Read Sangtam Naga LUK 12 Bible Online

LUK 12 - Sangtam Naga bible

LUK 12

¹Nyitsarü hajar adrong khüdunü khüdu dhrümchi tsübülungde, Jisunü akhu amonoti te yocho, “Farisirüti akhürah bhüpza shulüm müzahng.

²Tuturü haptipüro khohchehnung ko rang licho apüm müdhesohnung.

³Hütsünü, nührünü tuturü amala yocho hütsü anyümong yuchinung, ko tuturü kuh yonglang rang chotacho hütsü kuhmung chah züdenung.

⁴“Ihnü nührü te yore, müyangrüti, sürünü afü du mapsehnung kohrüma akhanglang tu nguchinung mükohro arüh tüdrü.

⁵Süte drünung Ihnü nührü te yonung: Tsingrangba sünü mapsehpü mümehmi la dhiyohchünung tase liro abi drüng. I chah yudsing, abi du nührünü drüng!

⁶“Tbütphü uza münga paisa anyüh ngang mü-irü do? Ta arüh khüdusü Tsingrangbanü münbüchüre.

⁷Nü thah chah kuva mii apüm abinü khicheh lile. Hütsüeko tüdrü; tbütphü uza adrong tenü nührü awüba!

⁸“Ihnü nührü te yore, sünü abi I yoepü misha chechoro, Nyitsarü Tsurü nüsü Tsingrangba riwürüti bete abi chechonung.

⁹Ta sünü Ih mishanü müchechonang, Nyitsarü Tsurü nüsü abi müchechonung.

¹⁰“Sünü Nyitsarü Tsurü nyüm chonang mülangpehjünung; ta sünü Anbü Amüsa nyüm müthsamünyüro hütsülü mülang müpehjünung.

¹¹“Khode arühnü nührü yukhanung nengdang Sinagogti mahkhang, governor mahkhang yangthsarüti yang noronang, nührünü khüta lalingnung mahkhang tu chonung tülümxü.

¹²Tunüo hütsü shikhe la nührünü tu chonung hütsü Anbü Amüsanü nührü te yonung.”

¹³Amülung yola nyüh khüdunü Jisu te yocho, “Athsingyurü, Imung te Unü pehjüba kuthsi tsü Ihjü changtaangpü yojüng.”

¹⁴Jisunü abi te yocho, “Sünü Ih nührü yukharü mahkhang kuthsi changta jürü kangsohcho?”

¹⁵Ko abinü arüh atümung te yocho, “Müruthsa apüm lanü kukeing müzah lieng, tunüo nyitsarü khüdu akang tsü kuthsi khütango lichonü akang mülire.”

¹⁶Hütsüpü Jisunü arüh te yukitaba hi yocho: “Shikhe khüdu alirü khüdu aluh lanü fürü khütango xacho.

¹⁷Abinü lümcho, ‘I fürü ayohpüchah müle. Ihnü tu nguchinung?

¹⁸Ihnü hita nguchinung,’ ‘Ihnü I shih tphüpü adiuba thsanung, ko hütsüla fürü ko apa kohro apüm zahkehnung.

¹⁹Hütsüpü Ihnü I nbü te yonung, Anbü! Kang adrong nengdang nü thsütah apüm lile. Pümduong, tsung, yong ko künyang lieng!’

²⁰Ta Tsingrangbanü abi te yocho, ‘Nüh amüsithsa! Shomülang tsatsa nüh sünung; hütsükhang nühnü zahkehcho kuthsi apüm tsü sü yo thsanung?’ ”

²¹Ko Jisunü yocho, “Sürünü palu shulüm kuthsi sühpüro ta Tsingrangba lahpi alirü müthsaro arüh hütsü kyo linung.”

²²Hütsüpü Jisunü monoti te yocho, “Hütsüeko Ihnü nührü te yore, Nührü akang linung shulüm tu tsunung, mahkhang nührü afü nengdang tu müpinung tülümxü.

²³Akang tsü tsuyongnung tenü awüba, ko afü tsü jengki tenü awüba lile.

²⁴Khüyahlati tsü dheng: arühnü müshuhre mahkhang müxare; arüh azahkehsing kuh mahkhang shih müle; ta Tsingrangbanü arüh kangre! Nührü uzati tenü awüba lile!

²⁵Nührü yola hütsü nengdang khürünü lümxüchonü khü ashengu lichehnung mah-o?

²⁶Nührünü hiroh-i azikyah khüdu mii mükülüpchehkhang, tuepü apa nengdang lümxünung?

²⁷Lurü yungpi tsü khüta zirü lümdheng: arühnü münguchire mahkhang arühbürü nengdang shü mükyahre. Ta nührü te yore, Yangthsaba Solomon nüsü abi hidoi linye hiri yungpi khüdu kyo mükhyodheng.

²⁸Rangmü za chünye liko atu müliba, ko taa la tahpehba hütsü khyang mii Tsingrangbanü müpisohkhang, abinü nührü khyang khüta alaa mümüpisohnung? O yudsi müliba nyitsarüti!

²⁹“Hütsüeko tu tsunung ko tu yongnung pü lede tülümxü.

³⁰(Tunüo hiba limih müyurütinü hiri atümung nengdang lede lümxüre.) Nührü Aunü nührü nengdang hiri thsütahlepü müdhele.

³¹Hütsü mülih, nührünü abi yanglih yangching ko abinü hütsüri nührü khyang jünung.

³²“Tüdrü, nungzarü, tunüo nührü Aunü nührü khyang yanglih tsü jünung dhrongchehpehko.

³³Nührü licho atümung ieng ko kuthsi tsü ailümrü khyang jüng. Nührü kuthsi ninglang yanglih la müthrehba thsibong la, khüde arüh khodesü müsümnung, aführünü müfüchehnung ko azahnü mürühnahnung hütsüla zahkehng.

³⁴Tunüo nührü kuthsi khüde linang hütsüla nührü lasih linung.

³⁵“Nührü kihrüm ko dsi tahkehpü,

³⁶kulirünü arüh abüdongba kuhlangwü thsüti lanü thalinung yingcho roh-i nührü khengyeng lieng. Khode abi ronü drongdrongchinang, arühnü abi khyang dhsüthsa khangthrujüre.

³⁷Kulirüti sürü abüdongba rode kukeing rungnüm li nguro arüh khüta akünyangnung! Ihnü nührü te yore, abinü apu jengki khyünung, arüh pümsohnung ko arüh khyang chahla jünung.

³⁸Abi yürüptülung la ronye mahkhang akhanglang ronye, sürü rungnüm li nguro arüh khüdoi akünyangnung!

³⁹Ta hi müdheing, kuh abüdongrü tsünü aführü ronung shikhe tsü müdherelanglü, abinü aführü tsü akuh rohphoh müzürosohnung.

⁴⁰Hütsünü, nührüsü rungnüm lieng, tunüo mülongdicho shikhe khüdu la Nyitsarü Tsurü tsü ronung.”

⁴¹Peternü yocho, “Abüdongba, yukitaba hi ihrü nengdang a atümung nengdango?”

⁴²Abüdongbanü lalingcho, “Khang longlangchehba ko asithsa kulirü tsü süo? Abüdongrünü kuhla nguchi-nguyang ko aparü kulirüti khyang tsuyongnung akyang jünungthsa nyümkehjüba tsü lile!

⁴³Abüdongba thali rode nguchi ya nguba kulirü tsü khüdoi akünyangnung!

⁴⁴Ihnü nührü te yutsatsa yore, Abüdongbanü hütsüba kulirü tsü abi kuthsi apüm michah müshosohnung nyümkehjünung.

⁴⁵Ta hütsüba kulirü tsünü alüm la Abüdongba tsü nyahlira müro pü lümnü aparü kulirü ko kulilarü chah xüpnü, tsuyongpü müchako lide,

⁴⁶mülongdiba nyümong ko shikhe khüdu la Abüdongba tsü thali ronung. Abüdongba tsünü abi iipehnung ko longmülangchehrü yola pehjünung.

⁴⁷“Kulirü sünü Abüdongbanü abi khyang tu nguchisohnyüro hütsü müdhepü, rungnümnü nguchi müyaro, abi tsü khütang xüpnah khingchinung.

⁴⁸Ta kulirü sünü Abüdongba lümcho mümüdhepü ta axüpnung leng lango nguchiro, abi thri du xüpnung. Sü khyang adrong jücho abi chahnü adrong khangre; sü khyang alaa jücho abi chahnü alaa khangre.

⁴⁹“Ih limih chah michang chürosohnung rocho, ko Ihnü lümcho roh-i hütsü tahkehko!

⁵⁰Ih baptiba khüdu ngunung lile, ko hütsü mükhuede Ih khütoh-i chongcharo!

⁵¹Ih limih yang yangtsa hirochoepü nührünü lümrü mah-o? Yangtsa mah ta achangnah.

⁵²Ade tinü nyüh münga liba kukhi changnahnung, asangnü anyüh nyümnung ko anyünü asang nyümnung.

⁵³Autinü atsurüti nyümnung, ko atsurütinü aurüti nyümnung; atpatinü atsulatpürü nyümnung, ko atsulatpürünü atpati nyümnung; aniirü atpatinü arüh tsunyahlarü nyümnung, ko tsunyahlarütinü aniirü atpati nyümnung.”

⁵⁴Adesü Jisunü amülung te yocho, “Khode nührünü nyüzüdulang nyükhi shüchi ngunang, nührünü tsing ronungepü yore ko hütsü roh-i rore.

⁵⁵Ko khode nührünü kihjing nyübong fo müdhenang, nührünü wümsehnungepü yore, ko hütsü roh-i tikehre.

⁵⁶Akhürahrüti! Nührünü alih ko ning chah dheng tsingnyü müchehre; akhang, tuepü nührünü ade bekhyah adüzü mümüdhero?

⁵⁷“Yujeba nguchinung tuepü nührübürü jangjang yu mükharo?

⁵⁸Khürünü yuzengnü nüh mülangjo nüh yukhaji lang nowükhang, yukhaji lang müwüdenü abi te khiyu tsü nyichehtapehng. Hütsüta müthsakhang, abinü yukharü bete nüh tphah wünung, ko Police khehla jünung, ko abinü akhangti kuhla rangyohnung.

⁵⁹Ihnü nührü te yore, nü thsite paisa khüdu dusü müsahkhangde nüh hütsüla pümnung.”