Read Sangtam Naga MATHI 2 Bible Online

MATHI 2 - Sangtam Naga bible

MATHI 2

¹Yangthsaba Herod chichah, Judea lih Bethlehem la Jisu surocho. Tunyah mülipü, nyüchüro langnü asithsamüdherü khürü Jerusalem lang ro

²tsingdhengcho, “Jihudarü michah yangthsanungba akhunga tsü khüde suro liro? Ihrünü abi püti nyüchürolang chüro nguko, ko ihrü abi mübünung rore.”

³Hi yuchi Yangthsaba Herod ko Jerusalem la lirü atümung dee müsi rohchocho.

⁴Abinü bebü ayingti ko Yuzeng adorüti atümung dsinü tsingdhengcho. “Khrista tsü khüde suronung?”

⁵“Judea lih la Bethlehem yangdi la,” arühnü lalingcho, Tunüo azikehrünü hiroh-i thrah lile:

⁶“‘Judea lih la liba Bethlehem, nüh Judea lih la yangditi yola khütakhi azauba mah; nü chahnü langnürü khüdu chüronung, sünü I nyitsarü Israelrü xükümnung.’ ”

⁷Achotsü Herodnü nyüchürolangnü axodhengrü tsü rang dsiro püti chürocho bekhyah tsü tsitsacho.

⁸Hütsüpü abinü arüh Bethlehem lang hiroh-i yopü müthehcho: “wüng ko azarü tsü dee müzah yangching, ko khode nührünü abi ngunang, Ihnüsü wü abi mübünung I tesü müdhesong.”

⁹Hütsüpü arüh tsicho ko arüh lang la arühnü nyüchürolang nguba püti abükyü tsü ngucho. Khode arühnü püti tsü ngucho arüh dee künyangcho, ko azarü liba kuh tsü müchide arüh bekhu wüdu wücho.

¹¹Arühnü kuhla tsü züducho, ko khode arühnü azarü tsü atpa Mary te ngucho, arühnü mükhukeh abi mübücho. Arühnü hon, müchiji, ko axümlichi khyücheh jiyücho.

¹²Hütsüpü arühnü palu lihlang lang pa langnü thalicho, tunüo Herod yang müthalinung Tsingrangbanü melang arüh iiticho.

¹³Arüh tsipü Abüdongba riwürü khüdu Josef melang chüro yocho, “Herodnü azarü tsü mapsehnung yangchile. Hütsüeko shemüsung, azarü e atpa nyüh nüng, ko Ijip lang tsieng, ko Ihnü nü te tsinung müyode hütsüla lieng.”

¹⁴Josef jesucho, ko azarü e atpa nyüh nüpü Ijip lang ama lanü tsicho,

¹⁵ko hütsüla Herod müsü yingcheh licho. Hi Abüdongbanü, “Ihnü I tsurü Ijip lih lanü dsichehcho,” ko azikehrü khu chocho tikehnung nengdang nguchicho.

¹⁶Khode Herodnü nyüchürolangnü axodhengrü tsünü abi rahmütsakopü müdhecho, abi dee rihlong chürocho. Abinü Bethlehem ko amükang adhrezarüti kang anyüh ko apohki atümung mapsehnung yuzeng jücho, hi axodhengrü chahnü abinü nyisiba püti chürocho bekhyah müchehpü nguchicho.

¹⁷Hiroh-i azikehrü Jeremianü chocho yuje tikehcho:

¹⁸“Rama la yuva khüdu yuchire, dee khaa tracho yuva. Rachelnü atsurüti nengdang trare; abükyünü kihchocho thsonglire, tunüo arüh sopehko.”

¹⁹Herod süpü, Ijip la Abüdongba riwürü khüdu Josef te melang chüronü

²⁰yocho, “Shemüsung, azarü e atpa nyüh nüng, ko Israel lih lang thali wüng, tunüo sürünü azaba akang yangchicho arüh tsü süko.”

²¹Hütsünü Josef shemüsucho ko azarü e atpa nyüh nüpü, Israel lih lang thalicho.

²²Ta khode Josefnü Judea la Herod müli atsurü Arkelasnü yangthsa thsalepü yuchicho, abinü hütsü lang wünung drücho. Melang abi te alaa tsechichonü abinü Galil lih lang wücho,

²³ko Nazaret yangdi la licho. Hütsünü azikehrünü chochoba tikehsohcho: “Abi te Nazarene pü dsinung.”