Read Sangtam Naga MARK 11 Bible Online

MARK 11 - Sangtam Naga bible

MARK 11

¹Arühnü Jerusalem chii rode, Betfage ko Bethany yangdi amünyeh, Olive Zong lang rocho. Jisunü amonoti nyüh anyüh yu pisa yopü tsehleh müthehcho.

²“Nührü belang liba yang la tsü züdung. Nührünü hütsü chihyeng nyitsarünü khodesü müpümdhengcho gadu khüdu xohchingpo ngunung. Hütsü lehcheh hila norung.

³Ko khürünü tuepü hütsü roh-i nguchiropü tsingdhengkhang, Abüdongbanü hi thsütahre, ko zah thali müthehnungepü young.”

⁴Achotsü arühnü wücho ko trahtri khüdu chah yanglong la gadu khüdu xohchingpo ngucho. Arühnü hütsü lehchehchi yade,

⁵shündhün yarü khürünü tsingdhengcho, “Nührü gadu hütsü lehchehba tsü tu nguchiro?”

⁶Arühnü Jisunü yocho roh-i du lalingcho ko nyitsarütinü arüh tsisohcho.

⁷Arühnü gadu tsü Jisu yanglang norocho, ko gadu chah tsü arüh shü phakehjüpü Jisu küdu pümsohcho.

⁸Nyitsarü adrongnü lang la arüh shü khyangjücho, ko khürünü rangmü lanü rangva khungsahnü lang la khyangjücho.

⁹Ko abelang ko akhanglang iirorütinü züdenü yocho. “Hosana! Abüdongba nengla sü roro abi müwajüng!

¹⁰Tsingrangbanü ihrü au David yanglih ronung liba tsü müwajüng! Tsingrangba seing!”

¹¹Jerusalem chihpü abinü amübükuh lang wücho, ko apüm dhengmükangcho. Ta münupehcho tsü, abinü mono dhüre-anyüh yola Bethany lang wücho.

¹²Nyümong khüu, arüh Bethany langnü thali rode, Jisu yangcho.

¹³Abinü ashu lanü ngurüsidong khüdu ava dhülüm kehkonü ngucho, achotsü abinü asih keh a mahnangpü dhengnung wücho. Ta khode chii rocho, abinü ava du ngucho, tunüo hütsü akyang müthsacho.

¹⁴Jisunü ngurüsidong te tsü yocho, “Hikonülü sünüsü nü chahnü asih khodesü mütsunung!” Ko amonotinü hütsü yuchicho.

¹⁵Khode arühnü Jerusalem chihcho, Jisunü amübükuh lang wücho ko airü ko alihrü atümung iipehnung dikehcho. Thsi mülihrü tsingthsang ko mümüdhrü irü pümji mükhapehjücho,

¹⁶ko abinü sü khyangsü amübü kekhüm khu tusü mühitsisohcho.

¹⁷Hütsüpü abinü nyitsarüti te thsingyucho: “Hi Azengtacho la thrah lile, ‘I amübükuh tsü nyitsarü yucho atümung nengdang dangkhidangnang kuh pü dsinung.’ Ta hütsü nührünü aführü kumünyiji kangsohre!”

¹⁸Bebü ayingti ko yuzeng adorütinü hi yuchicho ko Jisu süsohnung lang khürü yangchinung dikehcho. Arühnü abi drücho, tunüo amülung apümnü abinü thsingyucho la nyemüyangcho.

¹⁹Khode nyüzeh rocho, Jisu ko amonotinü yangdi tsü pehjücho.

²⁰Nyangnyü khüu mütoh, arüh lang la wüchi yade, arühnü ngurüsidong tsü ayingshünü mülohpü ngucho.

²¹Peternü tu tikehcho hütsü lümcheh Jisu te yocho, “Dheng, athsingyurü, Nühnü chokehcholaba ngurüsidongsü süko!”

²²Jisunü arüh te lalingcho, “Tsingrangba chah yudsing.”

²³Ihnü ajüje nührü te yore, “Sürünü hiba zong te, nüh dhimüsung ko kihdi la longyohng pü yonang ko alasih la tu alümxü mülipü abinü tu yoro, hütsü tikehnungepü yudsinang, hütsü abi te nguchinung.

²⁴Hichahnü Ihnü nührü te yore: khode nühnü lango tsingdheng dangkhidangnangnang, hütsü nühnü ngukopü yudsing, ko nühnü tu nengdang tsingdhengcho hütsü nü khyang jünung.

²⁵Ko khode nühnü yamüsupü dangkhidangnangnang, khürü nyüm lango likhang mülang pehjüng, hütsüpü du ninglang liba nü unüsü nü thsamehcho mülangpehjünung.”

²⁶Nühnü bürü mülang müpehjükhang, ninglang liba nü unüsü nü thsamehcho mülang müpehjünung.

²⁷Arühnü anyüpiu Jerusalem lang rocho. Ko Jisu amübükuh la rachi yade, bebü ayingti, yuzeng adorüti ko azibarüti abi yanglang ro

²⁸abi te tsingdhengcho, “Hiri nguchinung nüh tu tase liro? Sünü nü khyang hiba tase jücho?”

²⁹Jisunü arüh te lalingcho, “Ihnü atsingdhengba khüdu nührü te tsingnung, ko nührünü alalingba khüdu jüchehkhang, hiri nguchichehnungthsa Ih tu tase liro hütsü nührü te yonung.

³⁰Johan-nü baptijüba tase tsü khüdenü rocho: Tsingrangba chahnü a nyitsarü chahnüo, I te young?”

³¹Arühbürü yola rehtamüsucho: “Ihsanü tu yonung? Ihsanü, ‘Tsingrangba chahnüepü yokhang, abinü yonung, Khang tuepü nührünü Johan chah müyudsicho?

³²Khang Ihsanü nyitsarü chahnüe khang...’ ” (arühnü nyitsarü drücho, tunüo atümungnü Johan tsü azikehrüepü müdhecho.)

³³Hütsüpü Jisu te arüh alalingba tsü, “Ihrünü mümüdhe.” Jisunü arüh te yocho, “Khang, Ihnüsü tu tasenü hiri nguchiro hütsü nührü te müyonung.”