Read Sangtam Naga MATHI 21 Bible Online

MATHI 21 - Sangtam Naga bible

MATHI 21

¹Jisu ko amonoti Jerusalem chinyo rode, arühnü olive zong la Betfage lang rocho. Jisunü mono anyüh tsehleh müthehchünü

²yocho: “Nührü bekhu liba yang la tsü züdung, ko nührünü Gadu khüdu azaa yola xohchingpo ngunung. Arüh lehcheh I yanglang norung.

³Ko khürünü tunang yokhang, abi te young, ‘Abüdongbanü thsütahre;’ ko hütsüde tsünü abinü arüh müthehchünung.”

⁴Aronung nengdang azikehrünü tu chocho hütsü tikehre:

⁵“Zion yangdi te young, Dheng, nü Yangthsaba nüh yang tsehle! Abi alonglüm ko Gadu za khüdu chah pümpü.”

⁶Hütsüpü monoti tsü wücho ko Jisunü arüh te tu nguchinung yocho hütsü roh-i nguchicho:

⁷arühnü Gadu ko azaa tsü norocho, ko arüh shü arüh chah khyangjücho, ko Jisu küdu pümcho.

⁸Sühdi la tsü adrongnü arüh shü lang la khyangjücho ko khürünü rangva khung lang la khyangjücho.

⁹Jisu belang ko khanglang tsehba sühdinü züdecho, “David Tsurü te Hosana thsaang! Abüdongba nengla sü roro abi müwajüng! Amichahba la Hosana thsaang!”

¹⁰Khode Jisu Jerusalem la züducho, Yangdishünü duduyayacho. “Hi süo?” Nyitsarütinü tsingdhengcho.

¹¹“Sühdi tsünü hiba hi Galil la Nazaret-rü, azikehrü Jisue.” pü lalingcho.

¹²Jisunü amübükuh la züdu alihrü ko airü atümung iipehcho. Thsi mülihrü tsingthsang ko kuh-mümüdhrü irü pümji mükhapehjücho,

¹³ko arüh te yocho. “Amüsa yu la Tsingrangbanü yore, ‘I amübükuh te dangkhidangnang kuh pü dsinung.’ Ta hütsü nührünü aführü kumünyiji kangsohre!”

¹⁴Nahtohrü ko jahloh-hilohrü abi yang amübükuh la rocho ko abinü arüh kyangjücho.

¹⁵Bebü ayingti ko Yuzeng adorütinü khode abinü anyemüyangnung nguchicho ngucho, ko amübükuh la azarütinü “David Tsurü Neng seing!” pü züdecho ngu zichürocho.

¹⁶Hütsünü arühnü Jisu te tsingdhengcho, “Arühnü yoba tsü nühnü müyuchio?” “Ihnü yuchile,” Jisunü lalingcho. “Nührünü Amüsa yu hi khodesü mükhidheng ang? ‘Nührünü azarü ko akhungarünü nengse ajeng jüsohnung nüchehko.’ ”

¹⁷Jisunü arüh pehjüpü Yangdi la tsünü Bethany lang wücho ko hütsüla yüpcho.

¹⁸Nyangnyü khüu abi Yangdi lang thali rode, Jisu yangcho.

¹⁹Abinü lang te ngurüsidong khüdu ngunü hütsü yang wücho, ta hütsü chah ava chah khu tusü müngucho. Hütsünü abinü singdong te tsü yocho, “Nü chahnü khodesü asih tüsisoh!” Hütsüde tsünü ngurüsidong tsü tohsehpehcho.

²⁰Monotinü hütsü ngu nyemüyang yocho, “Ngurüsidong tsü khodedenü khüta tohsehcho?”

²¹Jisunü lalingcho, “Ihnü nührü te ajüje yore, nührünü mütütohnyünyehpü yudsikhang, Ihnü hiba ngurüsidong chah nguchicho kyo nührünüsü nguchichehnung. Hütsü du mah, ta nührünü hiba akhang te, ‘Shemüsung ko Kihdi la tsü longyohng’ pü yocho mii tikehnung.

²²Nührünü yudsikhang, tuturü dangkhidangnang tsingdhengnang nührünü ngunung.”

²³Jisunü thali Amübükuh lang rocho; ko abinü do yode, Bebü ayingti ko azibarüti abi yang ronü tsingdhengcho, “Hiri nguchinung nüh tu tase liro? Sünü nü khyang hiba tase jücho?”

²⁴Jisunü arüh te lalingcho, “Ihnü nührü te atsingdhengba khüdu du tsingdhengnung, ko nührünü lalingchehkhang, hiri nguchinung Ih tu tase lirünang Ihnü nührü te yonung.

²⁵Johan Baptijüba tase tsü khüdenü rocho: Tsingrangba chahnü a nyitsarü chahnüo?” Arühnü arühbürü yola rehtamüsucho, “Ihsanü tu yonung? Ihsanü ‘Tsingrangba chahnüepü yokhang,’ abinü yonung, ‘khang tuepü nührünü Johan chah müyudsicho?’

²⁶Ta Ihsanü, ‘Nyitsarü chahnüe khang,’ nyitsarünü donung hütsü drüre, tunüo nyitsarü atümungnü Johan tsü azikehrüepü müdhecho.”

²⁷Achotsü arühnü Jisu te lalingcho, “Ihrünü mümüdhe.” Ko abinü arüh te yocho, “Khang, Ihnüsü tu tasenü hiri nguchiro hütsü nührü te müyonung.”

²⁸“Ade, nührünü tu lümro? Shikhe khüdu nyüh khüdu atsurü anyüh licho. Abinü aziba te wü yocho, ‘Itso, wüng ko chünye shükusiluh la yuthsahng.’

²⁹‘Ih müwünung,’ abinü lalingcho, ta akhanglang alasih thsamüla wücho.

³⁰Hütsüpü au tsünü atsurü akhüuba tesü wü hütsü roh-i yocho. ‘Ih wünung,’ adirü, ta abinü müwücho.

³¹Anyüh yola khüibanü aunü lümcho nguchicho?” “Aziba tsünü,” arühnü lalingcho. Hütsünü Jisunü arüh te yocho, “Ihnü nührü te yore: Alihmüthsü dhrirü ko nahtrahnaxenglarü nührü te akhu Tsingrangba yanglih la züdure.

³²Tunüo Baptijüba Johan-nü nührü yang yuje lang ngusoh rocho, ko nührünü abi chah müyudsicho; ta alihmüthsü dhrirü ko nahtranaxenglarünü abi chah yudsicho. Nührünü hütsü nguh nye, akhanglang dusü lasih thsamüla abi chah müyudsicho.

³³“Jisunü yocho, Yukitaba apa khüdu nyieng,” “Shikhe khüdu alih abüdongrü khüdunü shükusiluh khüdu thsacho, ko hütsü mükang tbü tbücho, anyehnung akhi jucho ko roshengvi khüdu thsacho. Hütsüpü anguchirü khyang luh tsü dhengyeh pehjüpü shitsehnung wücho.

³⁴Khode shükusih laanung akyang chihcho, abinü anguchirü yang abi nohlüm chingnung akulirüti müthehcho.

³⁵Anguchirü tsünü kulirüti tsü rangcho, khüdu lahcho, khüdu mapsehcho ko aparü tsü lungnü kengsehcho.

³⁶Anyüpiu abinü akhudi tenü adrongu kulirüti müthehcho, ko arühnü hütsü roh-i du tsü arüh chah nguchicho.

³⁷Achangkathsa abinü atsudhre arüh yang müthehcho. Abinü yocho, arühnü ‘Ajüje I tsudhre jengrenglü drünung.’

³⁸Ta khode arühnü atsudhre tsü ngucho, arühbürü chotacho, ‘Hiba hi abüdongba tsurüe. Rung, Ihsanü abi mapsehnung ko Ihsanü abi kuthsi khyünung!’

³⁹Achotsü arühnü abi rangpü shükusiluh lanü tphahcheh abi mapsehcho.

⁴⁰“Khode luh abüdongba tsü ronang, abinü hiri anguchirü chah tu nguchinung?” Jisunü tsingdhengcho.

⁴¹Arühnü lalingcho, “Hütsüri amükhyu nyitsarüti tsü abinü mapsehriri, ko shükusiluh tsü sürünü akyang la abi nohlüm jünung arüh khyang thsasohnung.”

⁴²Jisunü arüh te yocho, “Amüsa yunü tu yoro nührünü khodesü mükhidhengcho ang? ‘Kuthsarütinü müdhsütahba lung tsü apüm tenü ayingba kangcho. Hiba hi Abüdongbanü nguchicho; Hi Ihsa nahte khütoh-i anyemüyangnung!’

⁴³“Hütsüeko Ihnü nührü te yore,” “Nührü chahnü Tsingrangba Yanglih tsü hitsinung ko asih sihsohba nyitsarüti khyang jünung.”

⁴⁴Hiba lung chah sü longchonang abi lahzangzangnung; ko lung tsü khürü chah longkehkhang, abi asongsong kang kengnahnung.

⁴⁵Bebü ayingti ko Farisirütinü abi yu kitacho yuchinü, abinü arüh nengdang chorepü arühnü nyichehcho,

⁴⁶hütsünü arühnü abi rangnung müküpcho. Ta arühnü sühdi tsü drücho, tunüo arühnü abi azikehrüepü müdhecho.