Read Sangtam Naga LUK 15 Bible Online

LUK 15 - Sangtam Naga bible

LUK 15

¹Nyümong khüdu alihmüthsü dhrirü ko münyirü adrong Jisu yu nyinung rocho.

²Ko Farisirü ko yuzeng dorünü nyingkongmüsucho, “Hivinü münyirü khyüchore ko arüh yola tsuyongre!”

³Hütsünü arüh te Jisunü yukita hi yocho:

⁴“Adüzünü nührü yola nyüh khüdu San thsih khüdu lichola khüdu chahkhang, abinü tu nguchiro? Abinü apa kurepü düku tsü rangmüla pehjüpü achahba khüdu tsü müngude yangchire.

⁵Abinü hütsü ngude, akünyangchonü hütsü apünurü chah pümsohpü kuh lang thali dhilungre.

⁶Hütsüpü abinü ashangrüti ko kurümrüti müjang dsibülung arüh te yorü, ‘I san achahpehba ngulichonü Ih dee künyangre. I te künyangtaang!’

⁷Ihnü nührü te yore, hütsü kyo lasih thsamülanung müdhsütahba amüsarü kurepü düku tenülü, münyirü khüdu lasih thsamülade ninglang akünyang tsü alaa thsanung.

⁸“Mahkhang adüzünü khingkurü khüdu taripi thsi dhüre licho la khüdu chahkhang, abükyünü tu nguchiro? Abükyünü dsi tahkehpü kuh wohnü hütsü müngude longi dhengre.

⁹Abükyünü hütsü ngude, ashangrüti ko kurümrüti müjang dsibülung arüh te yorü, ‘I thsi achahpehcho ngulichonü Ih te künyangre. I te künyangtaang!’

¹⁰Ihnü nührü te yore, hütsü kyo münyirü khüdu lasih thsamülade Tsingrangba riwürüti künyangre.”

¹¹Jisunü mütozah yocho, “Shikhe khüdu atsurü anyüh licho nyüh khüdu licho.

¹²Azaba tsünü abi te yocho, ‘Uwa, I nohlüm kuthsi ade I khyang khülo.’ Achotsü abinü akuthsi atsunyü khyang changnah jücho.

¹³Tunyah mülipü atsudhre achangba tsünü abi nohlüm kuthsi tsü ii bipü kuh pehjüpü tsicho. Abinü limih ashu khüdu lang wücho, hütsüla abinü mabomashi lii thsi tsü müzangkhangcho.

¹⁴Ko khode abi licho apüm pehkhangcho, hütsüba lih la yangkong amülah tikehcho, ko abi thsangthsimüsucho.

¹⁵Achotsü abinü hütsüba lih la shutsakhung nyüh khüdu te tsikeh licho, sünü abi tbü la shüka nyahnung müthehcho.

¹⁶Abinü shüka khyang tüpcho nohtrüpsih küp mii tsunyücho, ta abi khyang sünüsü tu mütüpcho.

¹⁷Achangka la abinü lümcheh rocho, ‘I U kuhla shehsherüti mütsumüyongkhang lile, ta Ih hila ayangchonü asürüe.

¹⁸Ihnü shemüsu I U yanglang wünung ko abi te yonung, Uwa, Ihnü Tsingrangba ko nüh nyüm amünyi shitpahko.

¹⁹Ih adelü nü tsurü dsinung müdekhengpehko; nü kuhla shehsherü khüdu roh-i Ih khiching.’

²⁰Achotsü abinü shemüsu au yang thalicho. “Abi ashula tsehdenü aunü abi ngucho; ko abinü müi lümcho ko shangwü abi thsixüp rangpü abi chah müthsüpcho.

²¹Hütsüde atsudhre tsünü yocho, ‘Uwa, Ihnü Tsingrangba ko nüh nyüm amünyi shitpahko. Ih adelü nü tsurü dsinung müdekhengpehko.’

²²Ta aunü akulirüti dsi yocho, ‘Zahding! Fükhüm atsauba tsü hiro khümsohng. Amüyungza la imüshi yohjüng ko ajing la jingkhüm khümjüng.

²³Hütsüpü wü misüza anyünyehba tsü hiro mapsehng, ko Ihsanü thsüti khyonung.

²⁴Tunüo I tsudhre hi sopehcho, ta ade abi akang lile; abi chahpehcho, ta ade abi nguko.’ Hütsüta thsüti khyo dikehcho.

²⁵“Hütsütade atsudhre aziba tsü luh lang wüpü licho. Abi kuh amünyethsa lungde khi thsacho ko nyichicho abinü yuchicho.

²⁶Achotsü abinü akulirü khüdu dsinü hütsü ‘Tukülüpro?’ pü tsingdhengcho.

²⁷Kulibong tsünü abi te yocho, ‘Nü nithre thali roko, ko nüunü misüza anyünyehba tsü mapsehko, tunüo abinü abi thali nguko.’

²⁸Amung aziba tsü khütang alongmüsah kuhla müzüducho; achotsü aunü chüro abi te kuhla zürung pü kihchicho.

²⁹Ta abinü au te lalingnü yocho, ‘Dheng, kang hidoi Ihnü nüh dikeh rore, ko khodesü yuzeng münyipü müle, ta I shangrüti te künyangtanung nengdang I khyang nühnü khodesü miza khüdu mii müjodheng.

³⁰Ta nü tsurü hinü nü kuthsi apüm mabomashi la pehkhangjüpü kuh lang thali rodelü, abi nengdang nühnü misüza anyünyehba tsü mapsehjüre!’

³¹Ta aunü abi te yocho, Ale, nüh hila I te lede lile, ko I licho apüm nü yoe.

³²Ta Ihsanü thsüti khyo künyangtanung tsü athsalang, tunüo nüni sopehpü licho, ta ade akang lile; abi chahpehcho, ta ade abi nguko.”