Read Sangtam Naga MATHI 25 Bible Online

MATHI 25 - Sangtam Naga bible

MATHI 25

¹“Hütsü shikhe la ninglang Yanglih tsü hi kyo linung, bekhyah khüdu lazarü nyüh dhüre arüh dsi biko kukangba langmütohnung wücho.

²Arüh münga amüsithsa ko aparü münga tsü lümzehrü thsacho.

³Amüsithsarü tsü arüh dsi bicho ta michangkih alaa mühicho,

⁴ta lümzehrüti tsü arüh dsi nengdang michangkih abong jeng hicho.

⁵kukangbong tsü münu mürocho, hütsünü lazarüti tsü nyichi yüpsehpecho.

⁶“Yürüptülungla züdecho, ‘kukangbong tsü hila lile! ronü abi mütohng!’

⁷Lazarü dhüre tsü surocho ko palu dsi tahkehcho.

⁸Hütsüde amüsithsarü tsünü lümzehrü te yocho, ‘Nührü dsikih lanü ihrü khyangsü aza khülo, tunüo ihrü dsi mehle.’

⁹‘Alümzehrüti tsünü lalingcho, nührü ko ihrü nengdang kükyo müzeh. Airü yang wüng ko nührübürü nengdang lihng.’

¹⁰Hütsünü amüsithsa lazarüti tsü dsikih lihnung wücho, ko arüh tsipü lide, kukangbong tsü ro chihcho. Rungnüm liba lazarü münga tsü abi yola kukangba thsüti lang tsü züducho, ko kukhang tsü khangticho.

¹¹“Akhanglang aparü lazarüti tsüsü ro chihcho. ‘Adirü, adirü! Ihrü nüyohng!’ arühnü kihchicho.

¹²Ta kukangbong tsünü lalingcho. Ihnü nührü mümüdhe.”

¹³Ko Jisunü zika yocho, “Hütsüeko müzah lieng, tunüo nührünü nyümong tsü mahkhang bekhyah tsü mümüdhe.

¹⁴“Hütsü bekhyah la ninglang Yanglih tsü hi kyo linung. Shikhe khüdu nyüh khüdu shitseh wünungthsa kangcho, abinü akulirüti dsiro akuhthsi arüh khyang müshonung jücho.

¹⁵Abinü arüh müipi khyang palunü kohnung aichi jücho: khüdu khyang hon thsi hajar münga, khüdu khyang hajar anyüh ko aparü khüdu khyang hajar khüdu. Hütsüpü abi shitseh tsicho.

¹⁶Kulirü sünü thsi hajar münga khyüchocho abinü dhsüthsa wücho ko abinü shithsabhülehnü thsi apa hajar münga jingchocho.

¹⁷Hiroh-i tsü kulirü sünü thsi hajar anyüh khyüchocho abinü apa hajar anyüh jingchocho.

¹⁸Ta kulirü sünü thsi hajar khüdu khyüchocho abinü wünü alih jupü abi abüdongba thsi tsü rangpücho.

¹⁹“Shikhe anyahli lipü hütsüri kulirüti abüdongba tsü thali rocho ko arüh te thsi hümtacho.

²⁰Kulirü sünü thsi hajar münga khyüchocho abi zürocho ko apa hajar münga tsü jücho. Abinü yocho, Adirü ‘Nühnü I khyang thsi hajar münga jücho, Dheng! Hila Ihnü jingchocho apa hajar münga lile.’

²¹Abüdongbanü yocho, ‘Mahso, atsa ko longlangchehba kulirü! Nüh kuthsi azikyah müshonung la longlangchehcho, hütsünü Ihnü nüh kuthsi amülah müshonung nyümkehjünung. Nüh Abüdongba akünyang la zürung!’

²²“Hütsüpü kulirü sü khyang thsi hajar anyüh jücho abi züronü yocho, ‘Nühnü I khyang thsi hajar anyüh jücho, adirü. Dheng! hila Ihnü jingchocho apa hajar anyüh lile.’

²³Abüdongbanü yocho. ‘Mahso, nüh atsa ko longlangchehba kulirü! Kuthsi azikyah müshonung la longlangchehcho, hütsünü Ihnü nüh kuthsi amülah müshonung nyümkehjünung. Nüh Abüdongba akünyang la zürung!’

²⁴“Hütsüpü kulirü sünü thsi hajar khüdu khyüchocho abi züronü yocho, ‘Adirü, Nüh atürütseh nyitsarüepü Ihnü müdhele; nühnü müchicho lanü maxare, ko nühnü müshuhcho lanü yangyore.

²⁵Ihnü drücho tsü wünü nü thsi tsü alih la rangpüjüchoe. Dheng! hila nüpu thsi adongdong lile.’

²⁶“Ta abi abüdongbanü yocho, ‘Nüh amükhyu ko amüngang kulirü! Ihnü müchicho lanü xare, ko müshuhcho lanü yangyorepü nühnü müdhecho ang?

²⁷Khang, nühnü I thsi tsü thsikuh la yohpüba thsako, arelang Ih thali rode I thsi tsü ajeyoh zehpü apüm nguliba thsako.

²⁸Ade, abi kheh lanü thsi tsü khyüng ko sü thsi hajar dhüre liro abi khyang jüng.

²⁹Tunüo sü lango liro, alaa mii jünung, ko abi thangchi linung; ta sü müliro, abi azikyah liba tsüsü abi chahnü hitsinung.

³⁰Ko akhyüchah müliba kulirü tsü dongkhu amarürah la tsü tphahchehchüpehng; ko hütsüla abi tranung ko aha mütrehkehtanung.’

³¹“Khode Nyitsarü Tsurü Yangthsarü kyo abi yola riwürü atümung zeh ronang, abi apu ahechi Yangthsaba pümji la pümnung,

³²ko yucho atümung abi jingte nübülungnung. Hütsüde San nyahrünü miza lanü san changshocho kyo abinü arüh mülung anyüh kang changsahnung.

³³Abinü amüsarüti abi tsalang ko aparü abi fülilang yohpünung.

³⁴Hütsüde Yangthsabanü abi tsalang liba nyitsarüti te yonung, ‘Rung, I Unü müwajürüti! Rung, ko limih thridinü nührü nengdang rungnüm liba Yanglih tsü khyüng.

³⁵Ih yangseh lide nührünü Ih yangtüpcho, Ih xoseh lide nührünü I khyang tihcho; Ih shirüthsa lide nührünü Ih nüyohcho,

³⁶Ih tbhüdeng lide nührünü Ih müpisohcho; Ih füthsa lide nührünü Ih xodhengcho. Akhangti la lide nührünü Ih xodhengcho.’

³⁷“Amüsarütinü hütsüde abi te lalingnung, ‘Abüdongba, khode nüh yangseh ngu Ihrünü yangtüpcho, mahkhang nüh xoseh ngu tihcho?

³⁸Khode nüh shirüthsa ngu Ihrünü nüyohcho, mahkhang tbhüdeng ngu müpisohcho?

³⁹Khode nüh füthsa mahkhang akhangti kuhla ngu Ihrünü xodhengcho?’

⁴⁰Yangthsabanü lalingnung, ‘Ihnü nührü te yore, khodederü nührünü I jünirü azauba khüdu te nguchicho, hütsü I khyang nguchiko!’

⁴¹“Hütsüpü abi fülilang lirüti te yonung, ‘Nührü Tsingrangba chokehchola küdurüti, I tenü shehkhung! Motsing ko abi riwürüti nengdang achangka müliba michang rungnüm licho la tsü züdung!

⁴²Ih yangseh licho ta nührünü Ih müyangdüp, xoseh licho ta nührünü I khyang müdi,

⁴³Ih shirüthsa licho ta nührünü Ih münüyoh, tbhüdeng licho ta nührünü Ih mümüpisoh; Ih füthsa ko akhangti la licho ta nührünü Ih müxodheng.’

⁴⁴“Hütsütade arühnü abi te lalingnung, ‘Abüdongba, khode Ihrünü nüh yangseh mahkhang xoseh mahkhang shirüthsa mahkhang tbhüdeng mahkhang füthsa, mahkhang akhangti la lide nüh ngunü mütrocho?’

⁴⁵Yangthsabanü lalingnung, ‘Ihnü nührü te yore, khodederü nührünü hiri azauba khüdu tronung thsonglicho hütsü nührünü Ih tronung thsongliko.’

⁴⁶Hütsütade hiri tsü müchangkaba akhingchi la züdusohnung, ta amüsarütilü müchangkaba akang langi wünung.”