Read Sangtam Naga MATHI 13 Bible Online

MATHI 13 - Sangtam Naga bible

MATHI 13

¹Hütsü nyümong tsünü Jisunü kuh pehjücho ko kihdi lang wü pümcho.

²Abi mükang shibülungrü tsü sühdirachonü arüh tsü kihbekhüm la yasohpü abilü kihtang khüdu chah küdu pümcho.

³Abinü arüh te lang adrong thsingyunung yukitaba bichicho. “Mashurü khüdu mashunung wücho.

⁴Abinü majüh tsü shude, khürü langthsilang longcho, ko uzati ro hütsü tsupehcho.

⁵Khürü alih dee mülicho lungsüh la longcho. Majüh tsü alih jengpachonü zah surocho.

⁶Ta khode nyü chüro anu chah tsü hecho, ara tsü soh mürayoh tsichonü, anu tsü zahnü mükupecho.

⁷Majüh khürü zengtrung yola longcho, ko hütsü zide anu tsü khüpsehpecho.

⁸Ta majüh khürü alih asu la longcho, ko asih sihcho; khürü chah asih thsih, khürü chah rohre, khürü chah sangre sihcho.”

⁹Ko Jisunü zika yocho, “Sü ayuchinung nangkhi tpehro abinü nyieng!”

¹⁰Hütsüde monotinü ro Jisu te tsingdhengcho, “Tuepü nühnü nyitsarü te chotade yukitaba bichiro?”

¹¹Jisunü lalingcho, “Rang liba ninglang Yanglih nengdang lümlong tsü nührü khyang ma arüh khyang müjü.

¹²Tunüo sü lango liro abi kükyüpü alaa lisohnung nengdang abi khyang alaa jünung; ta sü müliro abi azikyah liba tsüsü hitsinung.

¹³Ihnü arüh te chotade yukitaba bichiba hi arühnü dhengrü, ta müngurü, ko arühnü nyirü ta müyuchirü mahkhang münyichehre.

¹⁴Hütsünü Isayanü choyohcho arüh te phishule: “Hiri nyitsarünü ayuchilü yuchinung; ta münyichehnung, Angulü ngunung, ta müdhengchehnung,

¹⁵tunüo arüh lüm shütiko, ko arüh nangkhi cheh kangko, ko arüh nah khangtiko. Hütsüta müthsalang, arüh nahtsenü ngunung, arüh nangkhinü yuchinung, arüh thohnü nyichehnung, Ko arühnü I yanglang ximülanung, ko Ihnü arüh kyangjünungepü Tsingrangbanü yore.

¹⁶“Nührü nengdang khütoh-i amüwanungo! Tunüo nührü nahtsenü ngurü ko nührü nangkhinü yuchire.

¹⁷Ihnü nührü te yore, azikehrü adrong ko Tsingrangba nyitsarü adrongnü nührünü nguba khütang ngunyücho, ta arühnü müngu, ko nührünü yuchiba yuchinyücho, ta arühnü müyuchi.

¹⁸“Nyieng, ko mashurü yukitaba adüzü nyichoung.

¹⁹Sürünü Tsingrangba Yanglih nengdang yusi yuchirü ta hütsü münyichehrü arüh tsü langthsilang longba majüh kyole. Amünyi tsü rorüh ko arüh chah shukehba majüh tsü rohcho hitsire.

²⁰Yusi yuchiyeng sürünü künyangseh khyüchoro, hütsü lungsüh yola longba majüh tsü kyole.

²¹Ta arüh ara asoh mürachonü, arüh anyahli müyare. Hütsünü khode hiba yusi nengdangnü chongcha mahkhang dhsümthsedhsümloh ronang, arühnü khüdupinü pehjüre.

²²Zengtrung yola longba majüh adüzü sünü yusi tsü yuchirü; ta hiba akang nengdang lümtpanah, ko kuthsi müichonü yusi tsü khüpsehre, ko asih müsire.

²³Ko alih asu la longba majüh adüzü sürünü yusi yuchiro ko hütsü nyichehro: arühnü asih khürünü thsih khürünü rohre ko khürünü sangre sihre.”

²⁴Jisunü arüh te yukitaba apa khüdu yocho: “Ninglang Yanglih tsü hi kyole. Nyüh khüdunü aluh la majüh atsa shucho.

²⁵Romang khüdu, atümung yüpseh lide, münyehrü khüdu ropü matse yola Sepungza shujüpü tsipehcho.

²⁶Khode madong tsü zii angüm chürocho, hütsütade Sepungza tsüsü chürocho.

²⁷Nyitsarüba kulirü tsünü abi te ro yocho, ‘Adirü, nü luh la nühnü majüh atsa shucho; khang Sepungza hi khüdenüo?’

²⁸Abinü lalingcho, ‘Hiba hi münyehrü khürünü nguchichobae.’ Arühnü abi te tsingdhengcho, ‘Ihrünü wünü Sepungza tsü rohpehsohnyürü mah-o?’

²⁹Abinü lalingcho, ‘Doh,’ ‘Tunüo nührünü sepungza rohpehde matse miinü rohpehnung.

³⁰Maxa kyang müchide anyüding chisohng. Hütsüde, Ihnü maxarü te akhu sepungza tsü rohnung ko abhong kang rahnung ko tahpehnung, hütsüpü du fürü tsü I shih la hibülungnung yonung.’ ”

³¹Jisunü arüh te yukitaba apa khüdu yocho: “Ninglang Yanglih tsü hi kyole. Nyüh khüdunü aluh la xehnyi tse shucho.

³²Hiba hi jünangrü yola azauba lile, ta khode hütsü zinang chisicho atümung tenü singdong adiu kangre, ko uzatinü ro ajengza chah asüp shüre.”

³³Jisunü adesü arüh te yukitaba apa khüdu yocho: “Ninglang yanglih tsü hi kyole. Khingkurü nyüh khüdunü hüm liter yüre la bhüpza aikyah münyahpü atümung mülangde yohpüre.”

³⁴Sühdi te hiri atümung yonung Jisunü yukita bichicho; abinü yukitaba müzehpü tusü müchocho.

³⁵Azikehrünü atikehnung tu yocho hütsü abinü nguchicho: “Ihnü arüh te chotade yukita bichinung; Lipoh dinü rang liba nengdang Ihnü arüh te yonung.”

³⁶Khode Jisunü sühdi tsü pehjüpü kuhla züducho, amonotinü abi yang ronü yocho, “Luh la Sepungzanü yukitaba nengdang tsü tunang ihrü te young.”

³⁷Jisunü lalingcho, “Majüh atsa shuba tsü Nyitsarü Tsurü lile;

³⁸luh tsü limih; majüh atsa tsü ninglang Yanglih tsurüti; ko Sepungza tsü amünyi tsurüti;

³⁹ko münyehrü sünü Sepungza shucho abi tsü motsing lile. Maxaba tsü achangka nyümong lile, ko maxarü tsü ninglang riwürüti.

⁴⁰Sepungza khyübülung michang la tahpehcho roh-isü, achangka nyümong lasü hütsü roh-i du tikehnung:

⁴¹Nyitsarü Tsurünü apu riwürüti abi yanglih lanü amünyi shitpasohrü atümung ko amünyi nguchirü atümung nübülungsohnung.

⁴²Ko hütsüla arüh ha mütrehketa tranung, ko michang la arüh rangyohnung.

⁴³Hütsütade Tsingrangba nyitsarüti Au Yanglih la nyü roh-i vinung. Nyieng, nührü nangkhi tpehkhang!

⁴⁴“Ninglang Yanglih tsü hi kyole. Luh khüdu la kuthsi rangpücho nyüh khüdunü ngupücho. Abinü hütsü rangpülicho, ko künyangsehnü wü alicho apüm icho ko thali wü hütsüba luh tsü lihcho.

⁴⁵“Adesü ninglang Yanglih tsü hi kyole. Nyüh khüdunü bhürüm akhacheh yangchicho,

⁴⁶khode abinü tsara khüdu ngucho, abinü wünü alicho apüm icho, ko hütsüba bhürüm tsü lihcho.

⁴⁷“Adesü ninglang Yanglih tsü hi kyole. Ngurangrü khürünü kihdi la yojeh phayohchünü ko ngu ahung apüm phachehcho.

⁴⁸Khode yojeh tsü jengcho, arühnü kihbekhüm lang tphahchehcho ko nguh tsü changnung pümcho: atsa tsü arüh bha la yohcho, ko amütsa tsü pehcho.

⁴⁹Achangka nyümong la hiroh-i linung: Ninglang riwürütinü wünü atsarü yolanü amütsarüti nübülungnung,

⁵⁰ko hütsüla arüh ha mütrehkehta tranung ko arüh michang la rangyohnung.

⁵¹“Hiri münyichehkhango?” Jisunü arüh te tsingdhengcho. “Nyichehko,” arühnü lalingcho.

⁵²Hütsütade abinü lalingcho. “Hi adüzü, Yuzeng adorü müipi sü ninglang Yanglih la mono khüdu kangro, abi tsü asi ko ahi kohro azahkehji lanü zangchehba kuh abüdongba kyole.”

⁵³Khode Jisunü yukita hiri chokacho, abinü hütsü müdüm pehjücho

⁵⁴ko apu yangdi lang thali wücho. Abinü Sinagog la docho, ko abi yu yuchirü atümung nyemüyangcho. Arühnü tsingdhengcho. “Abi khüdenü Lümlong hi ngucho?” “Ko abi thsayahiya tsü khüroh-io?

⁵⁵Abi sing mistriba tsurüsü mahrü do? Mary tsü atpa mahrü do? ko Jakob, Josef, Simon, ko Juda anirüti mahrü do?

⁵⁶Anilatpürüsü hila lirü mahrü do? Hiri atümung abi khüdenü ngucho?”

⁵⁷Hütsüta arühnü abi mükhyüchocho. Jisunü arüh te yocho, “Azikehrü khüdu tsü apu yang la ko kukhi chah khu atümung lang hechire.”

⁵⁸Arühnü müyudsichonü abinü hütsüla thsayahiya adrong münguchicho.