Read Sangtam Naga MATHI 7 Bible Online

MATHI 7 - Sangtam Naga bible

MATHI 7

¹“Tsingrangbanü nührü yu mükhanungthsa bürü yu tükha,

²tunüo nührünü khüta bürü yu khanang hütsü roh-i Tsingrangbanü nührü yu khanung, ko nührünü bürü te tu yuzeng bichinang nührü te abinü hütsü kyo bichinung.

³Hütsükhang, tuepü nüpu nahtse la singnah zehpü nü jünirü nah la zehcho anyah dhengro?

⁴Nüpu nahtse lalü singnah zehpü, nühnü khüta nü jünirü nah la anyah pehjünung pü yoro?

⁵Khürahbong! akhu nüpu nah lanü singnah tsü pehng, hütsüpü du nü jünirü nah la anyah tsü pehjünung tsitsa ngunung.

⁶“Tu Amüsa liro hütsü füza khyang tüjü, arühnü ximüla nüh mükahnung. Shüka bete bhürüm tüthohpeh, arüh jingnü hütsü dhrümchinung.

⁷“Ching, ko hütsü nührü khyang jünung; Yangching, ko nührünü ngunung; hamching, ko hütsü nührü khyang khangthrujünung.

⁸Tunüo achingrü müipinü khyüchore, ko sünü yangchiro abinü ngure, ko sünü drongdrongchiro abi khyang khangthrujüre.

⁹Nührü auti yola khürünü atsurünü hümthse chingde abi khyang lung jürü do?

¹⁰Mahkhang abinü nguh chingde mürü jürü do?

¹¹Nü roh-i amütsanü mii, tsuzarü khyang atsa jünung müdhekhang, ninglang liba nührü Aunü abi te chingrü khyang kohro atsa khüta alaa müjünung!

¹²“Nührü te nguchisohnyücho roh-i aparü tesü nguching: hiba hi Mosa yuzeng adüzü ko azikehrü adoba tsü lile.

¹³“Akongsüm tbükhüm khu züdung, tunüo mümehmi tbükhüm tsü müzadile ko hütsülang nüba lang tsü mülakhütile, ko hütsüla züdurü khütango.

¹⁴Ta akang lang tbükhüm tsü akongsüm ko hütsülang nüba lang tsü athsah-e, ko hütsü ngurü aikyah du.

¹⁵“Arahkheh azikehrü nengdang müzahng; nührü yang adhengnung san kyo rore, ta ayonglanglü arüh rangfü kyole.

¹⁶Arühnü tu nguchiro hütsü khu nührünü arüh müdhenung. Zengsih dongchah shükusih müsire, ko abengpingzeng chah ngurüsih müsire.

¹⁷Singdong atsa chah asih atsa sihre, ta singdong amütsa chah asih amütsa sihre.

¹⁸Singdong atsa chah asih amütsa müsihcheh, ko singdong amütsa chah asih atsa müsihcheh.

¹⁹Ko khüiba singdong chah asih atsa müsinang hütsü resah michang la yohre.

²⁰Hütsü roh-i, nührünü arahkheh azikehrü tsü arüh nguchinü müdhenung.

²¹“I te, ‘Abüdongba, Abüdongba’ pü dsirü müipi ninglang Yanglih la müzüdunung, ta sünü ninglang liba I Unü khyünyücho nguchinang abi du züdunung.

²²Khode yukha nyümong ronang, adrongnü I te yonung, ‘Abüdongba, Abüdongba! Nü nengla Ihrünü Tsingrangba yu choko, nü nengla Ihrünü amünyi iipehko ko thsayahiya adrong nguchiko!’

²³Hütsütade Ihnü arüh te yonung, ‘Ihnü khodesü nührü mümüdhe. Nührü amütsa nguchirüti, Ibe tenü shehkhung!’

²⁴“Hütsüeko, sünü I yu hiri yuchiro ko bichiro, abi alümzeh nyitsarü lung michah kuthsabong kyole.

²⁵Tsing rocho, kih dicho, ko hütsü kuh chah nyübong amülahnü fücho. Ta hütsü mükhülu, tunüo hütsü lung michah khyüm thsacho.

²⁶“Ta sünü I yu hiri yuchipü mübichiro, abi lihpi michah kuh thsaba amüsithsabong tsü kyole.

²⁷Tsing rocho, kih dicho, ko hütsü kuh chah nyübong amülahnü fücho, ko hütsü khülucho ko hütsü khüluba tsü khütoh-i adrünung thsacho!”

²⁸Khode Jisunü hiri chozahcho, abi docho la sühdinü nyemüyangcho.

²⁹Abinü Yuzeng adorü roh-i müthsapü tase bichi chocho.