Read Sangtam Naga LUK 11 Bible Online

LUK 11 - Sangtam Naga bible

LUK 11

¹Nyümong khüdu Jisunü müdüm-o chah dangkhidangnang licho. Khode abi thümcho, amono yola nyüh khüdunü abi te yocho, “Abüdongba, Johan-nü amonoti te thsingyucho kyo ihrü te dangkhidangnang doung.”

²Jisunü arüh te yocho, “Nührünü dangkhidangnangde hiroh-i young: “Uwa: Nü neng amüsa hechisohng; Nü yanglih rosohng.

³Ihrü khyang nyümong mükhu tsuyongnung khülo.

⁴Ihrü te thsamehrü khyang Ihrünü mülang pehjücho roh-i, Ihrü mülang pehjüng. Ko ihrü athsatsü yang tünü.”

⁵Ko Jisunü amonoti te yocho, “Nührü yola nyüh khüdunü shangrü kuh khüdu yang yürüptülung la wü abi te yonung, ‘I müyang, I khyang hümthse asang nyasohng.

⁶Ade shilangnü I müyang khüdu lung lile, ko abi khyang tüpnung tu müle!’

⁷Ko nü müyang tsünü kuh yonglangnü hita lalingnung, ‘Ih tülongmüzi! Kuh zipehko, ko I tsurüti yola Ih yüpjole. Ih shemüsu nü khyang tusü müjücheh.’

⁸Hütsütakhang khütanung? Ihnü nührü te yore, nüh abi shangrü thsachonü abinü shemüsu nü thsütah müjüh nye, ta nühnü müshahpü ching du chingcho nengdang abinü shemüsu nü thsütah atümung jünung.

⁹“Hütsüeko Ihnü nührü te yore: Ching, ko nührü khyang jünung; yangching; ko nührünü ngunung; drongdrongching, ko nührü khyang khangthrujünung.

¹⁰Tunüo achingrü müipi khyang jünung, ko ayangchirü müipinü ngunung, ko adrongdrongchirü müipi khyang khangthrujünung.

¹¹Nührü aurüti khürünü nührü tsurünü ngu chingde mürü jürü mah-o?

¹²Mahkhang hünakyü chingde khakikoh jürü mah-o?

¹³Nührü roh-i amütsanü mii, nührü tsuzarüti khyang atsa jünung müdhekhang, ninglang liba Aunü abi te chingrü khyang Anbü Amüsa khüdoi alaa jünung!”

¹⁴Jisunü adohrü khüdu chahnü amünyi nbü iichehchüpehchi yacho; ko khode amünyi nbü tsü tsipehcho, nyitsarüba tsünü yu chonung dikeh, sühdinü nyemüyangcho,

¹⁵ta khürünü yocho, “Amünyiti yola ayingba, Beelzebulnü abi khyang arüh iipehnung zii jüre.”

¹⁶Aparünü Jisu xohsohnyo, abi Tsingrangba chahnüepü müdhenung nengdang thsayahiya khüdu nguchingpü arühnü abi te tsingdhengcho.

¹⁷Ta Jisunü arüh lümcho richeh ngu arüh te yocho, “Yanglih khüibanü palu jangjangthsa changnah khatanang hütsü changnung; ko changnahba kukhi khülure.

¹⁸Hütsü roh-i Satan yanglih la amülung khüdunü khüdu te khatakhang, hütsü khüta yachehnung? Ihnü amünyi nbü iipehba tsü Belzebul ziinü nguchisohrepü nührünü yore.

¹⁹Hütsüta Ihnü arüh iipehrükhang, nührü khanglang rorüh nüsü arüh khüta iipehnung? Nührü khanglang iirorütinü nührü amüthsalangepü yuzi jüre!

²⁰Mah, ta hiba hi Tsingrangba zii khu Ihnü amünyiti iipehre ko hi khunü Tsingrangba yanglih tsü nührü yola ropehkopü yuzi jüre.

²¹“Khode rezeh nyitsarü khüdunü abi thsunohrü thsachehpü apu kuh nyahro, abi kohro apüm khümchore.

²²Ta khode re azeh-ubanü abi dhsükehpü kohnang, abüdongrü alongdi thsunohrü apüm zang tsire ko arüh changtare.

²³“Sü I lahpi müyaro, abi Ih nyümre; khyübülung la mütrokhang, abinü shupehre.

²⁴“Khode nyüh khüdu chahnü amünyi nbü tsinang, abinü kunglikungsa la kumünyi chah yangchire. Abinü süsü müngukhang, abinü apu te yore, ‘Ihnü I kuh lang thali wünung.’

²⁵Hütsüta abinü thalirü ko kuh tsü müsakhüti athsalangnü ngure.

²⁶Hütsüde abinü wü apu tenü amütsauba anbü dhünyeh nororü, ko arüh züro hütsüla lire. Hütsükonülü, hütsüba nyitsarü tsü akhudi tenü amütsauba suro kangre.”

²⁷Jisunü hi yode, sühdi la tsünü khingkurü khüdunü abi te yocho, “Nüh longla hitpü ko nüh nümüsutpü khingkurü tsü khütoh-i amüwanung!”

²⁸Ta Jisunü lalingcho, “Sürünü Tsingrangba yu yuchiro ko bichiro arüh uthring khüta amüwanung!”

²⁹Sühdi tsü abi mükang shibülungde, abinü yonung dikehcho, “Hiba shang nyitsarü khütoh-i amünyi-o? Arühnü thsayahiya ngunyüre ta, Jona thsayahiya chah khu apa tu müngusohnung.

³⁰Tu khüta Jona tsü Nineverü te amüdhethsa kangcho, hütsü roh-i Nyitsarü Tsurüsü hiba shang nengdang adüzü khüdu kangnung.

³¹Yukhaba nyümong Sheba yangthsalatpünü yapü hiba shang nyitsarü mülangjünung, tunüo Yangthsaba Solomon lümlong nyinung alih changka lanü abükyü rocho; ko Ihnü nührü te yore, hila Solomon tenü adiu lango lile.

³²Yukhaba nyümong Nenivirünü yapü nührü mülangjünung, tunüo Jonanü thsingyucho yuchi arüh lasih thsamülacho; ko Ihnü nührü te yore hila Jona tenü adiu lango lile!

³³“Sünüsü dsi tahkehpü lohnü mühaptipüre; ta kuhla zürorütinü atsingse tsü ngunungthsa, abinü hütsü avihpüsing chah vihpüre.

³⁴Nü fü nengdang nü nahtse tsü dsi khüdu kyole. Khode nü nahtse tsa liro, nü fü apüm tsingsere: ta khode nü nahtse mütsanang, nü fü apüm marürahre.

³⁵Hütsüeko müzahng, nü chah atsingse tsü tümarürahsoh.

³⁶Nü fü apüm tsü amarürah mülipü avisanü jengkhang, dsi avisajing nü chah tehkehcho roh-i, apümlang avisanü jeng linung.”

³⁷Khode Jisu yu chokacho, Farisirü khüdunü abi tsuyongnung dsiyohcho; achotsü abinü yangtsunung züdu pümcho.

³⁸Jisunü mütsuyongede mümütsahcho ngu Farisiba tsü nyemüyangcho.

³⁹Achotsü Abüdongbanü abi te yocho, “Nührü Farisirünü nührü shingtbhürü amichah thsüthohre, ta lasih lalü shühkhatoh ko amünyinü jeng lile.

⁴⁰Adohrüti! Tsingrangba sünü amichah külüpcho, abinü ayonglangsü mükülüpcho do?

⁴¹Ta nü shingtbhürü la tu liro, hütsü ailümrü khyang jüng, ko lüpcho nü nengdang müsa kangnung.

⁴²“Nührü Farisirüti ahohah! Nührünü thungwi, nengbürang ko müyahmürah apüm lanü dhüre nohlüm jüre, ta yuje ko Tsingrangba müinunglü thrüchahchüpehre. Nührünü hirisü nguching ko apasü tüthrüchahchüpeh.

⁴³“Nührü Farisirüti ahohah! Nührünü Sinagog la pümji atsauba du khyünyüre ko yanglong la salüm jüsohnyüre.

⁴⁴Nührü ahohah! Nührü nahnü münguba kong, khüi michah nyitsarünü müngupü tsehchiro, hütsü kyole.”

⁴⁵Yuzeng dorü yola nyüh khüdunü abi te yocho, “Athsingyurü, nühnü hita yode, ihrü mii zeh müthsamünyüre!”

⁴⁶Jisunü lalingcho, “Nührü yuzeng dorüsü khüta adrünung! Nührünü nyitsarü khyang bha amüling zang mühehre, ta hütsüri bhamüling tronung nührübürü müyungza khüdu mii mümüyungchüre.

⁴⁷Nührü ahohah! Nührü jümürütinü mapsehba azikehrüti kong nührünü tsa külüpre.

⁴⁸Hütsükhang nührü jümürütinü tu nguchicho nührübürünü nyengchoung; tunüo arühnü mapsehcho ko nührünü arüh kong külüpre.

⁴⁹Hi khyanglangnü Tsingrangba lümlongnü yocho, ‘Ihnü arüh yang azikehrüti ko yusi hirü müthehnung; arühnü khürü mapsehnung ko khürü dhsümthsenung.’

⁵⁰Hütsünü limih thri du azikehrüti mapsehcho atümung,

⁵¹Abel mapsehcho tinü Zekaria, sü bholu ko amüsa müdüm nyüh kah lanü mapsehcho nengdang hiba shang nyitsarü khingchinung. Ho, Ihnü nührü te yore, arüh atümung nengdang hiba shang nyitsarü khingchinung!

⁵²“Nührü yuzeng adorüti ahohah! Nührünü lümlong kuh tohtising yohpüre; nührübürüsü müzüdurü ko azüdunyürüsü yatire!”

⁵³Jisu hütsü müdüm pehjüde, yuzeng dorü ko Farisirünü abi khütang mülangjonü lang adrong nengdang tsingdheng,

⁵⁴abinü lango chomehsohpü mülang rangnung jümcho.