Read Sangtam Naga MATHI 15 Bible Online

MATHI 15 - Sangtam Naga bible

MATHI 15

¹Hütsüde Farisirü ko Yuzeng adorü khürü Jerusalem lanü Jisu yang ronü abi te tsingdhengcho,

²“Tuepü nü monotinü Ihsa jümürü adoba mübichiro? Tunüo arühnü kheh mümütsahpü tsuyongre!”

³Jisunü lalingcho, “Tuepü nührünü Tsingrangba Yuzeng münyipü nührübürü adocho du bichiro?

⁴Tunüo Tsingrangbanü yocho, ‘Nü tpa ko nüu jengreng drüng,’ ko ‘sürünü atpa mahkhang au chokehcholanang abilü süsohbae.’

⁵Ta nyüh khüdu atpa mahkhang au trochehnungthsa lango likhang, ‘Hiba hi Tsingrangba yoe,’

⁶atpa mahkhang au jengreng drünung athsütah mülepü nührünü yore. Hiroh-i nührübürü adoba bichinyülangnü nührünü Tsingrangba Yuzeng mükhichire.

⁷Nührü akhürahrüti! Isayanü nührü nengdang choyohba tsü khütoh-i yujeo!

⁸“Hiri nyitsarünü abe dunü I jengreng drüre, ta arüh lasih I tenü ashu za lile.

⁹Arüh nengdang Ih mübünung tu athsütah müle, tunüo arühnü nyitsarünü külüpcho yuzeng Tsingrangba yuzeng roh-i dore!”

¹⁰Hütsüpü Jisunü amülung tsü abi yanglang dsinü yocho, “Nyieng ko nyichehng!

¹¹Be la tu züduro hütsünü nyitsarü khüdu münyijürü mah; ta tu be lanü chürorü hütsünü abi münyijüre.”

¹²Hütsütade monoti ro abi te yocho, “Nühnü yoba yu tsünü Fairisirü müthikehsorepü nühnü mümüdheo?”

¹³Jisunü yocho, “Ninglang liba I Unü müchisicho apüm rohpehnung,”

¹⁴“Arüh nengdang tülümxü! Arüh anatohrü langnürüti; ko khode anatohrünü anatohrü lang nonang, anyüding yongroh la thungyohnung.”

¹⁵Peternü yocho, “Hiba yukita ihrü te tsitsa young.”

¹⁶Jisunü arüh te yocho, “Ade yingcheh nührüsü aparü tenü athsehthsaulü mah.

¹⁷Nührünü hi münyichehrü do? Tu be lanü tsuyohchüro hütsü ami la züdure ko afü lanü tsire.

¹⁸Ta abe lanü tu chüroro hütsü lasih lanü chürore, ko hirinü nyitsarü khüdu münyijüre.

¹⁹Tunüo lasih lanü amünyi lümlong, mapsehnung, nahtranahxengnung, mabomashinung, fühnung, arahkheh chonung ko nyüpmüsehnung chürore.

²⁰Hirinü nyitsarü münyisohre. Ta kheh mümütsahpü tsuyongchonü nyitsarü khüdu mümünyijüre.”

²¹Jisunü hütsü müdüm pehjüpü Tyre ko Sidon lih yang wücho.

²²Kananlarü khüdu hütsüla licho abi yang ronü züde yocho, “David Tsurü!, I te chomang! I tsulatpü amünyi nbünü dee khingchi lile.”

²³Ta Jisunü abükyü te yu khüdusü müyocho. Ko amonotinü ro abi te kihchicho, “Abükyü tsü tsipehsohng! Abükyünü dee bolo Ihsa khanglang rore!”

²⁴Hütsüde Jisunü lalingcho, “Ih achahcho san, Israelrü nengdang du müthehcho.”

²⁵Hitade khingkutpü tsü ronü ajing chah mükhukeh yocho, “Ih troung, adirü!”

²⁶Jisunü lalingcho, “Azarü tsuyongnung khyo füza bete thohpehnung athsalang mah.”

²⁷“Hütsü yuje, adirü, abükyünü lalingcho; ta füzanü mii palu abüdongrü tsingthsang chahnü khatohcholü tsure.”

²⁸Hütsüde Jisunü abükyü te lalingcho, “Nüh yudsi arangcheh liba khingkurü khüdue! Nübükyünü khyünyücho roh-i tikehsohng.” Ko hütsütade tsünü atsulatpü kyangpehcho.

²⁹Jisunü hütsü pehjüpü Galil kihdi tung wücho, ko abinü akhang khüdu chah tuwü pümcho.

³⁰Sühdi amülah abi yang jingjahrü, nahtohrü jahloh-hilohrü, amongdongrü, ko füthsarü apa adrong noro Jisu jingte yohpüjücho, ko abinü arüh kyangjücho.

³¹Amongdongrünü yu chocho, jahloh-hilohrü kyangcho, jingjahrünü tsehcho, ko anahtohrü ngusohcho ngude, nyitsarüti tsü nyemüyangcho ko arühnü Israelrü Tsingrang neng secho.

³²Jisunü amonoti abi yanglang dsinü yocho, “Ihnü hiri nyitsarü nengdang thsa lümre, tunüo arüh I te nyümong asang liropü ade atsunung tusü müle. Ihnü arüh müyangtüp-pü mütsisohnyüre, tunüo arüh lang la sütünung.”

³³Monotinü abi te tsingdhengcho, “Nyitsarü hidoi yangtüpnung tsuyongnung lipilih hila khüde ngunung?”

³⁴“Nührü hümthse khüdoi liro?” Jisunü tsingdhengcho. Arühnü lalingcho, “Hümthse dhünyeh, ko nguh nümnüm azikyah.”

³⁵Hütsüpü Jisunü sühdi tsü alih la pümsohcho.

³⁶Hütsüpü abinü hümthse dhünyeh ko nguh tsü bipü; Tsingrangba khyang anengse jücho, ko chenah amonoti khyang jücho; ko amonotinü chahla jücho.

³⁷Arüh atümung kükyo tsucho. Hütsüpü monotinü arüh tsunying loh dhünyeh jeng khyübülungcho.

³⁸Khingkurü azarü mükhipü yangtsurü adhrerü dunü hajar müyü thsacho.

³⁹Hütsüpü Jisunü nyitsarüti tsisohpü, kihtang khüdu la züdupü Magadan lih lang wücho.