Read Sangtam Naga MATHI 27 Bible Online

MATHI 27 - Sangtam Naga bible

MATHI 27

¹Nyajang bebü ayingti ko azibarüti atümungnü Jisu süsohnung arah külüpcho.

²Arühnü ixilihnü abi xohpü nowü, Roman Governor Pilat khyang khakhuchüjücho.

³Kihyochüjübong Judasnü Jisu tsü mülang jüko pü yuchinü, abi lasih thsamülali thsi taripi sangre tsü hiwü bebü ayingti ko azibarüti khyang jücho.

⁴Abinü yocho. “Mülang müliba nyüh khüdu süsohnung kihyochonü Ihnü amünyi shitpahko!” “Arühnü lalingcho, hütsü ihrü nguchi mah. Hütsü nü jangjang thsaang!”

⁵Judasnü thsi tsü Amübükuh la tsü tsayohchüjüpü tsipecho; hütsüpü abi wünü ajangjangthsa thsingsehcho.

⁶Bebü ayingtinü thsi tsü thro hironü yocho, “Hiba hi ashüh thsie, ko hi amübü thsibong la zahkehnung Ihsa Yuzengnü mümüla.”

⁷Achotsü arühnü kihtapü thsi tsünü shirü kongyo thsanung, fühtangrü lih lihcho.

⁸Hütsünü hütsüba lih te chünye yingcheh “Ashüh lih” pü dsire.

⁹“Hütsüta Jeremia azikehbanü choyohcho yuje tikehcho: Israelrünü abi khyang jünung nyengchoba thsi taripi sangre tsü khyücho.

¹⁰Ko Abüdongbanü I te mülacho roh-i, arühnü hütsü fühtangrü lih ngang jücho.”

¹¹Jisu te yu tsingdhengba Roman Governor jingte tsü abi yacho. Abinü tsingdhengcho, “Jihudarü yangthsaba tsü nüh mah-o?” Jisunü lalingcho, “Nüpunü yore.”

¹²Bebü ayingti ko azibarütinü abi mülang jünye abinü tusü mülalingcho.

¹³Hütsünü Pilatnü abi te yocho, “Arühnü nüh mülangjüba hidoi hi nühnü müyuchirü do?”

¹⁴Ta Jisunü yu khüdusü mülalingcho, hütsünü governor khütang nyemüyangcho.

¹⁵Phungkhu Thsüti müipi arangyoh la lirü nyüh khüdu amülungnü sü chingnang abi müthehnung tsü Roman governor yangthsa licho.

¹⁶Hütsü shikhe la arangyoh la lirü anengkhong anengnü Barabbas licho.

¹⁷Achotsü sühdi tsü shibülungde Pilatnü arüh te tsingdhengcho, “Ihnü nührü khyang sütpü süu müthehsohnyüro? Barabbas a mahkhang Mesia dsiba Jisu?”

¹⁸Jihudarünü Jisu mükoh dhenglangnü khakhuchüjüchoepü abinü müdhecho.

¹⁹Pilat yangthsaba pümji la püm yade, anitpünü yusi khüdu müthehchücho: “Mülang müliba nyitsarü chah tsü tu tünguchi; tunüo shomang I melang abi nengdangnü Ih dee chongchako.”

²⁰Bebü ayingti ko azibarütinü Barabbas tsü müthechüng ko Jisu tsü süsohng pü Pilat te yosohnung amülung tsü kihchocho.

²¹Ta Pilatnü amülung te tsingdhengcho, “Hinyi yola nührünü sütpü süu I khyang müthehsohnyüro?” “Arühnü lalingcho, Barabbas!”

²²Pilatnü arüh te tsingdhengcho. “Khang, Mesia pü dsiba Jisu chah Ihnü tu nguchinung?” Arüh atümungnü lalingcho, “Abi hamkehng!”

²³Ta Pilatnü tsingdhengcho, “Abinü tu thsamehcho?” Hütsütade arühnü khütang züdenü yocho: “Abi hamkehng!”

²⁴Khode Pilatnü tu chotanung müdhsüdah, alaa mümüp shingchehnungduepü dhengchehcho, abinü kih hironü sühdi bete tsünü akheh mütsahnü yocho, “Hiba Nyitsarü sücho nengdang I bha müthsanung! Hi nührünü nguchire!”

²⁵Sühdishünü lalingcho, “Abi süsohcho ngang akhingchi tsü ihrü ko ihrü tsurüti chah küdusohng!”

²⁶Hütsüde Pilatnü arüh khyang Barabbas müthehcho; ko Jisu chah xüpsohpü hamkehsohnung khakhuchüjücho.

²⁷Hütsüpü Pilat athrungrütinü Jisu tsü governor kuh lang no züducho, ko sühdi shünü abi mükangticho.

²⁸Arühnü abi shü khohpehjücho ko anyahrüm shü phakehjücho.

²⁹Hütsüpü arühnü zingshünü yangthsarü kuthri chehpü athah la thrijücho, ko akheh tsalang ja khüdu bisohcho; hütsüpü arühnü abe te mükhukeh abi müthsamünyo yocho. “Jihudarü Yangthsaba, ku tsüp lieng!”

³⁰Arühnü abi chah müchohkehjücho, ko ja tsü khyonü athah la xüpcho.

³¹Khode müthsamünyükacho, anyahrüm shü tsü khohpehjüpü apu shü thali yohjücho. Hütsüpü arühnü abi hamkehnung nücheh tsicho.

³²Arüh tsiyade, arühnü nyüh khüdu Cyrene lanü anengnü Simon mütohcho ko rothsarütinü abi khyang Jisu khala khing dhisohcho.

³³Arühnü lih müdüm khüdu Golgotha, khüi adüzü “Thahrü lih” pü dsiba lang rocho.

³⁴Hütsüla arühnü Jisu khyang Cikih akha te yohrütapü ayongnung jücho, ta hütsü müjangdhengpü, abinü müyongcho.

³⁵Arühnü abi hamkehcho ko ajengki arüh yola zii thsadhengpü changtacho.

³⁶Hütsüpü arühnü hütsüla abi dheng pümcho.

³⁷Abi thah te arühnü abi mülangjücho yu tsü thrahkehpüjücho “Hiba hi Jisu, Jihudarü Yangthsaba.”

³⁸Hütsüpü arühnü Jisu yola afüashi nyüh anyüh abi tsalang khüdu ko fülilang khüdu hamkehcho.

³⁹Lahkhulahlarünü mii aku ngahchi Jisu mükhimüngucho:

⁴⁰“Amübükuh tphüpü nyümong asang lipü thali thsachehbong! Nüh Tsingrangba Tsurükhang nü jangjang khümchoung, Khala chah tsünü jürung!”

⁴¹Hütsüroh-i bebü ayingti Yuzeng adorüti ko azibarütinü müthsamünyücho:

⁴²“Abinü bürülü khümchocho, ta apulü mükhümchochehre! Israel Yangthsaba tsü abi mahrü do? Abinü ade khala chah tsünü jürokhang, Ihrünü abi chah yudsinung!

⁴³Abinü Tsingrangba chah longlangre ko Tsingrangba Tsurü epü yore. Khang Tsingrangbanü abi khümcho a mükhümchonang Ihsanü dhengdhengnung!”

⁴⁴Abi te hamkehrü afüashi tsünüsü hütsü roh-i du tsü abi müthsamünyücho.

⁴⁵Nyüthung la limih apümlang rehtseh asang mapehcho.

⁴⁶Asang bekhyah koh la Jisunü yuva amülahnü züdecho, “Eli, Eli, lama sabak-thani”? “Khüi adüzü, I Tsingrang, I Tsingrang, tuepü Ih pehjüro?”

⁴⁷Hütsü shündhün yarü khürünü yuchi yocho, “Abinü Elija dsichile!”

⁴⁸Hütsüde arüh yola nyüh khüdunü shang wünü, münuh acikih la thsangpü, tbütphü müle la rahkehpü abi khyang tihnung müküpcho.

⁴⁹Ta aparünü yocho, “Yieng, abi khümchonung Elija ro a müronang Ihsanü dhengnung.”

⁵⁰Jisunü anyüpiu yuva amülah chürocho ko müsi longcho.

⁵¹Hütsüde Amübükuh la kitiba shü, athahlangnü alih chii anyüh kang rohrüpcho. Alihyo zingcho ko lung tsohrüpcho,

⁵²kongti tsohrüp khangthrucho, ko yüpseh liba amüsarüti adrong kangchehli rocho.

⁵³Arüh kong lanü chürocho, ko Jisu kangli ropü khanglang, arühnü Amüsa yangdi lang züducho, ko nyitsarü adrongnü arüh ngucho.

⁵⁴Jisu nyahrü rothsarü anüchiba ko rothsarütinü alihyo zingcho ko atikehcho apüm ngude, arüh drüsehcho, ko “Yujeba abi Tsingrangba tsurü thsako pü yocho.”

⁵⁵Hütsüla khingkurü adrong sürü Galil lanü Jisu khanglang iirocho, ko abi rükucho arüh ashu lanü dheng yacho.

⁵⁶Arüh yola Mary Magdalin, Zebedi tsurüti Jakob e Josef nyüh atpa Mary zeh licho.

⁵⁷Nyüzeh rode, Arimathia lanü alirü nyüh khüdu anengnü Josef ro chihcho; abisü Jisu mono khüdu thsacho.

⁵⁸Abinü Pilat yanglang wü Jisu me tsü chingcho. Pilatnü me tsü Josef khyang jünung yuzeng jücho.

⁵⁹Ko Josefnü me tsü khyüchocho, ko anana shü la müshüpü,

⁶⁰abinü lung la chiphoh licho kong asi la yohpücho. Hütsüpü abinü kong trahtri tsü lung amülah khüdunü zehti yohpüpü tsicho.

⁶¹Ko Mary Magdalin ko aparü Mary nyüh tsü hütsüla kong lahpi be pipü pümcho.

⁶²Nyümong khüu, khüiba Sabath nyümong thsacho, bebü ayingti ko Farisirütinü Pilat te shironü

⁶³yocho, “Adirü, arahkhehbong abi akang lide, ‘Nyümong asang lipü kangchehli ronungepü yocho ihrünü lümchehre.’

⁶⁴Hütsüeko abi monotinü wünü me tsü müfüchehnungthsa ko nyitsarüti te abi asücho lanü kangchehli roko pü müyosohnung thsa nyümong asang müpide abi kong tsü müzah nyahnung yuzeng jüng. Hütsüta mahkhang, hiba akaba arahkheh tsü akhudiba tenü amütsau thsanung.”

⁶⁵“Pilatnü arüh te yocho,” “Anyahrü nüng ko wü kong tsü nührünü kohcho nyahng.”

⁶⁶Achotsü arühnü wü, kong tsü mükhangthrusohnung shulüm lungnü amüdhethsa shingtipü anyahrüti yasohcho.