Read Sangtam Naga MARK 10 Bible Online

MARK 10 - Sangtam Naga bible

MARK 10

¹Hütsüpü Jisunü hütsü müdüm pehjüpü Judea lih lang wücho, ko Jordan yongkhi kehcho. Abi yanglang amülung amülah thali rocho, ko lede abinü nguchicho roh-i, abinü arüh te docho.

²Farisirü khürü ro abi thsatso yocho, “Ihrü te young, nyüh khüdunü anitpü zanung Ihsa yuzengnü mülarü mah-o?”

³Jisunü atsingdhengba khüdunü lalingcho, “Mosanü nührü khyang tu yuzeng jücho?”

⁴Arühnü lalingcho, “Azanung yuzi thrahpü anitpü tsisohnung Mosanü mülacho.”

⁵Jisunü arüh te yocho, “Nührü te thsingyunung thsahrachonü Mosanü nührü nengdang hiba yuzeng hi thrahcho.

⁶Ta lipohdinü, ‘Tsingrangbanü arüh adhrerü ko khingkurü thricho,’ Azengtachonü yocho kyo.

⁷‘Hütsünü adhrerünü au ko atpa pehjünung ko anitpü te lümkha linung,

⁸ko anyüh tsü shuh khüdu kangnung.’ Adelü arüh anyüh mah, ta shuh khüdu du.

⁹Hütsü Tsingrangbanü tu mükhongsohcho nyitsarünü tüzasoh.”

¹⁰Khode arüh kuhla thali züducho, monotinü Jisu te hi nengdang tsingdhengcho.

¹¹Abinü arüh te yocho, “Sünü anitpü zapü apa khyonang abinü anitpü nyüm nahtrahnaxengre.

¹²Hütsüroh-i, khingkurü sünü anii te zapü aparü te xengnang nahtrahnaxengre.”

¹³Nyitsarü khürünü Jisu khyang azarüti abi khehnü arüh chah thahpüsohnung norocho, ta amonotinü arüh yübücho.

¹⁴Khode Jisunü hütsü müdhecho, azi chüro amonoti te yocho, “Azarüti tsü I yanglang rosohng, arüh tüiti, tunüo Tsingrangba yanglih tsü hiri roh-i yo.

¹⁵Ihnü nührü te yutsatsa yore, Sürünü Tsingrangba yanglih tsü azarü roh-i mükhyüchonang hütsüla khodesü müzüdunung.”

¹⁶Hütsüpü abinü azarüti chah khyahripü arüh müipi chah nyümkeh müwajücho.

¹⁷Ko abi lang la wüchi yade, nyüh khüdu shang ronü ajing te mükhukeh tsingdhengcho, “Athsingyurü atsa, lede akang ngunung Ihnü tu nguchinung?”

¹⁸Jisunü abi te yocho, “Tuepü I te atsa pü dsiro? Tsingrangba chah khu süsü atsa müle.

¹⁹Nühnü yuzengti müdhele: ‘Tümüpseh, nahtrahnaxeng tüthsa, tüfü; arahkheh la süsü tümülangjü; tükiyohchü; nüu ko nü tpa jengreng drüng.’ ”

²⁰Nyitsarüba tsünü yocho, “Athsingyurü, I zadenü yuzeng hiri apüm bichi rore.”

²¹Jisunü abi chah müinü dhengkeh yocho, “Nüh lang khüdunü müpisa. Wüng, nü licho apüm ieng ko thsi tsü ailümrü khyang jüng, ko ninglang nü kuthsi linung; hütsüpü I khanglang rung.”

²²Khode abinü hi yuchicho, aromih mükhümpü wahseh tsipehcho, tunüo abi dee alirü thsacho.

²³Jisunü amonoti chah mükang dhengpü arüh te yocho, “Alirünü Tsingrangba yanglih la züdunung khüta athsah!”

²⁴Hiri yunü amonoti nehcho, ta Jisunü münyehli yocho, “I tsurüti, Tsingrangba yanglih la züdunung khüta athsah!

²⁵Alirünü Tsingrangba yanglih la züdunung tenülü tbang khi la ut bücheh tsinung amülabae.”

²⁶Hi yuchi monoti dee nyemüyangseh khüdunü khüdu te tsingtacho, “Akhang, sü khümchonung?”

²⁷Jisunü arüh chah dhengkeh lalingcho, “Hi nyitsarü nengdanglü amükohnung, ta Tsingrangba nengdanglü mah; tunüo Tsingrangba nengdanglü apüm akohnung.”

²⁸Hütsüde Peternü chomüsucho, “Dheng, Ihrünü apüm pehjüpü nü khanglang iirocho.”

²⁹Jisunü arüh te yocho, “Ihnü nührü te yutsatsa yore, khürünü I nengdang ko Yuse atsa nengdang kuh, amung-ani mahkhang afü-ani mahkhang au mahkhang atpa mahkhang atsurü mahkhang luphiyongphi pehjonang,

³⁰hiba shang la alaa ngunung. Ko abinü thsih pinü alaa kuh, amung-ani, afü-ani, atpati, atsurüti, luphiyongphi ko dhsümthsedhsümloh miinü ngunung; ko aronung shang la müchangkaba akang ngunung.

³¹Ta adrong sürü akhuro arüh akanung, ko ade akarü adrong akhunung.”

³²Ko arüh Jerusalem lang la tuwüchi yacho, ko Jisu tsü arüh belang tsichi yacho; ko arüh nyemüyangcho, ko akhanglang iirorüsü drücho. Mono dhüre-anyüh tsü thali nüpü, abi chah tikehnung lichoti nengdang arüh te yomüsucho.

³³Abinü arüh te yocho, “Nyieng, Ihsa Jerusalem lang tuwüre khüde Nyitsarü Tsurü bebü ayingti ko yuzeng adorüti khehla khakhuchüjünung. Arühnü abi mülangjo süsohnung ko yangpirü khehla khakhuchüjünung, sürünü müthsamünyünung,

³⁴müjü müchokehnung, xüpnung, ko süsohnung; ta nyümong asang khanglang abi kangchehli ronung.”

³⁵Hütsüpü Zebedi tsurü Jakob e Johan nyüh Jisu yanglang rocho. anyünü yocho, “Athsingyurü, ihrü nengdang lango nguchisohnyüre.”

³⁶Jisunü arüh te tsingdhengcho, “Tuo?”

³⁷Arühnü lalingcho, “Nüh khode nüyo ahechi pümji la pümnang, Ihjü nyüh khüdu nü tsalang ko khüdu nü fülilang pümsohng.”

³⁸Jisunü arüh te yocho, “Nührünü tu chingro hütsü nührünü mümüdhe. Ihnü yongnung liba chongcha shing tsü nührünü yongchehnung mah-o? Ih baptinung liba la tsü nührünü baptichehnung mah-o?”

³⁹Arühnü lalingcho, “Ihrünü kohnung” Jisunü arüh te yocho, “Ajüje Ihnü yongnung liba shing tsü nührünü yongchehnung ko Ih baptinung liba roh-i tsü nührünü baptichehnung.

⁴⁰Ta I tsalang ko fülilang sürü pümnung hütsü throchehnung I chah tase müle. Hütsü sürü nengdang rungnümcho arüh khyang jünung Tsingrangba müsi e.”

⁴¹Khode aparü mono dhüre tsünü hütsü yuchicho, Jakob e Johan nyüh te arüh zichürocho.

⁴²Achotsü Jisunü arüh atümung dsinü yocho, “Sürü müyudsirü michah yangthsarü liro, arüh nyitsarü michah tase lile ko langnüriti tase ajeng lile.

⁴³Ta nührü yolalü hütsüta mah. Nührü yola khüdunü amülah kangnyükhang, anyingcho atümung dikehrü kangbae;

⁴⁴ko nührü yola nyüh khüdunü amichahba kangnyükhang atümung yurü kangbae.

⁴⁵Tunüo Nyitsarü Tsurü mii dikehsohnung mah; ta dikehnung ko apu akang jo adrong lihchehnung rocho.”

⁴⁶Arüh Jeriko lang rocho, ko Jisunü amonoti ko mülung amülah yola tside, anahtoh chingkichingnangrü khüdu Timas tsurü Bartimas lang te pümcho.

⁴⁷Khode abinü hütsü Nazaret-rü Jisuepü yuchicho, abinü züde yocho, “David Tsurü Jisu, I te chomang!”

⁴⁸Nyitsarü adrongnü yah-a du lieng pü yübüchicho. Ta khüsha züdenü yorü, “David tsurü, I te chomang!”

⁴⁹Jisunü nyehlipü yocho, “Abi dsing,” Hütsünü arühnü anahtohba tsü dsicho. “Müsi zieng!” arühnü yocho, “Künyang, abinü nüh dsile.”

⁵⁰Abinü ashü khohpehpü, tsohmüsu Jisu yanglang wücho.

⁵¹Jisunü abi te tsingdhengcho, “Ihnü nü nengdang tu nguchisohnyüro?” Anahtohba tsünü lalingcho, “Athsingyurü, Ihnü thali ngunyüre.”

⁵²Jisunü abi te yocho, “Wüng, nü yudsinü nüh kyangjüko.” Hütsüde tsünü abinü ngunung kohcho ko abinü Jisu iiwücho.