Read Sangtam Naga MATHI 4 Bible Online

MATHI 4 - Sangtam Naga bible

MATHI 4

¹Hütsüpü motsingnü thsatsüsohnung nengdang Anbünü Jisu lipilih lang nowücho.

²Nyümong yüre ko romang yüre kongko khanglang, Jisu yangcho.

³Hütsüde motsing tsünü abi yang ro yocho, “Nüh Tsingrangba Tsurükhang, lung hirinü hümthse kangsohnung yuzeng jüng.”

⁴Ta Jisunü lalingcho, “Amüsa yunü yore, ‘Nyitsarünü hümthse dunü akang mülicheh, ta Tsingrangba be lanü chürocho yutse mükhunü.’ ”

⁵Hütsüpü motsingnü Jisu tsü Amüsa yangdi Jerusalem lang nowücho, ko Amübü kuhmung athsenguba chah pümsohcho,

⁶ko abi te yocho, “Nüh Tsingrangba Tsurükhang, nü jangjangthsa tsohchoung, tunüo Amüsa yunü yore: “‘Tsingrangbanü nü nengdang abi riwürüti khyang yuzeng jünung, nü jing mii lung chah mümüthinungthsa, arüh kheh lanü nüh wüpchonung.’ ”

⁷Jisunü lalingcho, “Ta Azengtacho nüsü yore, ‘Nühnü Abüdongba nü Tsingrang tüthsatsü’ ”

⁸Hütsüpü motsingnü Jisu tsü azong athseng khüdu yang nowücho ko abi te limih yangliti ko arüh ahechi atümung ngusohcho.

⁹Motsing tsünü yocho, “Nühnü mükhukeh Ih mübükhang, hi atümung nü khyang Ihnü jünung.”

¹⁰Hütsüde Jisunü lalingcho, “Tsipehng, Satan! Amüsa yunü yore, ‘Abüdongba nü Tsingrang mübüng ko abi du dikehng!’ ”

¹¹Hütsütade motsing tsünü Jisu pehjücho; ko riwürütinü ro abi rükucho.

¹²Khode Johan akhangti kuh la rangyohkopü Jisunü yuchicho, abinü Galil lang tsipehcho.

¹³Abinü Nazaret la müpümpü, Zubulun ko Naftali lih Galil kihdi müshüm liba Kapernaum lang alinung wücho.

¹⁴Hiba hi Isaya azikehbanü chochoba tikehsohnung nengdang nguchicho:

¹⁵“Zebulun ko Naftali lih, kihdi lang la, Jordan kikeh khüulang, Galil, yangpirü lih!

¹⁶Ama la lirütinü atsingse amülah khüdu ngunung. Asürü lih amala lirüti michah atsingse vijünung.”

¹⁷Hütsütinü Jisunü abi yusi thsingyunung dikehcho: “Nührü münyi lanü ximülang, tunüo ninglang Yanglih amünyethsa lile!”

¹⁸Jisunü Galil kihdi bekhüm tung tside, abinü ngu rangrü jüninyü Simon (Peter pü dsiba) ko, ani Andria, kihdi la yojehnü ngu rang ngucho.

¹⁹Abinü arüh te yocho, “Ih iirung, ko Ihnü nührü nyitsarü rangrü kangsohnung.”

²⁰Hütsütade tsünü arühnü arüh yojeh pehjüpü abi iiwücho.

²¹Abinü khü wüpü aparü jüninyü, Zebedi tsurüti, Jakob e Johan nyüh arüh au Zebedi te kihtang la yojeh müthsühchi ngucho. Jisunü arüh dsicho.

²²Hütsüde tsünü arüh kihtang ko arüh au pehjüpü abi iiwücho.

²³Jisunü Galil apüm bongnü, Sinagog la donü, ninglang Yanglih Yuse Atsa thsingyu, ko adhsa-ara ko füthsa alang papa kehrü kyangjo wücho.

²⁴Ko abi nengdang Yusi tsü Syria limih apümlang sobhocho. Achotsü nyitsarünü abi yang füthsarü ko adhsa-ara alang papa kehrü: amünyi nbünü rangrü, füyüm zehrü, ko dsidsisürü norocho, ko Jisunü arüh atümung kyangjücho.

²⁵Ko Galil lanü ko yangdi dhüre lanü, Jerusalem, Judea, ko Jordan khüulang liba lih lanü abi khanglang sühdi iiwücho.