Read Sangtam Naga MARK 8 Bible Online

MARK 8 - Sangtam Naga bible

MARK 8

¹Tunyah mülipü apa amülung amülah khüdu shibülungcho. Khode nyitsarüti tsü atsunung tusü mülicho, Jisunü amonoti dsinü yocho,

²“Ihnü hiri nengdang thsa lümre, tunüo arüh I te nyümong asang liropü ade atsunung tusü müle.

³Ihnü arüh müyangtüp-pü tsisohkhang arüh lang la kongsehnung, tunüo khürülü lang ashu lanü rocho lile.”

⁴Amonotinü abi te tsingdhengcho, “Khüde lipilih hila nyitsarü hidoi yangtüpnung tsuyongnung ngunung?”

⁵Jisunü arüh te tsingdhengcho, “Nührü hümthse khüdoi liro?” Arühnü lalingcho, “Hümthse dhünyeh.”

⁶Abinü amülung tsü alih la pümnung mülacho. Hütsüpü abinü hümthse dhünyeh tsü bipü, Tsingrangba khyang anengse jücho, ko chenah amonoti khyang chahlanung jücho; ko arühnü chahla jücho.

⁷Arüh khehla nguh nümnümsü azikyah licho. Jisunü hiri nengdangsü anengse jüpü arüh khyang chahlanung jücho.

⁸Nyüpüm müipi mi jeng tsucho, ko hütsüla nyüh hajar müyü-o licho.

⁹Hütsüpü monotinü nyingchonyingda loh dhünyeh jeng khyübülungcho. Jisunü nyitsarü tsü shishosohpü

¹⁰zahnü amonoti te kihtang khüdu chah küdupü Dalmanutha lih lang tsicho.

¹¹Farisirü khürü ro Jisu te rehtamüsucho. Arühnü abi xohsohnyo abi te abi Tsingrangba chahnüepü müdhenung thsayahiya khüdu nguchingpü tsingdhengcho.

¹²Ta Jisunü asah soh müshüpü yocho, “Tuepü chünye nyitsarütinü thsayahiya yangchiro? Ihnü yore, hiri nyitsarü khyang hitari yuzi müjünung!”

¹³Abinü arüh pehjücho, ko kihtang la züdupü shemüsu kihkeh khüulang wücho.

¹⁴Monotinü hümthse kükyo hinung nbüchücho ko kihtang la arüh te hümthse khüdu du licho.

¹⁵Jisunü arüh müzahsohnü yocho, “Nyieng, Nührünü Farisirü ko Herodrü bhüpza nengdang müzahmükieng.”

¹⁶Arühnü arüh yola thüptanung dikehrü, “Abinü hi Ihsa hümthse mülichonü yore.”

¹⁷Jisunü arühnü yoba tsü müdhe arüh te tsingdhengcho, “Tuepü hümthse mülicho nengdang nührünü chotaro? Nührünü ade yingcheh mümüdhe mahkhang münyichehrü ang? Nührü lasih hidoi müküprü ang?

¹⁸Nahtse kehpü müngurü ang? Nangku kehpü müyuchirü ang? Mülümchehrü mah-o?

¹⁹Ihnü nyüh hajar münga nengdang hümthse chenahbasü. Nührünü anyingcho loh khüdoi khyübülungcho?” Arühnü lalingcho, “Loh dhüre-anyüh.

²⁰“Ko Ihnü hümthse dhünyeh nyitsarü hajar müyü nengdang chenahde, Nührünü nyingchonyingda loh khüdoi jeng khyübülungcho?” Jisunü tsingdhengcho. Arühnü lalingcho, “Loh dhünyeh.”

²¹Abinü arüh te yocho, “Ade yingcheh nührünü münyichehrü ang?”

²²Arühnü Bethsaida lang rocho, khüde Jisu yang nahtohrü nyüh khüdu noro abi chah thahpüjüng pü kihchicho.

²³Jisunü nahtohba tsü akhehnü shüripü yang lanü nümüi tsicho. Anahtse la tsü müjü müchokehjüpü, Jisunü abi chah akhehnü thapo tsingdhengcho, “Nühnü tu münguo?”

²⁴Nyitsarüba tsü tsungmüsupü yocho, “Ho, Ihnü nyitsarü ngule, ta arüh singdong kyo tsehchi ngure.”

²⁵Jisunü anyüpiu nyitsarüba nah la tsü thahpücho. Adelü abinü dhengkeh dhengcho, anahtse tsa kangcho ko lüpcho tsitsa ngucho.

²⁶Hütsüpü Jisunü kuh lang müthehchü yocho, “Yang la tsü thali tüzüdu.”

²⁷Hütsüpü Jisu ko amonoti Kaisaria Filipi yangdongti lang wücho. Lang la abinü arüh te tsingdhengcho, “Nyitsarünü Ih süepü yoro?”

²⁸Arühnü lalingcho, “Khürünü nüh tsü baptijüba Johan epü yore; khürünü Elija, khürünü azikehrü yola khüduepü yore.”

²⁹Abinü arüh te tsingdhengcho, “Khang nührünü khüta! Nührünü Ih süero?” Peternü lalingcho, “Nüh Mesia tsü-e.”

³⁰Hütsüde Jisunü yuzeng jonü yocho, “I nengdang sütesü tüyo.”

³¹Hütsüpü Jisunü amonoti te thsingyunung dikehcho: “Nyitsarü Tsurü dee chongchabae, azirüti, bebü ayingti ko yuzeng adorütinü abi mükhyüchonung. Abi süsohnung, ta nyümong asang khanglang kangli ronung.”

³²Abinü arüh te hi dee tsitsa yocho. Hütsünü Peternü abi nükhu yübüchicho.

³³Ta Jisunü ximüla amonoti chah dhengnü Peter yübüchi yocho, “Satan, I tenü shehkhung, Nü lümcho tsü Tsingrangba chahnü müro ta nyitsarü chahnüe!”

³⁴Hütsüde Jisunü amülung ko amonoti abi yanglang dsinü yocho, “Khürünü I khanglang ronyükhang, abinü apu nbüchopehbae, ko apu khala dhipü Ih iirung.

³⁵Tunüo sünü palu akang khümchonyüro hütsü changnung; ta sünü I nengdang ko Yuse atsa nengdang akang changnang hütsü khümchonung.

³⁶Nyitsarü khüdunü limih apüm jingchopü apu akang changkhang abi lango jingchorü mah-o? Khodesü mah!

³⁷Apu akang ngulinungthsa abinü ajünung tusü müle.

³⁸Hiba Tsingrangba mümüdheba ko amütsa nyümong la sünü Ih ko I thsingyuba mihmüxüpnang, Nyitsarü Tsurünüsü Au ahechi la amüsa ninglangrü yola rode, abi nengdang mihmüxüpnung.”