Read Sangtam Naga MARK 3 Bible Online

MARK 3 - Sangtam Naga bible

MARK 3

¹Hütsüpü Jisunü Sinagog lang wücho, hütsüla akheh sücho nyüh khüdu licho.

²Hütsüla nyitsarü khürünü Jisu mülang jünyo; abinü Sabath nyümong kyangjü a mahnangpü dee khengyengnü licho.

³Jisunü nyitsarüba te tsü yocho, “Hila kürung.”

⁴Hütsüpü abinü arüh te tsingdhengcho, “Ihsa yuzengnü Sabath nyümong tu nguchinung müla liro? Rükunung a lerohpehjünung? Nyitsarü akang khüdu khümchonung a mahkhang hütsü changjünung?” Ta arühnü tusü müyocho.

⁵Jisunü arüh dhengde wahcho, ta arüh hongzicho nengdang müinü lümcho. Hütsüpü abinü nyitsarüba te tsü yocho, “Nü kheh müyungchüng.” Abinü hütsü müyungchücho, ko hütsü tsapecho.

⁶Hütsünü Farisirünü khüdupinü amübükuh pehjüpü Herod monoti te shirüta, arühnü Jisu süsohnung rah külüpcho.

⁷Jisu ko abi monoti Galil kihdi lang wücho, ko amülung amülah abi khanglang iiwücho.

⁸Arüh tsü Galil lanü, Judea lanü, Jerusalem lanü ko Idumea lanü, ko Jordan khüulangnü ko Tyre ko Sidon mükang lanü. Hiri atümung tsü Jisunü nguchicho yuchi abi yang rocho.

⁹Amülung tsü dirachonü abi münyingpehsohnung kihtang khüdu rungnümjüngpü amonoti te yocho.

¹⁰Abinü adrong kyangjüko, ko füthsarü atümungnü abi chah thahpünung nyingta abi yanglang rocho.

¹¹Khodederü amünyi nbü kehrünü abi ngurünang, ajingte khülutsu züde yocho “Nüh Tsingrangba Tsurü!”

¹²Jisunü abi tsü sünang sütesü tüyo pü amünyi nbüti te khah-khah yuzeng jücho.

¹³Hütsüpü Jisunü azong khüdu chah tuwüpü abinü khyünyücho nyitsarü apu yanglang dsicho. Arühnü abi yanglang rocho,

¹⁴ko abinü dhüre-anyüh throchehcho, ko arüh te riwürüti pü dsicho. Abinü arüh te yocho, “Ihnü nührü I te linung throchehre, nührü thsingyunungsü wüsohnung,

¹⁵ko nührünü amünyi nbü iipehnung zii kehnung.”

¹⁶Abinü throchehcho dhüre-anyüh tsü hiri: Simon (Jisunü Peter pü dsicho);

¹⁷Jakob ko ani Johan, Zebedi tsurüti, (Jisunü arüh te Boarneges, adüzü, “Ningki zati pü dsicho”);

¹⁸Andria, Filip, Bartholomeu, Mathi, Thomas, Alfaeus tsurü Jakob, Thadeus, Simon suro müirü,

¹⁹ko Judas Iskariot, sünü Jisu kihyochücho.

²⁰Hütsüpü Jisunü kuh lang wücho. Adesü amülung amülah shibülungchonü Jisu ko amonoti tsuyongnungsü bekhyah müngucho.

²¹Khode kuhla lirünü hütsü yuchicho, abi dhengyehnung wücho, tunüo nyitsarütinü, “Abi mükyangle!” pü yocho.

²²Jerusalem lanü rorüh yuzeng dorü khürünü yocho, “Abi chah Beelzebul zehle, hiba hi motsing yola adiuba sünü abi khyang amünyi nbü iipehnung tase jüre.”

²³Achotsü Jisunü arüh abi yanglang dsi arüh te yukitabanü chotacho: Satan-nü khüta satan iipehchehnung?

²⁴Limih khüdu ajangjang changnahnü arüh khatakhang, hütsüba limih tsü khülunung.

²⁵Kuhkhi khüdu ajangjang changnahnü arüh khatakhang hütsüba kukhi tsü khülunung.

²⁶Hütsüta, satan yanglih tsü changnahkhang, kumütsüp khülunung ko changkapehnung.

²⁷“Sünüsü rezeh nyitsarü tsü rah müyohpüde abi kuh rohphoh kohro hitsinung mükohre, ta rezehba tsü akhu rah yohpüpü du abi kuh lanü kengchonung kohnung.

²⁸“Yutsatsa Ihnü nührü te yore, Nyitsarü münyiti ko Tsingrangba nyüm müchümükehcho apüm mülangpehjünung kohle.

²⁹Ta sürünü Anbü Amüsa nyüm choro khodesü arüh mülang müpehjünung, tunüo abinü müchangkaba münyi shitpahko.”

³⁰(Jisunü hi yoba tsü, nyitsarü khürünü, “Abi chah amünyi nbü kehlepü yocho khu lile.”)

³¹Hütsüde Jisu atpa ko anirüti rocho. Arüh kuh bete yapü abi dsisohcho.

³²Amülung khüdu abi mükang pümcho, ko arühnü abi te yocho, “Dheng, nü tpa e nü nirüti nüh yangchi kuh bete yale”

³³Jisunü lalingcho, “Itpa süo? I nirüti sürüo?”

³⁴Abinü abi mükang pümrü chah dhengnü yocho, “Dheng, hila Itpa ko I nirüti lile.

³⁵Sünü Tsingrangbanü abi khyang tu nguchisohnyüro hütsü nguchiro, abi tsü I jünirü ko Itpa lile”.