Read Sangtam Naga LUK 17 Bible Online

LUK 17 - Sangtam Naga bible

LUK 17

¹Jisunü amonoti te yocho, “Nyitsarü amünyi shitpahsohnung nguchi tsü roriri; ta sü khu hütsüri rosohro, abi nengdang khütoh-i adrünung!

²Hiri azarüti yola khüdu dusü müthikehsohnung tenülü hong la lung arangcheh xohchingpü kihdi la dhiyohchücho abi nengdang atsau.

³Hütsüeko nührünü tu nguchiro müzahmükieng! “Nü jünirünü amünyi shitpahkhang, abi yübüching, ko abinü lasih thsamülakhang, abi khyang mülang pehjüng.

⁴Abinü nyümong khüdu la dhünyehpi nüh nyüm amünyi shitpahkhang, ko hütsü müipi abinü nü yanglang ro, Ih lasih thsamülarepü yokhang, nühnü abi mülang pehjübae.”

⁵Riwürüti tsünü Abüdongba te yocho, “Ihrü yudsi disohng.”

⁶Abüdongbanü lalingcho, “Nührü yudsi xehnyitse toh-i dusü likhang, nührünü hiba singdong te, ‘Nü jangjang aranü rohchehpü kihdi la tsü nü jangjang khyüm!’ pü yonung ko hütsünü nührü yu nyinung.

⁷“Adüzünü nührü luh yuthsahrü mahkhang san nyahrü kulirü khüdu lile. Khode abi jangsi lungnang, nühnü abi te, zah ro yangtsung pü yorü mah-o?

⁸Hütsüta müthsare! Ta nühnü abi te ‘Ih yangtsunung rungnümjüng, ko nü jengki khyüpü Ih müyangtsukade chixieng; hütsüpü nüh yangtsung pü yore.’

⁹Yocho nyicho ngang kulirünü nengse ngunung müdekheng.

¹⁰Hütsü roh-i, nührünüsü, nührü te yocho apüm nguchipü khanglang hita young, ‘Ihrü amüdekheng kulirüti; ihrü ajehcho nguchi du nguchiko.’ ”

¹¹Jisunü Jerusalem lang züdude, abinü Samaria ko Galil kahla luhrü bong tsicho.

¹²Ko abi yang khüdu la züdude, mübhira kehrü nyüh dhüre ro abi shirücho. Arühnü ashula yapü

¹³züdenü yocho, “Jisu! athsingyurü! Ihrü te müing!”

¹⁴Jisunü arüh ngude yocho, “Wüng ko nührü jangjang bebürü khyang dhengsohng.” Arüh woyade arüh müsachehkhangcho.

¹⁵Arüh yola nyüh khüdunü abi kyangcho ngu yuva amülahnü Tsingrangba nengse thalicho.

¹⁶Abinü Jisu jing chah mükhukeh anengse jücho. Abi tsü Samariarü thsacho.

¹⁷Hütsüde Jisunü yocho, “Nyüh dhüre müsachehjücho mahrü do? Aparü dükuhlü khülo?

¹⁸Khütacho yangpirü khüdu hivi dunü thali ro Tsingrangba khyang anengse jünung kangcho?”

¹⁹Ko Jisunü abi te yocho, “Shemüsung ko wüng; nü yudsinü nüh kyangjüko.”

²⁰Farisirü khürünü Jisu te Tsingrangba Yanglih tsü khode ronungpü tsingdhengcho. Abinü lalingcho, “Tsingrangba Yanglih tsü ngunü mürore.

²¹Sünüsü, ‘Dheng, hila lile! mahkhang, Hütsüla lile!’ pü müyonung; tunüo Tsingrangba yanglih tsü nührü yola lile.”

²²Hütsüpü abinü amonoti te yocho, “Nührünü Nyitsarü Tsurü nyümongti yola khüdu ngunyünung bekhyah ronung, ta nührünü hütsü müngunung.

²³Ko arühnü nührü te, ‘Hila dheng!’ mahkhang, ‘Hütsüla dheng!’ pü yonung. Ta hütsü dhengnung tüwü.

²⁴Ningmülanü ning khüulang mülachonü khüulang chihcho kyo, Nyitsarü Tsurü abi nyümong la hütsü roh-i linung.

²⁵Ta akhudi abi dee chongchabae ko hiba shang nyitsarünü abi mükhyüchonung.

²⁶Noa chiichah roh-i Nyitsarü Tsurü nyümong lasü hütsüta linung.

²⁷Noa Singkong la züdu nyümong yingcheh, ko kihmülüm ro arüh atümung changkhang, arüh atümungnü tsunü ko yongnü ko khingkurü adhrerü xengyangpita licho.

²⁸Lot chiichahsü hütsü roh-i du, arühnü tsu ko yongnü, linü ko iinü, chisi ko kuthsanü licho.

²⁹Ta Lotnü Sodom pehjo nyümong ninglangnü michang ko shurü michang jüro arüh atümung changjücho.

³⁰Nyitsarü Tsurü mishaba nyümong tsüsü hütsü roh-i linung.

³¹“Hütsü nyümong sü kuhmung chah liro abinü arüh kuhla licho kohro khyünung tüjowü; sü luh la yaro abinü kuh lang thali tüwülung.

³²Lot nitpü lümchehng!

³³Sünü palu akang khümchonyüro hütsü changnung, ta sünü palu akang changnang hütsü khümchonung.

³⁴Ihnü nührü te yore, hütsü romang chongnong khüdu chah nyüh anyüh yüpjonung: khüdu notsinung ko khüdu pehjünung.

³⁵Khingkurü anyüh thsang khüdu la fürü thsü yanung: khüdu notsinung ko khüdu pehjünung.”

³⁶Nyüh anyüh luh la yuthsah yanung, khüdu notsinung ko khüdu pehjünung.

³⁷Monotinü abi te tsingdhengcho, “Khüdeo, Abüdongba?” Jisunü lalingcho, “Khüdederü me linang hütsüla hogonti tsübülungre.”