Read Sangtam Naga MARK 12 Bible Online

MARK 12 - Sangtam Naga bible

MARK 12

¹Achotsü Jisunü arüh te yukitabanü chotacho: “Shikhe khüdu nyüh khüdunü shükusiluh thsacho, ko tbünü tbütipü anyehnung shukuh jucho, ko roshengvi khüdu thsacho. Hütsüpü anguchirü khyang luh tsü yuthsahsohnung jüpü shitsehnung tsicho.

²Khode shükusih khyübülungnung akyang chihcho, abinü maxacho lanü nohlüm khyünung kulirü khüdu luthsarü yang müthehcho.

³Luthsarüti tsünü kulirü tsü rangcho, ko lahpü thali tbhüdeng tsisohcho.

⁴Hütsüpü abüdongba tsünü kulirü apa khüdu müthehcho; anguchirü tsünü athah la lerohpehjücho ko ashah khyo bichicho.

⁵Abüdongba tsünü apa kulirü khüdu müthehcho, ko arühnü abi mapsehcho; ko arühnü aparü adrong te hütsü roh-i bichinü lahcho ko khürü mapsehcho.

⁶Adelü müthehnung tsü nyüh khüdu du nying licho, hütsü apu amüiba tsurü licho. Hütsüde achangkathsa anguchirü yang atsudhre tsü müthehcho. ‘Ihnü lümre arühnü abi khyanglü jengreng jünung.’

⁷Ta luthsarü tsünü arühbürü chotacho. ‘Hiba hi atsudhre e. Rung, Ihsanü abi mapsehnung, ko abi kuthsi tsü Ihsa yo kangnung!’

⁸Ko arühnü atsudhre tsü rangcho ko mapsehpü afü tsü shükusiluh khu hiwü pehcho.

⁹“Hütsüde, shükusih abüdongbanü tu nguchinung?” Abi ronung ko luthsarüti tsü mapsehnung ko shükusiluh tsü aparü luthsarü khyang jünung.

¹⁰Nührünü Azengtacho hi mükhidhengcho ang: “‘Kuthsarütinü müdhsütahba lung tsü, apüm tenü ayingba kangcho.

¹¹Hiba hi Abüdongbanü nguchicho; Hi Ihsa nah te khütoh-i anyemüyangnungo!’ ”

¹²Jihudarü langnürünü Jisu rangnung müküpcho, tunüo abinü yukitaba tsü arüh nyümnü chochoepü arühnü nyichehcho. Tanye arühnü amülung drücho, hütsünü arühnü abi pehjüpü tsicho.

¹³Farisirü khürü ko Herod mülung lanü khürü yu tsingdhengnü abi xohsohnung müthehcho.

¹⁴Arühnü abi yanglang ro tsingdhengcho, “Athsingyurü, bürünü tutu lüm nye nühnü mülümxüpü yuje chorepü Ihrünü müdhele. Nühnü nyitsarü jingkih tu müdhengre ta Tsingrangba lümcho thsingyure. Kaisar khyang alihmüthsü jünung tsü Ihsa yuzeng nyümrü mah-o? Ihrü te young. Ihrünü hütsü jünung athsalang a mah-o?”

¹⁵Ta Jisunü arüh rah müdhenü arüh te lalingcho, “Tuepü nührünü Ih xohsohnung müküpro? I yanglang thsi khüdu hirung, ko Ih dhengsohng.”

¹⁶Arühnü abi yang thsi khüdu hirojücho, ko abinü tsingdhengcho, “Hi sü tsah ko sü neng kehro?” Arühnü lalingcho, “Kaisar tsah ko neng.”

¹⁷Achotsü Jisunü yocho, “Hütsükhang, tu Kaisar yo, hütsü Kaisar khyang jüng, ko tu Tsingrangba yo hütsü Tsingrangba khyang jüng.” Ko arühnü Jisu ngu nyemüyangcho.

¹⁸Hütsüde asü lanü kangchehli müronungepü yoba Sadukirü khürü Jisu yanglang ronü yocho,

¹⁹“Athsingyurü, hiba yuzeng hi Mosanü ihrü nengdang thrahcho: ‘Nyüh khüdu atsurü mülipü anitpü pehjo sopehkhang, hütsüvi ani tsünü chomitpü tsü khyünung ko azarü nümüsuba tsü amung asu tsurü roh-i khichinung.’

²⁰Shikhe khüdu arüh jünirü dhünyeh licho; aziba tsü kukangcho ko azarü mülipü sopehcho.

²¹Hütsüpü anyüuba tsünü khingkutpü tsü khyücho ko abisü azarü mülipü sopehcho. Hütsüroh-i tsü asanguba chahsü tikehcho,

²²hütsüta achangchi tikehcho: arüh jünirü dhünyehdingnü khingkutpü tsü khyücho ko azarü mülipü sopehcho. Achangka la khingkutpü tsüsü sopehcho.

²³Ade, kangli roba nyümong khode asürü atümung kangli ronang, abükyü tsü sü nitpü thsanung? Tunüo abükyü tsü arüh dhünyehdingnü khyüko.”

²⁴Jisunü arüh te lalingcho, “Nührü khütoh-i thsamehro? Ko khütachonünang mümüdheo? Hi nührünü Azengtacho ko Tsingrangba zii mümüdhechonüe.

²⁵Tunüo khode asürü kangchehli ronang, arüh ninglang riwürüti kyo linung ko kuh mükangnung.

²⁶Ade, asürüti kangchehli rode: nührünü Mosa Vakha la singtrung tahba nengdangsü mükhidhengcho do? Hütsüla hita thrah lile; Tsingrangbanü Mosa te yocho, ‘Ih Abraham Tsingrang, Isak Tsingrang ko Jakob Tsingrang.’

²⁷Abi asürü Tsingrang mah, ta akang lirü Tsingrang lile. Nührü dee thsamehre.”

²⁸Yuzeng adorü khüdu hütsüla licho, sünü yurehtaba tsü yuchicho. Jisunü Sadukirüte tsü dee tsa lalingkopü müdhe abi yanglang ro tsingdhengcho; “Atümung tenü khüiba yuzeng ayingbao?”

²⁹Jisunü lalingcho, “Ayingba tsü hi, ‘Nyieng Israelrü! Abüdongba Ihsa Tsingrang du tsü Abüdongrü khung lile.

³⁰Nü lasih apümnü, nü nbü apümnü, nü lümlong apümnü ko nü tase apümnü Abüdongba nü Tsingrang müing.’

³¹Anyüuba yuzeng ayingba tsü hi: ‘Nü kurümrü abürü roh-i müing.’ Hinyi tenü ayingba yuzeng apa müle.”

³²Yuzeng adoba tsünü Jisu te yocho, “Tsale, athsingyurü! Nühnü yoba tsü yuje e, Abüdongba du tsü Tsingrangba ko abi chah khu apa Tsingrang müle.

³³Ko nyitsarünü abi lasih apümnü, abi lümlong apümnü ko tase apümnü Tsingrangba müibae, ko akurümrü abürü roh-i müibae. Ko kanglungrü ko apa mübonü Tsingrangba mübünung tenülü yuzeng anyüh hi nyinung alaa ayingba.”

³⁴Abinü dee thsehthsa lalingcho ngu Jisunü abi te yocho, “Nüh Tsingrangba Yanglih tenü ashu mah.” Hütsükotinü Jisu te atsingdhengba tsingdhengnung sünüsü müsi mümülahcho.

³⁵Jisunü amübükuh la thsingyude, abinü tsingdhengcho, “Mesia tsü David hung lanü thsanungepü yuzeng adorünü khüta yochehro?

³⁶Anbü Amüsanü jeng Davidnü yocho: “Abüdongbanü I Büdongba te yocho: Ihnü nü rorüh nü jing pohki müyohpüde I tsalangthring hila püm.”

³⁷David apunüsü abi te Abüdongba pü dsicho; hütsükhang Mesia tsü khütapü David chahnü thsanung? Mülung amülah khüdu Jisu te künyang nyi licho.

³⁸Abinü arüh te thsingyude, abinü yocho, “Yuzeng adorüti sürü arüh jengki asheng khyüpü yanglong la rachinyüro ko salüm khyünyüro,

³⁹sürünü Jihudarü amübükuh la ko thsüti la pümji atsauba mükuro arüh nengdang müzahmükieng.

⁴⁰Arühnü chomilarü nyüpmüseh arüh kuh zühjüre, ko atangnung anyahli dangkhidangnangre. Arüh amütsauba khingchinung!”

⁴¹Jisunü amübü thsi zahkehsing amünyeh pümpü nyitsarüti arüh thsi yohcho dhengcho. Alirü adrongnü thsi khütango yohcho;

⁴²hütsüde ailümrü chomilarü khüdunü paisa anyüh yohcho.

⁴³Abinü amonoti müjang abi yang dsibülung arüh te yocho, “Ihnü nührü te yore, amübü thsi zahkehsing la tsü aparü atümung tenü chomitpü tsünü alaa yohko.

⁴⁴Tunüo aparü tsü arüh lipü nyingcho lanü, ta hitpi, iilümseh, alicho apüm yohjüko, abükyü akang linung alicho apüm yohjüko.”