Read Sangtam Naga LUK 14 Bible Online

LUK 14 - Sangtam Naga bible

LUK 14

¹Sabath nyümong khüdu, Jisunü Farisirü langnürü khüdu kuhla yangtsunung wücho: ko nyitsarütinü abi chah dheng licho.

²Hütsüla tüjütüunü thsangnangrü nyüh khüdu Jisu yang rocho,

³ko Jisunü yuzeng dorü ko Farisirü te tsingdhengcho, “Sabath nyümong kyangjünung yuzeng chah mükeh-o?”

⁴Ta arühnü ciisü müthsacho. Achotsü Jisunü nyitsarüba tsü noro kyangjüpü müthehcho.

⁵Hütsüpü abinü arüh te yocho, “Nührü yola nyüh khüdu atsurü khüdu mahkhang misüpung khüdu licho Sabath nyümong yongroh la thungyohkhang, nührünü hütsü nyümongnü mütphahchehnung ang?”

⁶Ta arühnü abi te hi nengdang mülalingchehcho.

⁷Shirü khürünü pümji atsau du throchehcho ngunü, Jisunü arüh atümung te yukitaba hi yocho:

⁸“Khode khürünü kukangba thsüti la nüh dsiyohnang, pümji atsauba la tsü tüpüm. Nü tenü ayingba khürüsü dsiyohpü linung kohle,

⁹ko nühjüding dsiyohba shikuh tsünü nü te ro yonung, ‘Pümji hi abi khyang khuchüng.’ Hütsüde nüh ashah khyo apohkiba pümji la nüh pümnungthsa kangnung.

¹⁰Hütsü mülih, khode nüh dsiyohnang wünü apohkiba pümji la tsü püm. Ko nü shikuh tsünü ro nü te yonung, ‘I müyang, amungthrilang küro püm.’ Hinü shirü atümung bete nüh jengreng kehsohnung.

¹¹Tunüo sünü palu jangjangthsa diro abi azikyah kangnung, ko sünü palu jangjangthsa azikyah kangro abi dinung.”

¹²Hütsüpü Jisunü abi shikuh te yocho, “Khode nühnü yangtsunung dsinang, nü shangrüti mahkhang jünirüti mahkhang tsutpurüti mahkhang kurümrü alirüti tüdsiyoh, tunüo arühnü nüh dsimülinung, ko hütsüta sahmülinung.

¹³Khode nühnü thsüti jünang, ailümrü, jahloh-hilohrü, jingjah-nahtohrü dsiyohng;

¹⁴ko nüh müwajünung, tunüo arühnü nüh müsahmülinung. Tsingrangbanü amüsarü kangliro nyümong nü khyang sahmülinung.”

¹⁵Khode yangtsu chah pümrü khüdunü hi yuchicho, abinü Jisu te yocho, “Tsingrangba yanglih thsüti la zehnungrüti khüta akünyangnung!”

¹⁶Jisunü abi te yocho, “Shikhe khüdu nyüh khüdunü thsüti amülah jücho ko hütsüla nyitsarü adrong dsiyohcho.

¹⁷Khode thsüti becho chihcho, abinü shirü te, ‘Rung, lüpcho küdang lilepü yonung akulirü müthehcho!’

¹⁸Ta arüh atümung khüdu khüdunü amütangnung yangchi dikehcho. Akhudibanü kuliba te tsü yocho, ‘Ihnü luh khüdu lihko, ko hütsü dhengnung wünung kangko; I khyang mülang pehjüng.’

¹⁹Aparü khüdunü yocho, ‘Ihnü misüpung dhrela münga lihko ko Ih hütsüri mücheh dhengnung würe; I khyang mülang pehjüng.’

²⁰Aparü khüdunü yocho, ‘Ih kukangyenge, hütsünü Ih mürochehre.’

²¹“Kuliba tsünü thali wü hiri apüm abi abüdongba te yocho. Abüdongba tsü zichüronü akuliba te yocho, ‘Zahnü yangdi tungte ko ananglang tsü wüng ko ailümrü, jahloh-hilohrü, jingjah-nahtohrü norung.’

²²Tunyah mülipü kuliba tsünü yocho, ‘Adirü nühnü yocho roh-i nguchiko ko adesü pümji alaa lile.’

²³Achotsü abüdongbanü kuliba te yocho, ‘Langtungte ko mürilang zahnü wüng ko I kuh jengnungthsa nyitsarüti rosohng.

²⁴Ihnü dsiyohrüti sünüsü I tsuyongnung mümüjangdhengnungepü Ihnü nührü te yore.’ ”

²⁵Shikhe khüdu sühdi amülah Jisu yola woyade, abinü ximüla arüh te yocho,

²⁶“Sünü Ih iiroro, abinü au ko atpa, anitpü ko atsurü, ajünirü ko ajünilarü ko abürü tenü Ih alaa mümüikhang, I mono mükangcheh.

²⁷Sünü abürü khala dhipü I khanglang mü-iiroro, I mono mükangcheh.

²⁸“Nührü yola khürünü lungkuh thsanyükhang, abinü akhudi pümpü khüdoi pehnung ko hütsü thsachehnungthsa thsi kükyo mülinangpü hümdhengre.

²⁹Hütsüta müthsakhang, abinü kuh tsü dhrong yohpüpü müthümchehnung; ko hütsü ngurü atümungnü abi münyüjünung.

³⁰‘Nyitsarü hinü thsanung dikehpü müthsacheh pü arühnü yonung.’

³¹“Yangthsarü khüdunü rothsarü hajar dhüre nüpü rothsarü hajar mükyü nüpü roba aparü yangthsarü khüdu nyüm khatanung shemüsukhang, hütsü kohnung mükohnung abinü akhu pümpü thridhrongre.

³²Hütsü müthsakhang, lang ashu linü aparü yangthsaba te mongtsa tsingdhengnung abinü langthsarü müthehre.

³³Hütsü roh-i, sünü abi licho lüpcho müpehjünang abi I mono mükangcheh.

³⁴“Mih tsü tsale, ta abi amüsüp changpehkhang, hütsü müsüplisohnung alang müle.

³⁵Hütsü alih mahkhang kuh wohpeh la mii pehnung müdekheng; hütsü thohpehre. Sü nangkhi kehro abinü nyieng!”