Read Sangtam Naga MATHI 16 Bible Online

MATHI 16 - Sangtam Naga bible

MATHI 16

¹Farisirü ko Sadukirü khürü Jisu thsatsünyo abi yang rocho ko arühnü thsayahiya khüdu ngusohngpü tsingdhengcho.

²Ta Jisunü lalingcho, “Nyüzeh rode, nührünü yorü, tsingnyü tsanung, tunüo ning mohle.

³Ko anyangnyü mütoh nührünü yorü, ‘Tsing ronunge, tunüo ning mohle ko marürahle.’ Ningchah dhengnü nührünü tsingnyü yochehre, ta hiri bekhyah nengdanglü nührünü müyochehre!

⁴Hiba shang hi khüta amünyi ko Tsingrangba mümüdhero! Nührünü I te thsayahiya khüdu nengdang tsingdhengrü ang? Müngusohnung! Nührü khyang ngusohnung thsayahiya tsü, Jona thsayahiya due” Hütsüpü abinü arüh pehjüpü tsipehcho.

⁵Khode monoti tsü kihbekhüm khüulang chihcho, arühnü atsunung lango dusü hinung nbüchücho.

⁶Jisunü arüh te yocho, “Farisirü ko Sadukirü bhüpza nengdang müzahng.”

⁷Arühbürü yola chota dikehcho, “Ihsanü tsuyongnung tu mühicho chahnü abinü hi yore.”

⁸Arühnü yoba tsü Jisunü müdhe arüh te tsingdhengcho, “Tuepü tsuyongnung tu mülicho nengdang nührü yola chotaro? Nührü yudsi hidoi aikyah-o?

⁹Ade yingcheh nührünü münyichehrü ang? Ihnü nyüh hajar münga nengdang hümthse münga chenahbasü mülümchehrü mah-o? Loh khüdoi nyingcho?

¹⁰Ko nyüh hajar müyü nengdang hümthse dhünyehsü khüta? Loh khüdoi nyingcho?

¹¹Ihnü nührü te tsuyongnung nengdang chorü mah pü khüta münyichehro? Farisirü ko Sadukirü Bhüpza nengdang nührü jangjang müzahng!”

¹²Hütsüde monoti tsünü abinü müzahsohba tsü tsang la yohba bhüpza nengdang mah ta Farisirü ko Sadukirü adoba nengdang yorepü nyichehcho.

¹³Jisu Kaisaria Filipi yangdi münyeh rode, abinü amonoti te tsingdhengcho, “Nyitsarütinü Nyitsarü Tsurü tsü süepü yoro?”

¹⁴Arühnü lalingcho. “Khürünü baptijüba Johan, khürünü Elija, ko aparünü Jeremia mahkhang azikehrü aparü khüduepü yore.”

¹⁵Ko abinü arüh te tsingdhengcho, “Khang, nührünü Ih süepü yoro?”

¹⁶Simon Peternü lalingcho, “Nüh Mesia, akang liba Tsingrangba Tsurü.”

¹⁷Jisunü lalingcho. “Johan tsurü Simon, nüh amüwa thsaang!” “Tunüo hiba yuje hi shutsa khu mah, ta ninglang liba I Unü nü khyang jücho lile.

¹⁸Hütsüeko Ihnü nü te yore, Peter: nüh lung, ko hiba lung michah Ihnü I Lithro külüpnung, ko asü nüsü khodesü mükohnung.

¹⁹Ihnü nü khyang ninglang Yanglih azihsing jünung; nühnü limih la tu rahnang hütsü ninglang rahnung, ko nühnü limih la tuturü lehchehnang hütsü ninglang sü lehchehnung.”

²⁰Hütsüde Jisunü amonoti te abi tsü Mesia epü sütesü müyonung yuzeng jücho.

²¹Hütsü shikhe tinü Jisunü amonoti te khohcheh yonung dikehcho, “Ih Jerusalem lang wübae ko azirüti, bebü ayingti, ko Yuzeng adorüti chahnü akhingchi amülah ngunung. Ih süsohnung, ta nyümong asang khanglang Ih kangcheli ronung.”

²²Peternü abi nükhupü yübünung dikehcho, “Tsingrangbanü hi yatieng, Abüdongba!” abinü yocho. “Khodesü hütsü nü chah mütikehnung!”

²³Jisunü ximüla Peter te yocho, “I tenü shehkhung, Satan! nüh I nengdang amüthikehsing khüdu lile, tunüo nü lümlong hi Tsingrangba chahnü mah, ta nyitsarü chahnü lile.”

²⁴Hütsüde Jisunü amonoti te yocho, “Khürünü I khanglang ronyükhang, ajangjangthsa rahsehng, ko palu khala dhipü Ih iirung.

²⁵Tunüo sürünü palu akang khümchonyüro hütsü changnung; ta sürünü I nengdang palu akang changnang hütsü ngunung.

²⁶Nyüh khüdunü limih atümung jingchopü apu akang changkhang tu jingchonung? Mahkhang nyitsarü khüdunü abi akang müli tu jünung?

²⁷Tunüo Nyitsarü Tsurü Au ahechi la abi riwürüti te ronung thsale, hütsütade abinü nyitsarü müipi khyang palu nguchi aichi jiyünung.

²⁸Ihnü nührü te ajüje yore, Nyitsarü Tsurü Yangthsarü kyo rocho müngudelü müsünung nührü yola khürü hila lile.”