Read Sangtam Naga LUK 10 Bible Online

LUK 10 - Sangtam Naga bible

LUK 10

¹Hütsüpü khanglang Abüdongbanü apa mono nyührepü-anyüh throchehcho ko apu wünung liba yangdi ko müdüm müipi tsehleh nyüh anyünyüh müthehcho.

²Abinü arüh te yocho, “Luh khütango nyi lile, ta nyükheh müle. Hütsüeko luh Abüdongba te aluh maxanung nyükheh müthehng pü kihchieng.

³Wüng! Ihnü rangfüti yola san zati roh-i nührü müthehre.

⁴Thsiyohbong nye, shibha nye mahkhang jingkhüm nye tu tühi; ko lang la sükhyangsü salüm jünung tünyehli.

⁵Khode nührü kuh khüdu la züdunang, akhu hita young, ‘Hiba kuhla atbachi lieng.’

⁶Hütsüla atbachi tsurü likhang, nührü atbachi arüh chah küdung; mülikhang hütsü nührü yang thali ronung.

⁷Arühnü nührü khyang tu jünang hütsü tsu ko yongnü kuh hütsüla du müdong, tunüo anguchirülü palu nyükheh shi ngunung athsalang. Kuh mülichi müdong türachi.

⁸Khodederü nührü yangdi khüdu la züdunang ko khyüchonang, nührü khyang tu jünang hütsü tsung,

⁹hütsüla füthsarü kyangjüng ko I nyitsarü te, ‘Tsingrangba Yanglih nührü amünyethsa lilepü young.’

¹⁰Ta khodederü nührü yangdi khüdu la züdunang, ko mükhyüchonang, yanglong lang chüdung ko young,

¹¹‘Nührü yangdi lanü ihrü jingchah küducho asongsong mii nührü nyüm tiipehre. Ta hi müdheing, Tsingrangba yanglih nührü amünyethsa ro lile.’

¹²Ihnü nührü te ajüje yore, Yukha nyümong la Tsingrangbanü hütsüba yangdi tenü Sodomrü te yanglilüm alaa ngunung!

¹³“Nührü ahohah, Korazin! Nührü ahohah, Bethsaida! Thsayahiya khüi nührü yola nguchicho hütsü Tyre ko Sidon la nguchirelang, papadenü arühnü müyahshü khyüpü arüh chah tavi phikeh lasih thsamülapü liba thsako!

¹⁴Yukhaba nyümong la Tsingrangbanü nührü tenü Tyre ko Sidonrü te yanglilüm alaa ngunung.

¹⁵Kapernaum, nührü jangjang ningchi dhimüsunyücho mah-o? Nührü mümehmi la dhiyohchünung!”

¹⁶Jisunü amonoti te yocho, “Sünü nührü te nyiro, abinü I te nyire; sünü nührü mükhyüchoro abinü Ih mükhyüchore; ko sünü Ih mükhyüchoro abinü Ih müthehbong mükhyüchore.”

¹⁷Nyührepü-anyüh tsü künyangseh thalicho. Arühnü yocho, “Abüdongba, amünyi nbünü mii Ihrünü nü nengla yuzeng jüde nyiko.”

¹⁸Jisunü arüh te lalingcho, “Ninglangnü ningmüla roh-i Satan shohjo cho Ihnü nguko.

¹⁹Nyieng! Nührünü mürü ko khakikoh michah jüchinung ko arorüh tase apüm kohnung, ko tunüsü nührü müdhsakehsohnung Ihnü nührü khyang tase jüko.

²⁰Amünyi nbünü nührü yocho nyichonü tükünyang; ta ninglang yanglih la nührü neng thrahcho nengdang künyang.”

²¹Hütsü shikhe la Jisu Anbü Amüsanü jengpü künyangnü yocho, “Uwa, ning ko alih Abüdongba! Ihnü nü nengsere, tunüo nühnü amüdherü ko lümlong lirü tenü rang yohpücho amümüdherü te ngusohko. Ho, Uwa, hiba hi nühnü lümchobae.

²²I Unü I khyang lüpcho jüko. Atsudhre tsü sünang Au chah khu sünüsü mütsüp, ko atsudhre chah khu ko sürü te atsudhrenü abi mishanung throchehcho arüh chah khu sünüsü Au mümüdhe.”

²³Hütsüpü Jisunü amono yanglang ximüla rangnü yocho, “Nührünü ngubati ngunung tsü khüdoi amüwanung.

²⁴Ihnü nührü te yore, azikehrüti ko yangthsarütinü nührünü nguba tsü ngunyücho, ta arühnü müngucho, ko nührünü yuchiba tsü yuchinyücho, ta arühnü müyuchicho.”

²⁵Yuzeng dorü khüdu shemüsu Jisu xohsohnung müküpcho. Abinü tsingdhengcho, “Athsingyurü, müchangkaba akang ngunung Ihnü tu nguchinung?”

²⁶Jisunü abi te lalingcho, “Amüsa yunü tu yoro? Nühnü khüta nyichehro?”

²⁷Nyitsarübanü lalingcho, “‘Nü lasih apümnü, nü nbü apümnü, nü tase apümnü ko nü lümlong apümnü Abüdongba nü Tsingrang müing; ko nü kurümrü abürü roh-i müing.’ ”

²⁸Jisunü lalingcho, “Nühnü yuje lalingko,” “hütsü roh-i nguching ko nü akang linung.”

²⁹Ta yuzeng adoba tsünü apu langnyo Jisu te tsingdhengcho, “I kurümrü tsü süo?”

³⁰Jisunü lalingcho, “Nyüh khüdu Jerusalem lanü Jeriko lang jowüchi yade fükhohrüti dhsükeh abi jengki khoh khyüjücho ko xüpnahcho ko sünungthsa pehjüpü tsicho.

³¹Hütsüba lang la bebürü khüdu jowüchi ya detingcho; ta khode nyitsarüba tsü ngucho, abinü müri tsicho.

³²Hütsü roh-i Levirü khüdu rocho ko khode nyitsarüba tsü ngucho, abinüsü müri tsicho.

³³Ta Samariarü khüdu sü hütsüba lang la tsü woyacho, abinü nyitsarüba tsü chii rocho, ko khode abinü abi ngucho, abinü müi lümcho.

³⁴Abinü abi yang wücho, ko iha la tsü tuji ko cikih yohjüpü rümjücho; hütsüpü abinü apu gadu chah pümsohpü shilang kuh khüdu lang nowünü abi rükucho.

³⁵Nyümong khüu abinü thsi anyüh khyücheh shilang kuh nyahba khyang jücho. Abinü shilang kuh nyahba te yocho, ‘Abi rükung, Ih khode thali ronang, abi nengdang nühnü khüdoi alaa pehnang Ihnü nü khyang jünung.’ ”

³⁶Jisunü yocho, “Hiri asang yola fükhohrü te dhsükehba nyitsarü te khüibanü kurümrü roh-i bichichoepü nühnü lümro?”

³⁷Yuzeng dobanü lalingcho, “Sünü abi te müicho, hütsüvie.” Jisunü yocho, “Wüng, ko hütsü roh-i nguching.”

³⁸Jisu ko amonoti arüh lang la woyade, yang khüdu la rocho ko khingkurü khüdu anengnü Marthanü abükyü kuhla abi nüyohcho.

³⁹Ani khüdu anengnü Mary licho sü Abüdongba jingte pümpü abinü docho nyicho.

⁴⁰Marthanü anguchi khütango nengdang longbümcho, achotsü abükyünü ro yocho, “Abüdongba, Inilatpünü nguchi apüm I khyang du pehjüba hi nühnü mülümjürü ang? Abükyü te ro Ih troung pü young!”

⁴¹Abüdongbanü abükyü te lalingcho, “Martha, Martha! Nüh nguchi khütango nengdang longbüm lümtpahnahre,

⁴²ta nüh lango thsütahle. Marynü atsauba tsü throchehko, ko hütsü abükyü chahnü mühitsijünung.”