Read Sangtam Naga MATHI 17 Bible Online

MATHI 17 - Sangtam Naga bible

MATHI 17

¹Nyümong dhüroh khanglang Jisunü abi yola Peter, Jakob ko Johan nüpü, arüh müleng azong athseng chah tuwücho.

²Arühnü dheng yade, Jisu chah amülichi rocho: aromih nyü roh-i tsingsecho, ko abi jengki aririkeh thruthoh kangcho.

³Hütsüde mono asang tsünü Elija ko Mosa nyüh Jisu te chotachi ngucho.

⁴Hütsünü Peternü Jisu te yocho, “Abüdongba, Ihsa hila liba hi khüdoi atsao! Nühnü lümkhang, Ihnü hila shükuh asang thsanung, nü nengdang khüdu, Mosa nengdang khüdu ko Elija nengdang khüdu.”

⁵Abi chota yade, nyükhi atsingse khüdunü arüh shüticho ko nyükhi la tsünü yuva khüdunü yocho, “Hiba hi Ipu amüiba Tsurü, sü chah I long kyangre, abi yocho nyieng!”

⁶Khode monoti tsünü yuva tsü yuchicho, arüh adrüchonü arüh romih alih la thsürangcho.

⁷Ko Jisunü ro arüh chah thahpo yocho, “Yamüsung, tüdrü!”

⁸Hütsüde arühnü tsungmüsu dhengcho ko Jisu chah khu hütsüla süsü müngucho.

⁹Arüh azonglangnü jürode, Jisunü arüh te yuzeng jo yocho, “Nyitsarü Tsurü asücho lanü kangchehli mürode, nührünü nguba müngucheh hi nengdang, sütesü tüyo!”

¹⁰Hütsüde monotinü Jisu te tsingdhengcho, “Tuepü Yuzeng dorütinü Elija akhu ronungepü yoro?”

¹¹Jisunü lalingcho, “Elija tsü yuje akhu ronung ko abinü lüpcho rungnümnung.

¹²Ta Ihnü nührü te yore, Elija tsü ropehko ko nyitsarünü abi müdhengchehpü abi chah arüh thsanyüchothsa bichiko. Hütsü kyo Nyitsarü Tsurüsü arühnü mütsa bichinung.”

¹³Hütsüde abinü baptijüba Johan nengdang arüh te chorepü monotinü nyichehcho.

¹⁴Khode arühnü sühdi yang thali rocho, nyüh khüdu Jisu yang ronü ajing chah mükhukehcho,

¹⁵ko yocho, “Adirü, I tsudhre te chomang! Abi füyüm kehle, ko abi khütang khingchire ko adrongpi michang la ko kih la abi khüluyohre.

¹⁶Ihnü nü monoti yanglang abi norocho ta arühnü abi mükyangjücheh.”

¹⁷Jisunü lalingcho, “Nührü yudsi müliba ko thsamehba nyitsarüti! Khüdoi chah Ih nührü te linung? Khüdoi chah Ihnü nührü te rangchonung? Azaba tsü Ih yang norung!”

¹⁸Jisunü amünyi nbü khyang tsü yuzeng jücho ko azaba chahnü tsipehcho ko hütsüde tsünü abi kyangpehcho.

¹⁹Hütsüde monotinü Jisu yang rang ro tsingdhengcho. “Ihrünü khütacho amünyi nbü tsü mü-iipehchehcho?”

²⁰“Hütsü nührü yudsi mükükyüchonüe,” Jisunü lalingcho. “Ihnü ajüje nührü te yore, nührü yudsi xehnyi tse toh-i dusü likhang, nührünü hiba akhang te yonung kohnung, ‘Hilanü hütsüla wüng!’ Ko hütsüla wünung. Nührünü lüpcho kohnung!”

²¹Ta hitarilü dangkhidangnang ko kongcho dunü iipehnung kohre.

²²Khode monoti atümung Galil la shibülungcho, Jisunü arüh te yocho, “Nyitsarü Tsurü tsü nyitsarü khehla jünung thsako,

²³arühnü abi mapsehnung; ta nyümong asang khanglang abi kangchehli ronung.” Monoti tsü dee mükünyangpehcho.

²⁴Khode Jisu ko amonoti Kapernaum lang rocho, amübükuh müthsüh dhrirütinü Peter te ro yocho, “Nührü adobanü amübükuh amüthsüh jüro müjüro?”

²⁵“Jüre,” Peternü lalingcho. Khode Peter kuhla tsü züducho, Jisunü akhu chota yocho, “Simon, nü alümcho tuo? Hiba limih yangthsarü khyang amüthsüh sünü jüro? Shutsakhungrünü a mahkhang yangpirütinüo?”

²⁶“Yangpirütinü.” Peternü lalingcho. “Khang tsale,” Jisunü lalingcho. “Hütsü adüzü shutsakhungrünülü müjübae.

²⁷Ta Ihsanü hiri nyitsarüti mümüthikehsohnyüre. Hütsüeko kihdi lang tsü wüng ko nguh xohsing khüdu tsayohchüng. Ko akhudi xohba nguh tsü tphachehng, ko abe la shekel khüdu nührü nengdang amübükuh müthsüh jüxah zehnung. Hütsü khyo arüh khyang Ihsa kuh müthsüh jüng.”