Read Sangtam Naga LUK 16 Bible Online

LUK 16 - Sangtam Naga bible

LUK 16

¹Jisunü amonoti te yocho, “Alirü nyüh khüdu abi khehthsithsarü khüdu licho. Khehthsithsaba tsünü alibong kuthsi müzangkhangjürepü abinü yuchicho.

²Achotsü abi dsiro yocho, ‘Nü nengdang yuchiba hi tuo? Adelü nüh I khehthsithsarü müthsanung, I kuthsi müshocho thsihüm ajeng Ih yang hirung.’

³Khehthsithsaba tsünü abi lüm la yocho, I büdongbanü I nguchi lanü zahsohnungele! Ih alih junung tase müzeh, ko chingkichingnangnungsü shahle.

⁴Ihnü tu nguchinung ade lümchehko! Ih nguchi lanü zahde arüh kuhla nüyohnungthsa I shangrüti linung.

⁵Hütsünü abi büdongba te thsite teerü atümung te abinü yocho. Abinü akhuba te tsingdhengcho, ‘I büdongba khyang nühnü khüdoi tee liro?’

⁶Abinü yocho, ‘Tuji shinga thsih khüdu.’ Abinü abi te yocho, ‘Nü thsihüm hi khyüng ko zah pümpü dhünyang thrahng.’

⁷Hütsüpü abinü aparü khüdu te tsingdhengcho, Khang nüh khüdoi tee liro? Abinü yocho, Fürü khu thsih khüdu tee kehle. Abinü abi te yocho, Nü thsihüm khyüng ko qure thrahng.

⁸“Abüdongbanü yuje müchobong tsü abi sihthsacho ngang nengse jücho; tunüo hiba limih nyitsarünü palu nengdang nguchinung tsü atsingse tsurü tenü asithsaba.”

⁹Ko Jisunü mütozah yocho, “Hütsünü Ihnü nührü te yore: Nührübürü nengdang limih kuthsinü shangrü thsachehng, khode hütsü changpehnang müchangkaba kuhla tsü nührü nüyohnung.

¹⁰Sü azikyah la longlangnang amülah la mii longlangnung; ko sü azikyah la yuje müchonang amülah lasü yuje müchonung.

¹¹Limih kuthsi müshonung la nührü chah longmülangchehkhang, yujeba kuthsi la khüta longlangnung?

¹²Ko aparü kohro la nührü longmülangchehkhang, nührübürü yo sünü nührü khyang jünung?

¹³“Kulirü sünüsü abüdongrü nyüh anyüh müdikehcheh; tunüo abinü khüdu thrünyinung ko akhüuba tsü müinung; mahkhang abinü khüdu te yocho nyinung ko akhüuba tsü müchümükehnung. Nührünü Tsingrangba ko kuthsi anyüding müdikehcheh.”

¹⁴Khode Farisirünü hi apüm yuchicho, arühnü Jisu münyodhengcho, tunüo arühnü thsi müicho.

¹⁵Jisunü arüh te yocho, Nyitsarü bete abürü jangjang amüsa kang ngusohba tsü nührüe, ta Tsingrangbanü nührü lasih müdhele. Tunüo nyitsarü yola amii amülah liba kohro tsü Tsingrangba jingte amii müle.

¹⁶“Mosa yuzeng ko azikehrünü thrahchoti tsü baptijüba Johan tizah bichi rocho; hütsütinü Tsingrangba yanglih yuse atsa tsü thsingyure ko atümungnü tsohkhuta züdure.

¹⁷Ta yuzeng athrehkohcho khüdu pehnung tenü ning ko alih changnung amülaba.

¹⁸“Sünü anitpü zapü khingkurü apa khyonang abinü nahtrahnaxengre; ko sünü azacho khingkurü tsü khyünang abinü nahtrahnaxengre.

¹⁹“Shikhe khüdu alirü nyüh khüdu thsidi jengki khyüpü nyümong müthe khütang müzang akang licho.

²⁰Hütsüla mürürü nyüh khüdu anengnü Lazarus mathsanü tsütipü, alibong trahtri la noro yüpsohpücho.

²¹Abinü alibong tsingthsang chahnü alongchocho tsunung longdicho. Füzanü mii ronü abi mathsa la müyahcho.

²²“Mürübong tsü sücho ko ninglang riwürütinü wüp hiwü ninglang thsüti la Abraham müshüm pümsohcho. Alibong tsüsü sücho ko dhrürangcho,

²³ko asü lih la abi dee khingchi licho, ko abinü kehchü dhengde ashu la Lazarus tsü Abraham te püm ngucho.

²⁴Achotsü abinü dsi yocho, ‘Uwa Abraham! Ih müing, ko Lazarus müyungza kih la thsangpü I müle la thükeh tbachisohnung müthehng, tunüo hiba michang la Ih dee khingchile!’

²⁵“Ta Abrahamnü yocho, ‘Itso, nüh akang lide nühnü atsauba apüm nguko, ta Lazaruslü amütsa apüm ngucho. Ade hila abi tbachi lire ko nüh akhingchi la lire.

²⁶Hütsü du mahko, hilanü nührü yang mürochehnung, mahkhang nührü lichahnü ihrü yang mürochehnungthsa Ihsa kahla adukah arangcheh khüdu lile.’

²⁷Alibong tsünü yocho, ‘Khang Ihnü nü te kihchire, Uwa Abraham, Lazarus tsü I urü kuh lang müthehchüng,

²⁸tunüo ihrü jünirü münga lile. Arüh dusü hiba akhingchi lih la müronungthsa abi wünü arüh te amüzahnung yu yosohng.’

²⁹“Abrahamnü yocho, ‘Arüh müzahsohnung Mosa ko azikehrüti lile, arühnü arüh yu nyisohng.’

³⁰Alibongnü lalingcho, Hütsü akükyüh mah, Uwa Abraham! Ta asücho lanü khürü kangliro arüh yang wükhang, arüh lasih thsamülanung.

³¹Ta Abrahamnü yocho, ‘Arühnü Mosa ko azikehrü yu münyikhang, asücho lanü khürü kangli ronyesü arühnü müyudsinung.’ ”