Read Sangtam Naga MARK 2 Bible Online

MARK 2 - Sangtam Naga bible

MARK 2

¹Nyümong azachah lipü Jisu Kapernaum lang thalicho, ko abi kuhla lilepü sobhocho.

²Hütsünü nyitsarü khütango shibülungchonü kuhla ko kuhbenüsü müzuhcho; ko Jisunü arüh te yusi tsü thsingyucho.

³Hütsütade dsidsisonü füthsarü nyüh khüdu Jisu yang nyüh müyünü dhipü rocho.

⁴Ta sühdirachonü arühnü abi yang no müzüduchehcho. Hütsünü Jisu üde kuhmung rohphohpü nyitsarüba tsü yüpji chah tsünü dhichahchücho.

⁵Arüh yudsi mülahcho ngu, Jisunü dsidsisonü thsaba te tsü yocho, “Itso, nü münyi pehjüko.”

⁶Hütsüla yuzeng adorü khürü arüh lüm la tsingdhengnü pümcho.

⁷“Abinü hi te chonung müsi mülahrü ang? Hi Tsingrangba müthsamünyüre! Tsingrangba dunü münyi pehjünung kohle!”

⁸Khüdupinü Jisunü arühnü lümba tsü müdhecho, achotsü abinü arüh te yocho, “Nührünü tuepü hita lümro?

⁹Hiba dsidsisüba te, ‘Nü münyi pehjüko! pü yonung amülaba a’, mahkhang, ‘Shemüsung, nü yüpji dheng, ko tsehng pü yonung amülabao’?

¹⁰Khang, Ihnü nührü te yonung, Nyitsarü Tsurü hiba limih la münyi pehjünung tase kehle.” Hütsünü abinü dsidsisüba te yocho,

¹¹“Ihnü nü te yore, Shemüsung, nü yüpji dhieng ko kuh lang wüng!”

¹²Arüh atümungnü dheng yade, nyitsarüba tsü shemüsucho, ayüpji dhicho ko dhsüthsa tsicho. Arüh atümung dee nyemüyangcho ko Tsingrangba neng senü yocho, “Ihrünü hiroh-i khodesü müngudheng!”

¹³Jisunü Galil kihdi bekhüm lang thali wücho. Ko amülung amülah abi yang rocho, ko abinü arüh te donung dikehcho.

¹⁴Ko abi lahkhu tside, alihmüthsü dhrirü nyüh khüdu, Alfaeus tsurü Levi, abi office la püm ngucho. Jisunü abi te yocho, “Ih iirung.” Levinü shemüsu abi iiwücho.

¹⁵Akhanglang Jisu tsü Levirü kuhla yangtsu pümde, alihmüthsü dhrirü ko münyirü adrong Jisu ko monoti yola pümcho; tunüo arüh adrong abi yola zehcho.

¹⁶Yuzeng adorü khürü sürü Farisirü thsacho, arühnü Jisu tsü alihmüthsü dhrirü ko münyirü te tsuyongrüta ngu, abi monoti te tsingdhengcho, “Tuepü abinü hitari yola tsuyongro?”

¹⁷Jisunü hütsü yuchi lalingcho, “Tsayengrü nengdang akyangjürü müdhsüdah, ta füthsarü nengdang dhsüdahre. Ih amüsarü nengdang mah, ta münyirü dsinung rocho.”

¹⁸Bekhyah khüdu baptijüba Johan ko Farisirüti kongnü licho. Nyitsarü khürünü Jisu te ro tsingdhengcho, “Tuepü baptijüba mono ko Farisirü monoti kongde, nü monotilü mükongro?”

¹⁹Jisunü lalingcho, “kukangba thsütila shirü tsü kongnung athsalang mah-o? Hütsüta mah! Kuthriba arüh yola lidelü arüh kongnung mükoh.

²⁰Ta khode arüh yolanü kuthriba tsü no tsinang, hütsüde arüh kongnung nyümong tsü ronung.

²¹“Shü asi ahi chah sünüsü mükhümkehre, tunüo asi tsü tsingnung ko shü athreh tsü rehphohnü, akhi adiuthring tbehsohre.

²²Mahkhang sünüsü cikih asi shuküp shinga ahi la müliire, tunüo cikih tsünü shuküp tsü tsohrüpnung, ko shinga e cikih anyüding müzangnung. Hütsü müli, cikih asi tsü shinga asi la liibae.”

²³Sabath nyümong Jisunü luh lahkhu tsicho. Ko monotisü abi yola woyade, arühnü fürü müyeh tsunung dikehcho.

²⁴Hütsünü Farisirünü Jisu te yocho, “Dheng, Sabath nyümong nü monotinü hütsü roh-i nguchiba tsü ihrü yuzeng nyüm nguchire!”

²⁵“David ko anyitsarüti thsütah ko yangseh lide, abinü tu nguchicho nührünü khodesü mükhidhengcho do?

²⁶Abinü Tsingrangba kuhla züducho ko Tsingrangba khyang mübücho hümthse tsucho. Hiba hi Abiathar bebü amungthri thsade tikehcho. Ihrü yuzengnü, hitari tsuyongnung tsü bebürü dunü tsunungbae, ta Davidnü hütsü tsucho ko anyitsarü khyangsü jücho.”

²⁷Ko Jisunü yocho, “Sabath nyümong tsü nyitsarü tsanung nengdang külüpcho; Sabath nyümong nengdang nyitsarü mükülüp.”

²⁸Hütsüeko Nyitsarü Tsurü tsü Sabath nyümong michahsü Abüdongba.