehko ko zah khülunung!

²⁷Ihnü amünyi nbü iipehba tsü Beelzebul ziinü nguchisohrepü nührünü yore. Tsale, khang, nührü iirorü khyang arüh iipehsohnung zii sünü jüro? Nührübürü mono nguchinü nührü tsü arahkheh-epü yuzi jüre!

²⁸Hiba hi Beelzebulnü mah, ta Tsingrangba Yanglih tsü nührü yola ropehkopü yuzi jünung nengdang, Tsingrangba anbünü amünyi iipehsohnung I khyang zii jüre.

²⁹“Arezeh nyitsarü tsü rah müyohpüde abi kuh rohphoh kohro hitsinung mükoh, ta rezehba tsü akhu rah yohpüpü du abi kuh lanü kengchonung kohnung.

³⁰“Sü I yola müzehro abi I nyümrü, sünü I yola mükhyübülungro, abinü shupehre.

³¹Hütsüeko Ihnü nührü te yore, “Amünyi ko müthsamünyüba apüm mülangpehjünung, ta Anbü Amüsa müthsamünyücho mülang müpehjünung.

³²Sünü Nyitsarü Tsurü nyüm chonang mülangpehjünung; ta sünü Anbü Amüsa nyüm chonang khodesü mülang müpehjünung.”

³³“Singsih atsa sihsohnung singdong atsa athsütah; Singdong amütsa chahnü singsih amütsa ngunung. Singdong khüdu tsü asih tsünü müdhere.

³⁴Nührü mürü zati, nührü mütsa yohpüpü khüta atsa choro? Tunüo lasih la tu liro hütsü du benü chore.

³⁵Nyitsarü atsa khüdunü akangcho atsa lanü kohro atsa hirore; nyitsarü amütsa khüdunü akangcho amütsa lanü kohro amütsa hirore.

³⁶“Nührünü hi müdheing, yukhaba nyümong la palunü amükhyu yu cho rocho nengdang palunü yuzi jünung.

³⁷Nüh langjünung mülangjünung nüpu yunü nü yu khanung.”

³⁸Hütsütade Yuzeng dorü ko Farisirü khürünü yocho, “Adorü, Nü chahnü thsayahiya khüdu Ihrünü ngunyüre.”

³⁹Jisunü yocho, “Hiba shang hi khüta amünyi ko Tsingrangba mümüdhere!” “Nührünü I te thsayahiya khüdu nengdang tsingdhengrü ang? Müngusohnung! Nührü te ngusohnung thsayahiya tsü azikehrü Jona thsayahiya due.

⁴⁰Jona nyümong asang ko romang asang nguh mi la licho kyo, Nyitsarü Tsurü nyümong asang ko romang asang alih yonglang linung.

⁴¹Yukhaba nyümong Nineverünü shemüsu yanung ko nührü mülangjünung, tunüo Jonanü thsingyucho yuchi arüh lasih thsamülacho, ko Ihnü nührü te yore, hila Jona tenü adiu khüdu lile!

⁴²Yukhaba nyümong Sheba yangthsalatpünü shemüsu yapü nührü mülang jünung, tunüo Yangthsaba Solomon lümlong nyinung abükyü lih lanü lang hütsüdoi tseh rocho; ko Ihnü nührü te yore, hila Solomon tenü adiu khüdu lile!

⁴³“Khode nyüh khüdu chahnü amünyi nbü tsinang, abinü kunglikungsa la kumünyichah yangchire. Abinü sü müngukhang,

⁴⁴abinü apu te yore, ‘Ihnü I kuh lang thali wünung.’ Hütsüpü abinü thalide kuh tsü adeng, müsakhüti, ko athsalangnü zakeh ngure.

⁴⁵Hütsüde abinü wünü abi tenü amütsauba apa anbü dhünyeh nororü, ko arüh züro hütsüla lire. Hütsükonülü, hütsüba nyitsarü tsü akhudi tenü amütsauba suro kangre. Chünye hiba amütsa shang chahsü hiroh-i tikehnung.”

⁴⁶Jisu nyitsarüti te chotachi yade atpa ko anirüti ro chihcho. Arüh dongkhu yapü abi te chotanung tsingdhengcho.

⁴⁷Hütsüde abi te hütsüla nyüh khüdunü yocho, “Dheng, nü tpa ko nü nirüti nü te chotanyo dongkhu yingyale.”

⁴⁸Jisunü lalingcho, “Itpa süo? ko I nirü sürüo?”

⁴⁹Ko abinü amono lahpi thongu yocho, “Dheng! Itpa ko I nirüti hila lile!

⁵⁰Sünü ninglang liba I U lümcho nguchinang abi tsü I jünirü, I jünilarü ko Itpa.”