Read Sangtam Naga MARK 1 Bible Online

MARK 1 - Sangtam Naga bible

MARK 1

¹Hiba Yuse atsa hi Tsingrangba Tsurü Jisu Khrista nengdang lile.

²Hi azikehrü Isayanü thrahcho kyo tikehcho: “Tsingrangbanü yocho, ‘Ihnü I yusi hirü nü müngu nü lang rungnümnung müthehnung.’

³Lipilih la nyüh khüdunü züdecho yuva, ‘Abüdongba nengdang lang tsü rungnüm; abi lang müchongkhüti külüpm.’ ”

⁴Johan-nü lipilih la thsingyu ko baptijo rocho. “Nührü münyi lanü lasih thsamülang ko bapting,” ko Tsingrangbanü nührü münyi pehjünung.

⁵Ko nyitsarü adrong Judea ko Jerusalem yangdi lanü Johan te nyinung wücho. Arühnü arüh münyi nyengchocho ko abinü Jordan yongkhi la arüh baptijücho.

⁶Johan-nü ut nbüh khümcho, ko shuküpnü akih rümcho ko abi tsuyongnung tsü khengqu ko thsakukih thsacho.

⁷Abinü yocho, “Nyüh khüdu sü I khanglang ronung liro abi I tenü dee adiuba lile. Ihnü mükhukeh abi jingkhüm yo lehchehnung mii müdekheng.

⁸Ihnü nührü kih la baptijüre, ta abinü nührü Anbü Amüsa la baptijünung.”

⁹Tunyah mülipü Jisu Galil la liba Nazaret lanü rocho, ko Jordan la Johan-nü baptijücho.

¹⁰Abi kih lanü chüroyeng, abinü ning khangthru ngucho ko Anbü mümüdhrü roh-i abi chah jürocho.

¹¹Ko ninglangnü yuva khüdu rocho, “Nüh Ihnü müiba tsurü, nü chah I long kyangre.”

¹²Hütsüde tsünü Anbünü abi lipilih lang tsisohcho;

¹³khüde nyümong yüre satan-nü thsatso licho. Hütsüla rangmü kanglungrüsü licho, ta ninglang riwürünü ro abi trocho.

¹⁴Johan jingkhehka la rangyohpü, Jisunü Galil lanü wü Tsingrangba chahnü Yuse atsa thsingyucho.

¹⁵Abinü yocho, “Becho chihko ko Tsingrangba Yanglih amünyeh lile; lasih thsamüla Yuse atsa chah yudsing.!”

¹⁶Jisu Galil kihdi khu tside, abinü ngurangrü nyüh anyüh, Simon ko ani Andria nyüh yojehnü ngu rang ngucho.

¹⁷Jisunü arüh te yocho, “Ih iirung, ko Ihnü nührü nyitsarü rangrü kangsohnung.”

¹⁸Ko hütsüde tsünü arüh yojeh pehjüpü abi iiwücho.

¹⁹Ko azachah wüpü abinü aparü jüninyü, Zebedi tsurü Jakob ko Johan kihtang la yojeh müthsühchi ngucho.

²⁰Jisunü arüh ngudunü, abinü arüh dsicho, ko arühnü arüh au Zebedi shehsherü te kihtang la pehjüpü Jisu iiwücho.

²¹Jisu ko amonoti Kapernaum yangdi lang rocho, ko Sabath nyümong abinü Sinagog la docho.

²²Ko abinü thsingyuchoba la arühnü nyemüyangcho, tunüo yuzeng adorü roh-isü mahpü abinü tase keh docho.

²³Hütsüde tsü amünyi nbünü rangchoba nyüh khüdu Sinagog la tsü ro khongcho.

²⁴“Ihrü te nüh tu nguchinyüro, Nazaret-rü Jisu? Nüh ihrü changsohnung hila rocho mah-o? Nüh sünang Ihnü müdhele. Nüh Tsingrangba Amüsa yusi hirü lile.”

²⁵Jisunü anbü khyang yuzeng jo yocho, “Tümümüp ko nyitsarü chah tsünü chürung.!”

²⁶Ko amünyi nbü tsünü dhi mapchi, khong abi chahnü chürocho.

²⁷Ko nyitsarü atümung dee nyemüyang khüdunü khüdu te yocho, “Hi tuo? Adoba asi; Hiba nyitsarünü amünyi nbü khyangsü yuzeng jünung tase kehle; ko arühnü abi yu nyire.!”

²⁸Hütsüta Jisu nengdang yusi tsü Galil apümlang zahnü jengcho.

²⁹Jisu ko abi monoti, Jakob ko Johan-nyüsü zeh, Sinagog pehjüpü Simon e Andriarü kuh lang wücho.

³⁰Ko Simon nitpü atpa rihminü füthsa yüpjocho, ko Jisu ro chihyeng abi te abükyü nengdang yocho.

³¹Abinü abükyü yang wü akhehnü marehpü tphahmüsucho ko rihminü abi pehjücho, ko abükyünü arüh dikehcho.

³²Anyüzehlang, Jisu yang arühnü füthsarü ko amünyinü rangrü atümung norocho.

³³Yangdi la lirü atümung kuh bete shibülungcho.

³⁴Jisunü dhsara papanü thsarü adrong kyangjücho ko amünyi nbü adrong iipehjücho. Abinü amünyi nbü khyang tusü müchosohcho, tunüo arühnü abi tsü sünang müdhecho.

³⁵Nyangnyü khüu mütoh, Jisunü suropü kuh tsü pehjücho. Abinü yangdi la tsünü shehmüi anaying müdüm khüdu la wü dangkhidangnangcho.

³⁶Ta Simon ko abi shangrütinü abi yangchi wücho,

³⁷ko arühnü abi ngude, arühnü yocho, “Atümungnü nüh yangchile.”

³⁸Ta Jisunü lalingcho, “Ihsanü hi mükang yangdongti lasü wübae. Ihnü hütsüri lasü thsingyubae, tunüo hütsü nengdang Ih rocho.”

³⁹Achotsü Galil apümlang Sinagog la thsingyunü amünyi nbü iipehjo rachicho.

⁴⁰Mübhira kehrü nyüh khüdu Jisu yang ro mükhukeh kihchicho, “Nühnü lümkhang, Ih müsachehjünung kohle.”

⁴¹Jisunü müi lümnü, akheh müyungcho abi chah thahpo yocho, “Ihnü lümre, nüh müsachehng”,

⁴²Hütsüde tsünü mübhira tsünü abi pehjücho, ko abi müsachehcho.

⁴³Ko Jisunü abi te khah-khah yopü müdhecho.

⁴⁴“Nyieng, sütesü hi nengdang tüyo. Ta bebüba yang wüng ko abi khyang dhengsohng; ko atümung bete nüh kyangko pü yuzi thsanung nengdang, Mosanü mülacho amübü mübüng.”

⁴⁵Ta nyitsarüba tsünü wünü apümlang hiba yusi tsü sobhocho. Hütsünü Jisunü yangdi lang tsü mishanü müzüduchehcho, tanye shecheh anaying chah licho, ko apümlangnü nyitsarü abi yang rocho.