Read Sangtam Naga LUK 13 Bible Online

LUK 13 - Sangtam Naga bible

LUK 13

¹Hütsü shikhe la nyitsarü khürünü Jisu te Galilrü sürü Tsingrangba khyang amübü joyade Pilatnü mapsehcho hütsü nengdang yocho.

²Jisunü arüh te lalingcho, “Hütsüri Galilrü hütsüta sücho tsünü aparü Galilrü atümung tenü arüh alaa münyirü amütsauba thsachongangepü nührünü lümrü mah-o?

³Ihnü nührü te yore, mah; nührü lasih müthsamülakhang, nührüsü hütsü roh-i changnung.

⁴Siloam la kuh khülutsu arüh dhüre-keh mapsehbasü khüta? Arüh tsü Jerusalem la lirü atümung tenü arüh amütsau thsachongangepü nührünü lümrü mah-o?

⁵Ihnü nührü te yore, Mah, ta nührü lasih müthsamülakhang, nührüsü hütsü roh-i changnung.”

⁶Hütsüpü Jisunü arüh te yukitaba hi yocho: “Shikhe khüdu nyüh khüdu abi shükusiluh la ngurüsidong khüdu yacho. Abinü hütsü chah asih dhengnung wücho, ta müngucho.

⁷Achotsü abinü tbü nyahba te yocho, ‘Dheng, hinü kang asang hiba ngurüsidong chah asih dhengchi rore; ta Ihnü tusü müngure. Hi repehng! Tuepü hinü alihsu khyükhang yasohnung!’

⁸Ta tbü nyahba tsünü lalingcho, ‘Adirü, kang khüdu nengdang hita pehjüng; Ihnü aying mükang junahnung ko alihsu khürü yohjünung.

⁹Hütsüpü, sekang asih sihkhang atsa du; müsikhang nühnü repehng.’ ”

¹⁰Sabath nyümong khüdu Jisu Sinagog khüdu la do licho.

¹¹Hütsüla amünyi nbünü kang dhüre-keh mükumürusohcho khingkurü khüdu licho; abükyü tsü mükhupehpü thridusü mümüchongchehcho.

¹²Khode Jisunü abükyü ngucho, abinü abükyü dsinü yocho, “Khingkurü, nüh mükumüru lanü kyangpehko!”

¹³Abinü abükyü chah akhehnü thahpücho, ko hütsüdenü abükyü jangjang müchongkhüti kangcho ko Tsingrangba neng secho.

¹⁴Sabath nyümong Jisunü kyangjüchonü Sinagog la ayingba tsü zichürocho, hütsünü abinü nyitsarüti te yocho, “Ihsanü nguchinung nyümong dhüroh lile; hütsüeko hütsüri nyümong la rung ko kyangsohng, ta Sabath nyümonglü türo!”

¹⁵Abüdongbanü abi te lalingcho, “Nührü akhürahrüti! Nührünü Sabath nyümong nührü misü mahkhang gadu akuh lanü lehcheh nowü kih mütirü do?

¹⁶Ade hila Abraham chahnü sihchocho khüdu kang dhüre-keh satan-nü rahyohpücho lile; Sabath nyümonglü abükyü mülehchehjünung do?”

¹⁷Abinü hi yode abi münyehrüti ashah khyüsohcho, ta abinü anyemüyangnung nguchicho apüm nengdang nyitsarüti künyangtacho.

¹⁸Jisunü tsingdhengcho, “Tsingrangba Yanglih tsü tu kyoro? Ihnü hütsü tu te kihtanung?

¹⁹Hütsü hi kyole. Nyüh khüdunü alih la xehnyitse shucho. Hütsü singdong kangcho, ko uzatinü ajengzati chah arüh süp shücho.”

²⁰Jisunü anyüpiusü yocho, “Ihnü Tsingrangba yanglih tsü tu te kihtanung?

²¹Hütsü hi kyole. Khingkurü khüdunü hüm liter yüre hiro bhüpza aza te charütapü apüm jinü mülangde yohpüre.”

²²Jisunü yangditi ko yangdongti bongnü nyitsarü te donü Jerusalem lang züducho.

²³Khürünü abi te tsingdhengcho, “Abüdongba, nyitsarü azikyah du khümchonung mah-o?” Jisunü arüh te lalingcho,

²⁴“Akongsüm tbükhüm khu züdunung müküpm; tunüo khütangonü züdunung müküpnung ta mükohnung.

²⁵Kuh abüdongbanü shemüsu trahtri tsü khangtinung; hütsüde nührünü dongkhu yapü kukhang chah drongdrongchi, ‘Ihrü khyang khangthrujüng, Abüdongba!’ pü yonung, ta abinü lalingnung, ‘Nührü khüdenü rochonang Ihnü mümüdhe!’

²⁶Hütsüde nührünü lalingnung, ‘Nü yola Ihrünü tsuyongcho; ko nühnü ihrü yangdi la thsingyucho!’

²⁷Ta abinü thali yonung, ‘Nührü khüdenü rochonang Ihnü mümüdhe. Nührü münyirüti atümung, I tenü shehkhung!’

²⁸Nührü dongkhu iipehnung ko nührünü Tsingrangba yanglih la Abraham, Isak ko Jakob ko azikehrü atümung ngude, khütoh-i tranung ko ha mütrehkehnung!

²⁹Nyüchürolang ko nyüzüdulangnü, ko kihkulang ko kihjinglangnü nyitsarüti ronü Tsingrangba yanglih thsüti la pümnung.

³⁰Hütsüde sürü ade akaro akhunung ko sürü ade akhuro arüh aka kangnung.”

³¹Hütsüde Farisirü khürü ronü Jisu te yocho, “Nüh hilanü shehmüi khüdenang tsibae, tunüo Herodnü nüh mapsehnung yangchile.”

³²Jisunü arüh te lalingcho, “Wüng ko hütsüba shirung te young: ‘Chünye ko atu Ihnü amünyi nbü iipehnü akyangjüba nguchinung, ko asangu nyümong I nguchi thümnung.’

³³Ta chünye, atu ko zidu Ipu lang la tsibae; tunüo azikehrü khüdu Jerusalem chah khu apalang sünung mükoh.

³⁴“O Jerusalem, Jerusalem! Tsingrangbanü nührü yang müthehcho azikehrüti mapsehba, ko yusi hirüti lungnü kengsehba. Hünanü abükyü za aqo pohki nübülungcho kyo, Ihnü khüdopi nührü atümung khyahrinyücho, ta nührünü I khyang mükhyahrisoh.

³⁵Hütsüeko nührü amübükuh pehjünung. Ihnü nührü te yore, ‘Abüdongba nengla sü roro abi müwajüng pü yonung bekhyah müchide nührünü Ih müngunung.’ ”