Read Sangtam Naga MATHI 23 Bible Online

MATHI 23 - Sangtam Naga bible

MATHI 23

¹Hütsüde Jisunü sühdi te ko amonoti te yocho.

²“Yuzeng dorüti ko Farisirü tsü Mosa yuzeng thsamülanung arüh khyang suh jo lile.

³Hütsüeko arühnü tu yoro hütsü khyücho bichieng; ta arüh tüithsa, tunüo arühnü docho roh-i münguchire.

⁴Arühnü bürü khangtung chah mükoh hinungthsa khe amüling dhikehjüre, ta arühnülü hütsüri tronung müyungza khüdusü mümühachire.

⁵Arüh nguchi atümung nyitsarünü ngusohnung du nguchire. Arüh kikhang la ko bipüm la Amüsa yuyungti shengsheng thrahkeh biba tsü dheng, ko arüh tsü khütoh-inang dheng! Ko arüh shü la khütoh-i mükingkehchonang dheng.

⁶Arühnü thsüti-thsünang la ko Sinagog la pümji atsauba du khyünyüre.

⁷Arühnü yanglong la arüh khyang jengreng dro salüm sohnung mürure ko ‘Adorü’ pü dsisohnyüre.

⁸Nührü te adorü pü mütsisohbae, tunüo nührü atümung ajünirü due ko adorülü khüdu du lile.

⁹Ko hiba limih la sütesü nührünü ‘Uwa’ pü tütsi, tunüo nührü Au khüdu du tsü ninglang lile.

¹⁰Mahkhang nührü te ‘Langnürü’ pü müdsisohbae, tunüo nührü langnürü khüdu du tsü Mesia tsü-e.

¹¹Nührü yola adiuba khüdu tsü nührü dikehrü thsabae.

¹²Sünü abürü jangjang mülahnang abi azikyah kangnung; ko sünü abürü jangjang azikyah kangnang abi mülahsohnung.

¹³“Nührü ahohah, yuzeng adorü ko Farisirüti! Nührü akhürahrüti! Nührünü aparü khyang ninglang Yanglih wünung trahtri tohtijüre, ko nührübürüsü müzüdu, ko azüdunyürüsü müzüdusohre!

¹⁴Nührü ahohah, yuzeng adorüti ko Farisirüti! Nührü akhürahrüti! Atangnung anyahli dangkhidangnangre, ta nührünü chomirüti kuthsilü kengchore.

¹⁵“Nührü ahohah, yuzeng adorüti ko Farisirüti! Nührünü nyüh khüdu lasih thsamülasohnung nengdang kihdi ko limih atümung bong rachire; ko khode abi noronang, nührünü abi tsü nührübürü tenü anyüpilinü münyirü kangsohre!

¹⁶“Nührü ahohah, nahtoh langnürüti! ‘Khürünü Amübükuhnü yuchümkhang, abi yuchüm tsünü abi rah müle; ta Amübükuh la liba hon tsünü yuchümkhang, abi rah lilepü nührünü dore.’

¹⁷Amüsithsa nahtohrüti! Khüiba alaa ayingbao? Hon tsü a mahkhang hon müsa kangsohba amübükuh tsü-o?

¹⁸Nührünü hitasü yore, ‘Khürünü bholunü yuchümkhang, abi yuchüm tsünü abi rah müle; ta bholu chah amübü tsünü yuchümkhang abi rah lile.’

¹⁹Khüiba alaa ayingbao? Nührü nahtohrale! Amübü tsü a mahkhang amübü müsa kangsohba bholu tsü o?

²⁰Hütsünü, khode nyüh khüdunü bholunü yuchümnang, abinü hütsünü ko hütsü chah amübü atümungnü yuchümre;

²¹ko khode amübükuhnü yuchümnang, abinü hütsünü ko Tsingrangba, sü hütsüla liro, abi nengla yuchümre:

²²ko khode khürünü ningnü yuchümnang abinü Tsingrangba pümji ko hütsü chah sü pümro abi nengla yuchümre.

²³“Nührü ahohah, yuzeng adorüti ko Farisirüti! Nührü akhürahrüti! Nührünü axümlichi singvarova, thungwi, jira ko tonia hiri lanü mii Tsingrangba khyang dhüre nohlüm jüre, ta atungte Yuzeng adoba adüzünü yuje, yanglilüm ko yuje choba thrüchahchüpehre. Apa tsüsü müthrüchahchüpehpü hirisü bichibae.

²⁴Anatoh langnürüti! Nührünü sümüza thsengchehpehre, ta ut lü münyüyohchüre!

²⁵“Nührü ahohah, yuzeng adorüti ko Farisirüti! ‘Nührü akhürahrüti’ Nührünü nührü shing ko tbhü amichah thsüthohre, ta ayonglanglü shükhatoh ko palu nengdang du lümbanü jeng lile.

²⁶Anatoh Farisirü! Shing ayonglang tsü akhu thsüthohng, hütsükhang amichah mii müsanung!

²⁷“Nührü ahohah, yuzeng adorüti ko Farisirüti! Nührü akhürahrüti! Nührü athrunü münohcho kong kyole, khüiba amilang adhengnung atsah atsa ta ayonglang asürü rühlungrü ko asühcho menü jeng lile.

²⁸Hütsü roh-i amichahlü atümung te nührünü tsarü roh-i, ta ayonglanglü akhürah ko amünyinü jeng lile.

²⁹“Nührü ahohah, yuzeng adorüti ko Farisirüti! Nührü akhürahrüti! Nührünü azikehrüti kong adhengtang ko amüsarüti kong seyah münohre.

³⁰ko nührü jümürüti chichah nührü lire lang, arühnü nguchiba ko azikehrüti mapsehcho roh-i münguchiba thsakopü nührünü yore.

³¹Hütsünü nührübürü jangjangthsa nührü azikehrü mapsehrü tsurütiepü yuzi jüre!

³²Khang, nührü jümürütinü tu dikeh yohpüjücho hütsü thümjüng!

³³Nührü mürüti ko mürü tsurüti! Mümehmi züdunung mülangjücho lanü tsiphunung nührünü khüta longdiro?

³⁴Hütsüeko Ihnü nührü te yore, Ihnü nührü yanglang azikehrüti, müdhemüthehrü ko adorüti müthehnung; nührünü arüh khürü mapsehnung, aparü hamkehnung ko khürü Sinagog lanü xüpnah yangdi khüdu lanü khüdu chii tsehchinung.

³⁵Achangkathsa, achomükeh Abel mapsehcho chahnü dikehpü Tsingrangba kuh ko bholu nyüh kahla nührünü mapsehba Berakia tsurü Zekaria chii achomükeh nyitsarüti mapsehchoba akhingchi apüm nührü chah küdunung.

³⁶Ihnü nührü te yutsatsa yonung; hiri atümung mapsehcho akhingchi tsü hiba shang chah küdunung!

³⁷“Jerusalem, Jerusalem! Azikehrüti mapsehba Tsingrangbanü nührü yang müthehcho yusi hirüti kengsehba. Hünanü abükyü za aqo pohki nübülungcho roh-i, Ihnü khüdopi nührü atümung shüptinyücho, ta nührünü I khyang müshüptisoh!

³⁸Hütsüeko nührü Amübükuh thrüchahchüpehnung ko adeng lisohnung.

³⁹Ihnü nührü te yore. ‘Abüdongba nengla sü rorüh abi müwajüng! pü müyode, ade tinü nührünü Ih thali müngunung.’ ”