Read Sangtam Naga MATHI 6 Bible Online

MATHI 6 - Sangtam Naga bible

MATHI 6

¹“Nyitsarü khyang ngusohnung nengdang nührü amüi nguchi amülung bete nguchi tüngu. Hiri tsü nührünü misha nguchikhang, nührü Au ninglang liba chahnü jiyü tusü müngunung.

²“Hütsüeko khode nührünü chongcharü khyang lango jünang, akhürahrütinü amübükuh la ko yanglong la ngusohnung nengdang nguchicho roh-i tünguchi. Arühnü hütsü nyitsarünü arüh sesohnung nengdang nguchire. Ihnü yore, arüh khyang ajeng jopehko.

³Ta khode nührünü chongcharü tronang, nü shangrükhungnüsü hütsü mümüdhenungthsa nguching.

⁴Hütsütakhang hütsü arang nguchi thsanung. Ko nührü Au, sünü nührünü rang nguchicho nguro, abinü nührü khyang jiyünung.

⁵“Khode nührünü dangkhidangnangnang, akhürahrü roh-i tüthsa! Arühnü nyitsarünü ngunung nengdang Sinagog amübükuh la ko langtpah la yapü dangkhidangnangnyüre. Ihnü yore, arüh khyang ajeng jopehko.

⁶Ta khode nührünü dangkhidangnangnang, kuh yonglang züdung ko kuh khangtipü nahnü münguba nührü Au te dangkhidangnang. Ko nührü Au sünü nührünü rang nguchicho nguro, abinü nührü khyang jiyünung.

⁷“Khode nührünü dangkhidangnangnang, müyudsirünü bichicho roh-i, adüzü müliba yu dee tübichi, tunüo arühnü asheng dangkhidangnangchonü arüh tsingrangnü yuchinungepü lümre.

⁸Arüh tüithsa. Nührü Aunü abi te müchingenü nührü thsütah müdhele.

⁹Hütsüeko, nührünü hiroh-i dangkhidangnang. “‘Ninglang liba Uwa: Nü neng Amüsa hechisohng;

¹⁰Nü Yanglih rosohng; Ninglang roh-i limih la nü müsi thsaang.

¹¹Ihrü khyang chünye thsütah tsuyongnung khülo.

¹²Ihrü te thsamehrü khyang ihrünü mülang pehjücho roh-i, Ihrü thsamehcho mülang pehjüng.

¹³Ihrü athsatsü amüling yang tünü, ta amünyi lanü khümchoung.’

¹⁴“Nührü te amütsa nguchirü khyang nührünü mülang pehjükhang, ninglang liba Au nüsü nührü khyang mülang pehjünung.

¹⁵Ta nührünü bürü mülang müpehjükhang, nührü Au nüsü nührü mülang müpehjünung.

¹⁶“Ko khode nührünü kongnang, akhürahrü roh-isü romih tümükhüm. Arüh kongcho nyitsarü khyang ngusohnung nengdang arühnü arüh romih mükhümre. Ihnü yore, arüh khyang ajeng jopehko.

¹⁷Nührünü khode kongnang, nü romih müpieng ko nü thah sühng.

¹⁸Hütsünü du, nahtsenü münguba nührü Au chah khu aparünü nührü konglepü mümüdhenung. Ko nührü Au sünü rang nguchicho nguro, abinü nührü khyang jiyünung.

¹⁹“Hiba lih la palu nengdang kuthsi tüzahkeh, khüde azah ko dhrongnü tsuro, ko aführünü rohphoh führo.

²⁰Hütsü mülih, ninglanglih la nührü kuthsi zahkehng, khüde azah ko dhrongnü mütsuro ko aführünü rohphoh müführe.

²¹Tunüo nü kuthsi khüde linang hütsüla nü lasih linung.

²²“Nahtse tsü afü nengdang dsi khüdu kyole. Nü nahtse tsa likhang, nü fü apüm tsingsenung;

²³ta nü nahtse mütsakhang, nü fü tsü marürah linung. Hütsüeko nü chah liba atsingse tsü marürahkhang, amarürah tsü khütoh-i adrünung thsanung!

²⁴“Sünüsü abüdongrü anyüh müdikehcheh; abinü khüdu thrünyinung ko akhüu müinung; khüdu te yocho nyinung ko akhüu tsü müchümükehnung. Nührünü Tsingrangba ko kuthsi anyüding müdikehcheh.

²⁵“Hütsünü Ihnü nührü akang linung nengdang tsuyongnung mahkhang afü nengdang müpinung tu tülümxü pü yore. Tunüo akang tsü tsuyongnung tenü awüba mahrü do? Ko afü tsü shü tenü awüba mahrü do?

²⁶Uzati tsü dheng: arühnü ma müchirü, xabülung shih la müyohpürü; ta ninglang liba nührü Aunü arüh xükümre! Nührü uza tenü khütang awüba mahrü do?

²⁷Nührü khürünü hütsü nengdang lümxüchonü khü ashengu lichchehnung mah-o?

²⁸“Tuepü müpinung nengdang lümxüro? Rangmü yungpi khüta ziro lümdheng: arühnü münguchire mahkhang shü mükyahre.

²⁹Ta Ihnü nührü te yore, Solomon Yangthsabanü mii akuthsi hütsüdoi linye hiri yungpi tsah tsacho kyo müjengkicho.

³⁰Za chünye liko atu müliba, ta la tahpehba khyang mii Tsingrangbanü müpisohkhang, abinü nührü khyang alaa mümüpisohnung do? Nührü yudsi samrüti!

³¹“Hütsüeko, tu tsunung, mahkhang tu yongnung mahkhang tu müpinung pü tülümxü!

³²(Müyudsirü dunü hiri nengdang lümre) Ninglang liba nührü Aunü hiri apüm nührü nengdang thsütahlepü müdhele.

³³Hütsü mülih akhu nührünü Tsingrangba Yanglih ko abi Amüsaba yangching, ko hiri atümung nührü yo thsanung.

³⁴Hütsüeko atu nengdang tülümxü; tunüo atu tsü ajangjang lümxünung. Nyümong mükhu abükyü chongcha tsü hütsü nyümong nengdang kükyüsohng.