Read Sangtam Naga LUK 1 Bible Online

LUK 1 - Sangtam Naga bible

LUK 1

¹Amüi Theofilus: Ihrü yola atikehcho nengdang yusi thrahnung nyitsarü adrongnü palu kohcho nguchiko.

²Arühnü thrahba tsü hiri adikeh lanü sürünü ngucho ko sürünü yusi tsü sobhocho arühnü ihrü te yochoba lile.

³Hütsüeko, adirü Theofilus, arüh adikeh lanü Ihnü hiri khiyu apüm nengdang müzahmüki lümdhengko, ko nü nengdang achunglangnü thrahnung atsau thsanungepü Ihnü lümcho.

⁴Nü te doyoba lüpcho yuje tsü nühnü ajeng müdhenungthsa Ihnü hi thrahre.

⁵Judea la Herod yangthsa shikhe la, bebürü khüdu anengnü Zekaria, bebürü hung Abija chahnü rochoba licho. Anitpü aneng Elizabeth; abükyüsü bebü hung lanü licho.

⁶Anyüdingnü Tsingrangba jingte Abüdongba yuzeng atümung yochonyi akang atsa licho.

⁷Anyüh tsurü mülicho tunüo Elizabeth tsü atungcho thsacho, ko anyüding dee shizi kangcho.

⁸Nyümong khüdu Zekaria amübükuh la, abi alehcho bebü nguchi dikeh yacho.

⁹Bebürünü bichiba yangthsa roh-i, bholu chah müchiji tahnung abi chah zii thsakehcho. Hütsünü abinü Abüdongba amübükuh la züducho,

¹⁰ko müchiji tahba bekhyah sühdi tsü kuh bete dangkhidangnang yingcho.

¹¹Müchiji tahba bholu tsalangthring Abüdongba riwürü khüdu chürocho.

¹²Zekarianü abi ngude, abi nehcho ko drücho.

¹³Ta riwürü tsünü abi te yocho, “Tüdrü, Zekaria! Tsingrangbanü nü dangkhidangnang yuchiko, nü nitpü Elizabethnü nü khyang azarü khüdu nümüsujünung. Ko nühnü abi neng Johan dsijünung.

¹⁴Khode abi suronang nü akünyang khütoh-i ko aparüsü akünyang khütoh-i thsanung!

¹⁵Abi Abüdongba jingte amülah kangnung. Abinü yongkha tusü müyongnung. Abi asuro denü Anbü Amüsanü jeng linung,

¹⁶ko abinü Israelrü adrong arüh Tsingrang Abüdongba yang thali noronung.

¹⁷Abinü azikehrü Elija kyo rezehnü Abüdongba müngu wünung. Abinü auti ko azarüti kehtalijünung; abinü ayocho münyirüti amüsaba langlang ximülasohnung; abinü Abüdongba nyitsarüti abi nengdang rungnümsohnung.”

¹⁸Zekarianü riwürü te tsü yocho, “Ihnü hütsü khüta müdhenung? Ih ashirü ko I nitpüsü ashilarü kangko.”

¹⁹Riwürü tsünü yocho, “Ih Gabriel,” “Ih Tsingrangba bete yaba, abinü nü te chotanung ko yusi atsa yonung Ih müthehcho.

²⁰Ihnü nü te nyengchoba tsü abükyü becho la tikeh ronung. Ta nühnü I chah müyudsichonü; nü tsudhre suro yingcheh nüh yu müchochehpü linung.”

²¹Nyitsarütinü Zekaria tuepü hidoi nyahli amübükuh la tsü liro pü nyemüyang abi yingcho.

²²Khode abi chürocho, abinü arüh te müchotachehcho, hütsünü arühnü amübükuh la tsü abinü müngucheh ngukopü müdhecho. Yu khüdusü müchochehchonü, abinü akhehnü iichi arüh te chotacho.

²³Khode amübükuh la abi nguchi thümcho, Zekarianü kuh lang thalicho.

²⁴Tunyah mülipü anitpü Elizabeth afü müdeng kangcho ko choo münga kuh lanü mübüchehcho.

²⁵Abükyünü yocho, “Ade achangka la Abüdongbanü Ih dee troko. Abinü Ih ashah khyümüijüko!”

²⁶Elizabeth fü müdeng kangpü choo adhüroh-u chah Tsingrangbanü riwürü Gabriel Galil la yangdi khüdu Nazaret lang müthehcho.

²⁷Yangthsaba David chahnü trahchocho nyüh khüdu anengnü Josef te xengnung nyengcho liba amüthsengcheh lazarü yang yusi hirocho. Lazatpü neng tsü Mary thsacho.

²⁸Riwürü tsünü abükyü te ro yocho, “Nü te atbachi lieng! Abüdongba nü te lile ko nüh dee müwajüko!”

²⁹Riwürü yusi tsünü Mary dee mükyahshangchehcho, ko abi yu tsü tukhunang pü nyemüyangcho.

³⁰Riwürü tsünü abükyü te yocho, “Tüdrü, Mary; Tsingrangbanü nüh dee chomangko.

³¹Nü fü müdeng kangnung ko dhrezarü khüdu nümüsunung, ko nühnü abi neng Jisu dsinung.

³²Abi arangcheh kangnung ko abi te Amichahba Tsingrangba Tsurü pü dsinung. Abüdongba Tsingrangbanü abi jümürü David roh-i, yangthsarü kangsohnung,

³³ko abi lede nengdang Jakob tsutpu la yangthsarü kangnung; ko abi yanglih khodesü müchangkanung!”

³⁴Marynü riwürü te tsü yocho, “Ih müxengcho lazarü due. Khang, hi khüta akohnung?”

³⁵Riwürü tsünü yocho, “Anbü Amüsa nü chah ronung ko Tsingrangba zii nü chah linung.Hütsünü asuronung liba Amüsa azarü te tsü Tsingrangrü Tsurü pü dsinung.

³⁶Nü jünilarü Elizabeth tsü lümchehng. Abükyü azarü mülinungecho, ta dee ashilarü thsanye adelü abükyü long la choo dhüroh role.

³⁷Tunüo Tsingrangbanü münguchichehnung tusü müle.”

³⁸“Ih Abüdongba kulilarü,” Marynü yocho; “Nühnü yocho roh-i I chah hütsü tikehsohng.” Ko riwürü tsünü abükyü tenü zacho.

³⁹Tunyah mülipü Marynü rungnümpü Judea azong lih la yangdi khüdu yang dhsüthsa wücho.

⁴⁰Abükyünü Zekariarü kuhla züdu Elizabeth te Salüm yu yocho.

⁴¹Khode Elizabethnü Mary salüm yu yuchicho, ami la akhunga tsünü shungchicho. Elizabeth Anbü Amüsanü jengcho

⁴²ko yuva athsengnü yocho, “Khingkurü atümung yola nüh dee amüwatpü, ko nühnü nümüsunung liba akhunga tsü amüwa thsaang!

⁴³I Büdongba atpanü Ih xodhengnungthsa hitoh-i I chah tuepü tikehcho?

⁴⁴Tunüo nü salüm yu yuchide, I mi la akhunga tsü akünyangnü shungchiko.

⁴⁵Abüdongba yusi tsü nü chah tikehnungepü yudsinung tsü nüh khütoh-i akünyangnung!”

⁴⁶Marynü yocho, “I lasihnü Abüdongba nengsere;

⁴⁷I Kangchehjüba Tsingrang nengdangnü I nbü künyangre,

⁴⁸tunüo Ih apohkiba akulilatpü abinü lümchehcho! Ade tinü nyitsarü atümungnü I te amüwa ngulatpü pü dsinung,

⁴⁹tunüo Akohbong Tsingrangnü I nengdang nguchi arangcheh nguchicho ngang. Abi neng Amüsa;

⁵⁰Shangnü shang sürünü abi jengreng drüro abinü arüh te chomangre.

⁵¹Abinü apu rezeh kheh müyungchücho ko amüthsehrü atümung ko arüh arah te thsangnyangjücho.

⁵²Abinü athrungrü yangthsarüti yangthsaba pümji lanü nüchocho, ko azikyahrü dhikehcho.

⁵³Abinü yangkongrü atsanü jengjücho, ko alirü khehshü tsisohcho.

⁵⁴Abinü ihrü jümürü te nyengchocho yohpücho ko abi kulirü Israelrü tronung rocho.

⁵⁵Abinü Abraham ko abi chahnü trahchocho atümung te lede nengdang achomang ngunung lümkehcho!”

⁵⁶Marynü Elizabeth te choo asango lipü kuh lang thalicho.

⁵⁷Elizabeth zatbünung becho chihcho, ko dhrezarü khüdu nümüsucho.

⁵⁸Kurümrüti ko tsutpurüti atümungnü Abüdongbanü abükyü te khütoh-i tsa nguchicho hütsü yuchicho, ko arüh atümung abükyü yola künyangtacho.

⁵⁹Akhunga tsü nyükhih khüdu pide, arühnü abi müjüp-pehnung norocho, ko arühnü abi neng au kyo Zekaria dsijünyücho.

⁶⁰Ta atpanü yocho, “Imoh! Abi neng Johan dsijünung.”

⁶¹Arühnü abükyü te yocho, “Nührü tsutpurü yola neng hi sünü dsi müle!”

⁶²Hütsütade arühnü au te abinüsü azaba neng tsü sü dsijünyüropü khehnü mülachi tsingdhengcho.

⁶³Zekarianü athrahnung thrahva chingpü “Abi neng Johan” pü thrahcho. Arüh atümung dee nyemüyangcho!

⁶⁴Hütsüde tsü Zekarianü thali yu chonung kohcho, ko abinü Tsingrangba neng semüsucho.

⁶⁵Mükangmüshü lirü atümung adrünü jengcho, ko Judea azong lih atümung lang hiri yusinü jengcho.

⁶⁶Hütsü yuchirü atümungnü hütsü nengdang lümnü tsingdhengcho, “Hiba azarü hi tu kyo kangnungo?” Tunüo Abüdongba zii abi chah lile.

⁶⁷Johan au Zekaria tsü Anbü Amüsanü jengcho, ko abinü Tsingrangba yusi hicho.

⁶⁸“Ihsanü Israel Tsingrang, Abüdongba senung! Abi anyitsarü tronung ko lehchehjünung rocho.

⁶⁹Abinü Ihsa khyang akohba Kangchehjüba jüko, Abi kulirü David chahnü trahchocho khüdu.

⁷⁰Abinü papadenü apu Amüsa azikehrü khunü,

⁷¹Ihsa münyehrü kheh lanü ko thrünyirü tase lanü Ihsa khümchonung nyengchocho.

⁷²Abinü Ihsa jümürüti te achomang ngusohnung ko abi Amüsa azengtacho lümkehnung yocho.

⁷³Ihsa jümürü Abraham te yuchümnü, abinü arorüh kheh lanü Ihsa khümchonung ko tu adrü mülipü abi dikehsohnung nyengchocho,

⁷⁴

⁷⁵hütsünü Ihsa akang ayung abi jingte müsa linung.

⁷⁶Itso, nüh Amichahba Tsingrangba azikehrü dsinung. Nüh Abüdongba müngu abi nengdang lang rungnümnung wünung,

⁷⁷anyitsarü khyang arüh mülang pehjo arüh khümchonung yonung.

⁷⁸Ihsa Tsingrang tsü yanglilüm ko aküna. Abinü akangcheh vijing avisa Ihsa chah hekehjünung,

⁷⁹ko ninglangnü asü nbükhüm amarürah la lirüti atümung chah vijünung, ko atbachi lang Ihsa nünung.”

⁸⁰Azarü tsü zicho ko shutsa ko anbü la lümjingcho. Ko Israelrü te misha ngusohba nyümong müchihde abi lipilih la licho.