Read Sangtam Naga MARK 16 Bible Online

MARK 16 - Sangtam Naga bible

MARK 16

¹Sabath khupü, Mary Magdalin, Jakob atpa Mary ko Salomerünü wü Jisu fü chah müyühnung axümlichi tuji lihcho.

²Nyükhih dikeh nyangnyü mütoh nyü chürode, arühnü kong lang tsü wücho.

³Lang la arüh-e arührü chotacho, “Ihsa khyang sünü kong trahtri lanü lung tsü zehpehjünung?”

⁴Hütsüpü arühnü dhengde lung tsü dhipehpü ngucho.

⁵Achotsü arühnü kong la tsü züducho, hütsüde arühnü dhrezarü khüdu jengki athru khyüpü tsalangthring püm ngucho, ko arühnü drücho.

⁶Abinü yocho, “Tüdrü. Nührünü khala chah hamkehba Jisu yangchirepü Ihnü müdhele. Abi hila müle. Abi kangli roko! Dheng, arühnü abi hila yohpücho.

⁷Ade wüng ko amonoti te Peter zehnü hiba yusi jüng: ‘Abi nührü müngu Galil lang wüko; abinü nührü te yocho roh-i, hütsüla nührünü abi ngunung.’ ”

⁸Hütsünü arühnü chüducho ko kong la tsünü wahseh ko drüseh tsicho. Ta arühnü sütesü tu müyocho, tunüo arühnü drücho.

⁹Jisu kangli roba nyangnyü mütoh, akhudi abinü Mary Magdalin, sü chahnü amünyi nbü dhünyeh iipehjücho, abi te chüro ngusohcho.

¹⁰Abükyünü wü ashangrüti sürü tra meshonü licho arüh te yocho;

¹¹ko Jisu akang lile, ko abükyünü abi ngukopü yocho arühnü yuchi nye, abükyü chah arühnü yumüdsicho.

¹²Hütsüpü, arüh yola nyüh anyüh yanglang wüchi yade, Jisunü jengreng pa lanü chüro ngusohcho.

¹³Arühnü thali ropü aparü te yocho, ta arühnü yu müdsicho.

¹⁴Achangkathsa, Jisunü mono dhüre-kheh te arüh yangtsu yade chüro ngusohcho. Abinü arüh yübücho, tunüo arüh yudsi mülicho ko abi akang li ngurüchah yudsinung hongziracho.

¹⁵Abinü arüh te yocho, “Limih apümlang wüng ko amüi tsurü atümung te yuse atsa tsü thsingyung.

¹⁶Sünü yudsiro ko baptiro abi khümchonung; sünü yumüdsiro abi mülangjünung.

¹⁷Ko yudsirüti khyang thsayahiya nguchisohnung: I nengla arühnü amünyi nbüti iipehnung; yu apanü chonung;

¹⁸arühnü mürü thromüsu nye, mahkhang müyüh yong nye, arüh müdhsakehnung; arühnü füthsarü chah khehnü thahpünung ko arüh kyangnung.”

¹⁹Abüdongba Jisunü arüh te chotapü khanglang, abi ninglang nükeh küducho ko Tsingrangba tsalang pümsohcho.

²⁰Monotinü wü apümlang thsingyucho ko Abüdongbanü arüh yola nguchicho thsayahiya khunü arühnü thsingyuba tsü yuje-epü yuzi jücho. [Anyüu Ahi Achangka Khingkurüti tsünü wü Peter ko ashangrüti te arüh te yocho roh-i yusi jücho. Hütsüpü, Jisu apunü amonoti khunü nyüchürolangnü nyü züdu chii Amüsa ko müchangkaba akangcheh lede liba yusi nengdang müthehcho.]