Read Sangtam Naga MATHI 14 Bible Online

MATHI 14 - Sangtam Naga bible

MATHI 14

¹Hütsü shikhe la tsü Galil la yangthsaba Herodnü Jisu nengdang yuchicho.

²Abinü abi chitungrü te yocho, “Hi yuje baptijüba Johan e, abi kangchehli roko, hütsünü thsayahiya nguchichehnung zii kehre.”

³Tunüo Herodnü akhulang Johan rangsohcho, ko rahpü akhangti kuhla yohpücho. Abinü hi ani Filip nitpü Herodias thsacholanü nguchicho.

⁴Tunüo Baptijüba Johan-nü Herod te yocho, “Nühnü Herodias khyünung athasalang mah!”

⁵Herodnü abi mapsehnyücho, ta abinü Jihudarü drücho, tunüo arühnü Johan tsü azikehrü khüduepü khichicho.

⁶Herod suro nyümong la Herodias tsulatpünü amülung atümung bete nyiichicho. Herod khütang künyangcho.

⁷Hütsünü abinü abükyü te nyengchocho, “Nühnü tu chingnang Ihnü jünung yuchümre!”

⁸Atpanü müjühpü abükyünü abi te yocho, “I khyang ade hila tbhü khüdu la baptijüba Johan thah yohpü khülo!”

⁹Yangthsaba tsü longyücho, ta abinü abi shirü apüm bete nyengchochonü abinü abükyünü khyünyüba tsü jünung mülacho.

¹⁰Hütsünü abinü Johan arangyoh kuh lanü aku dengcho.

¹¹Aku tsü tbhü khüdu la hironü, lazatpü khyang tsü jücho, ko abükyünü atpa khyang hiwü jücho.

¹²Johan monotinü ro ame tsü hiwünü dhrürangcho; hütsüpü arühnü wünü Jisu te yocho.

¹³Khode Jisunü Johan nengdang yusi tsü yuchicho, abinü hütsü pehjüpü, kihtang khüdu chahnü anaying müdüm khüdu yang anabi tsicho. Nyitsarünü hütsü yuchi, arüh yangdongti pehjüpü ajingnü abi yang wücho.

¹⁴Jisu kihtang la tsünü jürocho ko khode abinü sühdi tsü ngucho, abinü arüh nengdang lasih thsa lümcho, ko abinü arüh thsangnangrü kyangjücho.

¹⁵Nyüzeh rode monotinü ro abi te yocho, “Adelü dee münuko, ko hiba hi anaying müdüm-e. Arühbürü tsuyongnung lihsohnung yanglang nyitsarüti tsü tsisohng.”

¹⁶“Arüh tsinung müdhsüdah,” Jisunü lalingcho. “Nührünü uthring arüh khyang lango atsunung jüng!”

¹⁷Arühnü lalingcho, “Hila ihrü licho hümthse münga ko nguh anyüh due.”

¹⁸Jisunü yocho. “Hütsüri tsü Ih yang hirung.”

¹⁹Abinü nyitsarüti zanu michah pümsohcho; hütsüpü Jisunü hümthse münga ko nguh anyüh tsü bipü, ninglang dheng Tsingrangba khyang anengse jücho. Abinü hümthse tsü chenahcho ko amonoti khyang jücho, ko amonotinü nyitsarüti khyang chahla tüpcho.

²⁰Arüh atümung kükyo tsucho. Hütsüpü monotinü arüh tsunying loh dhüre-anyüh jeng khyübülungcho.

²¹Khingkurü azarü mükhipü yangtsurü adhrerü dunü hajar münga-o thsacho.

²²Hütsüpü Jisunü nyitsarüti shishosohde, amonoti tsü kihtang la küdusohpü kikeh khüulang tsichi yasohcho.

²³Nyitsarüti tsü tsisohko khanglang, abinü akhang khüdu lang anabi dangkhidangnangnung tuwücho. Nyüzeh rode, hütsüla Jisu nehbi kangcho.

²⁴Ko hütsüdelü kihtang tsü kihdi lanü ashu wüpü kilohnü thsung mülachi licho, tunüo nyübongnü hütsü nyüm fücho.

²⁵Anyangnyü asang e dhüroh bekhyah kahla amonoti yang Jisu kih michah tseh rocho.

²⁶Khode arühnü abi kih michah tseh ro ngucho, arüh nehcho. “Hi amünyi nbüe!” arühnü yocho, ko dronü khongcho.

²⁷Jisunü arüh te zah chota yocho, “Müsi zieng! Ih-e, Tüdrü!”

²⁸Hütsüde Peternü lalingcho, “Abüdongba, hi yuje nüh thsakhang, Ih nü yanglang kih michahnü ronung mülajüng.”

²⁹Jisunü lalingcho. “Rung!” Achotsü Peter Kihtang lanü mütrahcheh kih michah tsehnü Jisu yanglang wücho.

³⁰Ta khode abinü nyübong amülah rocho müdhecho, abi drücho ko amülingyohrü thsacho. “Ih khümchoung, Abüdongba!” abinü züdecho.

³¹Khüdupinü Jisunü akheh müyungcho abi chah marehpü yocho, “Nü yudsi zarale! Tuepü nühnü lümxücho?”

³²Anyüding kihtang la züducho ko nyübong tsü zahpehcho.

³³Hütsüde kihtang la monotinü Jisu mübücho ko arühnü yocho, “Yuje nüh Tsingrangba tsurüe!”

³⁴Arühnü kih keh ronü Genesaret lih chihcho,

³⁵hütsüla nyitsarünü abi tsüpcho. Hütsünü yang mükang apüm lanü füthsarü Jisu yang noronung arühnü müthehcho.

³⁶Füthsarü tsü abi shüyo chah dusü thahpüsohngpü arühnü abi te kihchicho; ko athahpürü atümung kyangcho.