Read Sangtam Naga MATHI 20 Bible Online

MATHI 20 - Sangtam Naga bible

MATHI 20

¹“Ninglang Yanglih tsü hi kyole. Shikhe khüdu nyüh khüdunü abi shükusiluh la nguchisohnung nyükheh mülihnung anyangnyü mütoh wücho.

²Abinü nyümong la nyükhehshi denari khüdunü chotapü, abi shükusiluh la nguchinung arüh müthehcho.

³Dükuh bekhyah la shithsachah abi thali wücho ko hütsüla nyitsarü khürü tu münguchipü ya ngunü,

⁴abinü arüh te yocho, ‘Nührüsü wüng ko shükusiluh la tsü nguching, ko Ihnü nührü khyang nyükheh ngang aleng jünung.’

⁵Achotsü arühnü wücho. Hütsüpü dhüre-anyüh bekhyah la ko asang bekhyah lasü hütsü roh-i du tsü abinü nguchicho.

⁶Münga bekhyah koh khode abi shithsachah wücho, ko aparü khürü hütsüla ya ngunü abinü arüh te yocho, ‘Tuepü nührü hila tu münguchipü mükhyang yüchangro?’

⁷Arühnü lalingcho, ‘Sünüsü ihrü mümüli,’ abinü arüh te yocho. ‘Khang, nührüsü wüng ko shükusiluh la tsü nguching.’

⁸“Nyüzeh rode, abüdongba tsünü adhengyehba te yocho, ‘Shehsherü tsü dsing, ko akaba chahnü dikehpü akhu müliba chii, arüh nyükheh ngang jüng.’

⁹Sürü münga bekhyah lanü dikeh nguchicho arüh müipi khyang thsi denari khüdu-khüdu jücho.

¹⁰Hütsüpü khode akhu mülihbarü khyang jünung dikehcho, arüh alaa ngunungepü arühnü lümcho; ta arüh khyangsü thsi denari khüdu-khüdu du jücho.

¹¹Arühnü arüh thsi tsü khyüchopü abüdongrü nyüm jümjümmüsucho.

¹²Arühnü yocho. ‘Aka mülihba nyitsarü hiri rehtseh khüdu du nguchiko. Ta ihrü mükhyang nyüthsa la nguchisohpü nühnü arüh khyangsü ihrü te sako jüre!’

¹³“‘Nyieng, shangrü,’ abüdongba tsünü arüh nyüh khüdu te lalingcho, ‘Ihnü nührü mükhürahyohchü. Nühnü nyümong la thsi khüdu ngang nguchinung chotacho mado.

¹⁴Ade nü thsi khyüng ko kuh lang wüng. Ihnü aka mülihba hi khyang nü khyang jücho doi jünyüre.

¹⁵Ipu thsi Ihnü bichinyücho bichinung Ih athsalang mahrü do? Mahkhang Ihnü bichicho nü nah thsarü mah-o?’ ”

¹⁶Ko Jisunü zika yocho, “Hiroh-i akarü akhunung, ko akhurü akanung.”

¹⁷Jisu Jerusalem lang tuwüde, arüh atsehchah abinü amono dhüre-anyüh tsü nükhu rang yocho.

¹⁸“Nyieng, Ihsa Jerusalem lang tuwüre, hütsüla Nyitsarü Tsurü tsü bebü ayingti ko Yuzeng adorüti khehla khakhuchüjünung. Arühnü abi süsohnung mülangjünung

¹⁹hütsüpü yangpirü khehla khakhuchüjo arühnü abi müthsamünyünung, xüpnung ko hamkehnung; ta nyümong asang khanglang abi kangchehli ronung.”

²⁰Hütsüde Zebedi nitpü atsudhre anyüh nüpü Jisu yang ro ajingte mükhukehnü lango khyünyo abi te tsingdhengcho.

²¹“Nüh tu khünyüro?” Jisunü abükyü te tsingdhengcho. Abükyünü lalingcho, “Nüh Yangthsarü kangde I tsudhre nyüh hi khüdu nü tsalang ko khüdu nü fülilang pümsohnung I te nyengchoung.”

²²“Nührünü tu chingro hütsü nührünü mümüdhe.” Jisunü atsunyü te tsü lalingcho. “Ihnü yongnung liba chongcha shing tsü nührünü yongchehnung mah-o?” “Ihrünü kohnung.” arühnü lalingcho.

²³“Nührünü ajüje I shing lanü yongchehnung.” Jisunü arüh te yocho, “ta I tsalang ko fülilang sürü pümnung hütsü throchehnung I chah tase müle. Hiri pümji tsü I Unü sürü nengdang rungnümjücho arüh yo lile.”

²⁴Khode aparü mono dhüre tsünü hi yuchicho, arühnü anyüh jüninyü te zichürocho.

²⁵Hütsünü Jisunü arüh atümung dsibülungpü yocho, “Yangthsarüti ko langnürüti tsü müyudsirü michah tase atümung lilepü nührünü müdhele.

²⁶Ta nührü yolalü hütsüta mah, sünü adiuba kangnyüro, abi atümung dikehrü kangbae.

²⁷Sünü amichahba kangnyüro, abi nührü yurü kangbae.

²⁸Nyitsarü Tsurü mii dikehsohnung mah, ta dikehnung ko nyitsarü adrong rochehnung nengdang abi akang jünung rocho.”

²⁹Jisu ko amonoti Jeriko pehjüde, sühdi amülah abi khanglang iiwücho.

³⁰Lang te pümcho anatohrü nyüh anyüh Jisu lahkhu tsicho yuchipü arühnü züdecho, “David Tsurü, Ihrü te chomang!”

³¹Sühdi tsünü arüh te sah tüthsa pü yübücho. Ta arühnü khüsha züde yocho, “David Tsurü! Ihrü te chomang!”

³²Jisunü nyehlipü arüh te tsingdhengcho, “Nührü nengdang I khyang tu nguchisohnyüro?”

³³Arühnü lalingcho, “Adirü, Ihrü nah khangthrusohnyüre!”

³⁴Jisunü arüh chomang lümcho ko arüh nahtse la thahpücho; ko hütsüde tsünü arühnü ngunung kohcho, ko arühnü abi khanglang iiwücho.