Read Sangtam Naga MARK 5 Bible Online

MARK 5 - Sangtam Naga bible

MARK 5

¹Jisu ko amonoti Galil kihdi khüulang Gerasa lih tsü chihcho.

²Jisu kihtang lanü chüroyeng, nyitsarü khüdu kongyo langnü ro abi shirücho. Hiba nyitsarü chah amünyi nbü khüdu licho

³ko abi kongyo la du licho. Adelü sünüsü abi rah müyohpüchehcho.

⁴Adrongpi ajing akheh tpolu yonü rahjücho, ta abinü tpolu yo tsü tohnah ko jingkhehka idhse tsü mapnahpehjücho. Abi rahsehnung tsü abi müküpracho.

⁵Ama tsingse abi kongyo la ko azong la, khong apu chah lungnü tsehnah rachicho.

⁶Abinü ashu lanü Jisu ngu shang wü ajing chah mükhukeh

⁷yuva amülahnü khongcho, “Jisu, Amichahba Tsingrang Tsurü! Nüh I chah tu nguchinyüro? Tsingrangba neng lanü, Ihnü nü te kihchire, Ih tükhingchi!”

⁸(Abinü hi yoba tsü, Jisunü “Amünyi nbü, hiba nyitsarü chahnü chürung pü yocho khunü licho!”)

⁹Achotsü Jisunü abi te tsingdhengcho, “Nü neng süo?” Nyitsarüba tsünü lalingcho, “I neng ‘Legion’ tunüo ihrü khütangoe.”

¹⁰Ko abinü Jisu te amünyi nbüti tsü hütsü lih lanü tüipeh pü mütozah kihchicho.

¹¹Hütsüla shüka tii khüdu, azonglangthring thütsuthüyong rachicho.

¹²Hütsünü anbüti tsünü Jisu te kihchicho, “Ihrü shükati yanglang müthehng ko arüh chah züdusohng.”

¹³Abinü arüh müthehcho, ko amünyi nbü tsü nyitsarü chah tsünü chüro shüka tii chah züducho. Shüka tii apümnü hajar anyüh-o tsü lungdhong la tsohnah jowü kihdi la thsangsehcho.

¹⁴Shüka nyahrü tsünü shang wünü hiba yusi tsü yangdi la ko yangdongti la sobhocho. Ko nyitsarütinü atikehcho tsü dhengnung wücho.

¹⁵Ko khode arüh Jisu yanglang rocho, amünyi nbü liba nyitsarüba tsü hütsüla atsatsa kangpü shü müpipü püm ngucho; ko arüh atümungnü drücho.

¹⁶Hütsü ngurütinü amünyi liba nyitsarü ko shükati chah tu tikehcho hütsü aparü te yocho.

¹⁷Hütsünü arühnü Jisu te arüh lih pehjünung kihchicho.

¹⁸Jisu kihtang la züdu yade, amünyi nbü liba nyitsarü tsünü abi te kihchicho, “Ihsü nü yola ronung.”

¹⁹Ta Jisunü abi münü. Ta abi te yocho, “Nü tsutpurü yanglang thali wüng ko Abüdongbanü nü nengdang khütoh-i nguchicho ko müicho arüh te young.”

²⁰Nyitsarüba tsünü hütsü pehjücho ko yangdi dhüre bongnü, Jisunü abi nengdang tu nguchicho hütsü yo wücho. Ko sürünü hütsü yuchicho atümungnü nyemüyangcho.

²¹Jisunü kihkeh khüulang tsü thali wücho. Hütsü kihdi müshüm amülung amülah abi mükang shibülungcho.

²²Sinagog la ayingthsarü khüdu Jairas rocho, ko khode abinü Jisu ngucho, ajangjang abi jingte mükhukehcho,

²³ko abinü dee kihchi yocho, “I tsulatpü dee mütsa füthsale, abükyü kyangnung ko akang linungthsa yanglilüm rung, ko nü khehnü abükyü chah thahpüng.”

²⁴Hütsüde Jisunü abi yola shemüsucho. Jisu te Nyitsarü khütango wüchonü abi apümlangnü mükangticho.

²⁵Hütsüla khingkurü khüdu kang dhüre-anyüh dee mütsa ashüh shonü,

²⁶akyangjürü adrongnü tronye mütsapü licho. Abükyü thsi apüm pehkhangcho, ta atsau kangnung mahpü amütsau du kangcho.

²⁷Abükyünü Jisu nengdang yuchicho, achotsü amülung yola abi khanglang iicho.

²⁸Abükyü jangjangthsa yorü, “Ihnü abi shüh chah dusü thahpükhang, Ih kyangnung.”

²⁹Abükyünü abi fükhüm chah thahpücho, ko khüdupinü ashüh shoba tsü zahpehcho; ko abükyü fünü adhsa tsü kyangkopü müdhecho.

³⁰Khüdupinü Jisunü abi chahnü zii tsikopü müdhecho; hütsünü abinü amülung la tsü ximüla tsingdhengcho, “Sünü I shü chah thahpücho?”

³¹Amonotinü lalingcho, “Nyitsarünü mükangticho nühnü ngule; tuepü sünü nü chah thahpücho pü tsingdhengro?”

³²Ta Jisunü sünü thahpüchonang pü dhengmükangcho.

³³Khingkutpü tsünü abükyü chah tu tikehcho hütsü müdhe, abükyü tsü adrüchonü dhridhriseh rocho ko ajing te mükhukeh, atikehcho apüm yuje yocho.

³⁴Jisunü abükyü te yocho, “I tsulatpü, nü yudsinü nüh kyangjüko. Tülümxüpü tsieng, ko nü dhsara lanü kyangpü lieng.”

³⁵Jisunü hi yochi yade, Jairasrü kuh lanü yusi hirü khürü ro abi te yocho, “Nü tsulatpü süko. Adelü athsingyuba tsü tülongmüzi.”

³⁶Arühnü yoba tsü Jisunü münyipü, abi te yocho. “Tüdrü ta yudsing.”

³⁷Hütsüpü abinü Peter, Jakob ko ani Johan chah khu süsü abi mü-iirosohcho.

³⁸Arüh Jairas kuh chihcho, khüde Jisunü mümapcho ko trakhitrayo yuchicho.

³⁹Abinü züducho ko arüh te yocho, “Tuepü hidoi trakhitrayoro? Azarü tsü müsü, ta yüpsehcho due!”

⁴⁰Arühnü abi münyüjücho, achotsü abinü arüh atümung tsisohcho, ko azatpü au ko atpa ko amono asang nüpü azarü yüpjocho chongsah la tsü züducho.

⁴¹Abinü abükyü khehnü marepü yocho, “Talitha Koum”, Khüi adüzü, “Lazarü, Ihnü nü te yore, surung!”

⁴²Khüdupinü abükyü tsü tsohmüsucho ko mükangnü tsehnung dikehcho. (Abükyü tsü kang dhüre-anyüh thsacho). Khode hi tikehcho arüh dee nyemüyangcho.

⁴³Ta sütesü müyonung arüh te yuzeng khükhah jücho, ko abinü yocho, “Abükyü khyang lango atsunung jüng.”