Read Sangtam Naga LUK 18 Bible Online

LUK 18 - Sangtam Naga bible

LUK 18

¹Hütsüpü Jisunü amonoti te lede suhmüzahpü dangkhidangnangnung nengdang yukita khüdu yocho.

²“Yangdi khüdu la Tsingrangba müdrürü ko nyitsarü mükhimüngurü yukharü khüdu licho.

³Ko hütsüba yangdi la tsü chomilarü khüdu licho, ko abükyünü abi yang rodu ro yocho, ‘I rorüh nyüm yu khajüng!’

⁴Abinü anyahli thsonglicho, ta achangka la abinü alüm la yocho, ‘Ihnü Tsingrangba müdrü nye ko nyitsarü mükhimüngu nye,

⁵Chomitpü hinü Ih longmüzirareko, Ihnü abükyü langjo khajünung; mahkhang abükyünü ro du ronung ko achangka la Ih müthohpehnung!’ ”

⁶Ko Abüdongbanü yocho, “Yuje mücho yukhaba tsünü tu yochonang nyidheng.

⁷Tsingrangbanü apu nyitsarü sürünü abi te ama tsingse arüku nengdang züdero arüh khüm yu mükhanung ang? Arüh tronung abinü münunung ang?

⁸Ihnü nührü te yore, Abinü arüh khüm zah khajünung. Ta Nyitsarü Tsurü tsünü abi rode limih la yudsirü ngunung mah-o?”

⁹Nyitsarü sürünü arühbürü amüsaepü lüm aparü müchühmükehcho arüh te Jisunü yukita hi yocho.

¹⁰“Shikhe khüdu nyüh anyüh dangkhidangnangnung amübükuh la züducho; khüdu Farisirü ko akhüu tsü alihmüthsü dhrirü thsacho.

¹¹“Farisiba tsünü pathsa yapü dangkhidangnangcho, ‘Tsingrangba, Ih aparü roh-i müxümüngu, yuje mücho, nahtrahnaxeng mahkhang alihmüthsü dhribong hivi mükyocho nengdang Ihnü nüh sere.

¹²Ihnü nyükhih la nyümong anyüh kongre, ko Ihnü nguchoba lüpcho lanü nü khyang dhüre nohlüm jüre.’

¹³“Ta alihmüthsü dhribong tsü ashu la yapü aromih mii ninglang mütsungmüsupü adreng la hamchi yocho, ‘Tsingrangba, Ih amünyiba nyitsarü te müing!’

¹⁴Jisunü yocho, Ihnü nührü te yore, Farisiba tsü mah ta alihmüthsü dhribong tsü Tsingrangba jingte alanglang ngupü akuh lang wücho. Tunüo sünü abürü jangjang diro abi azikyah kangnung, ta sünü abürü jangjang azikyah kangro abi disohnung.”

¹⁵Nyitsarü khürünü Jisu yang akhungarü abi khehnü arüh chah thahpüsohnung norocho, ta hütsü ngude monotinü arüh yübücho.

¹⁶Ta Jisunü azarüti tsü abi yang dsinü yocho, “Azarüti tsü I yanglang rosohng, arüh tüiti, tunüo ninglang yanglih tsü hitari yo thsanung.

¹⁷Hi lümchehng! Sünü Tsingrangba yanglih tsü azarü khüdu roh-i mükhyüchonang hütsüla khodesü müzüdunung.”

¹⁸Jihudarü langnürü khüdunü Jisu te tsingdhengcho, “Athsingyurü Atsa, müchangkaba akang ngunung Ihnü tu nguchinung?”

¹⁹Jisunü abi te yocho, “Tuepü I te atsa dsiro? Tsingrangba chah khu süsü atsa müle.

²⁰Nühnü yuzengti müdhele: ‘Nahtrahnaxeng tüthsa; tümapseh; tüfü; arahkheh la süsü tümülangjü; nü tpa ko nüu jengreng drüng.’ ”

²¹Nyitsarüba tsünü lalingcho, “Hiri yuzeng I zadenü bichiko.”

²²Khode Jisunü hütsü yuchicho, abinü abi te yocho, “Nüh adesü lango nguchinung lile. Nü licho apüm ieng ko thsi tsü ailümrü khyang jüng, ko ninglang nü kuthsi linung; hütsüpü rung ko Ih iirung.”

²³Khode abinü hi yuchicho, abi longyüpehcho, tunüo abi dee alirü thsacho.

²⁴Jisunü abi longyücho ngu yocho, “Alirü nengdang Tsingrangba yanglih la züdunung khüta athsah!

²⁵Tbang khi la ut bücheh tsinung thsahcho tenü alirünü Tsingrangba yanglih la züdunung deenü athsah-u thsanung.”

²⁶Hütsü yuchirütinü yocho, “Khang, sü du khümchonung?”

²⁷Jisunü lalingcho, “Nyitsarü nengdang tu amükohnung hütsü Tsingrangba nengdang akohnung.”

²⁸Hütsüde Peternü yocho, “Dheng! Ihrünü ihrü kuh pehjüpü nüh iirochoe.”

²⁹Jisunü arüh te yocho, “Yutsatsa Ihnü nührü te yonung, sünü Tsingrangba yanglih khyanglangnü kuh mahkhang anitpü mahkhang jünirü mahkhang tpurü mahkhang tsuzarüti pehjonang,

³⁰arühnü hiba shang la dee alaa ngunung ko aronung shang la müchangkaba akang ngunung.”

³¹Jisunü mono dhüre-anyüh tsü nükhu arüh te yocho, “Nyieng! Ihsa Jerusalem lang würe, hütsüla Nyitsarü Tsurü nengdang azikehrünü thrahcho apüm tikehnung.

³²Abi yangpirü khehla khakhuchüjünung; arühnü abi münyüjünung, müthsamünyünung ko abi chah müchokehjünung.

³³Arühnü abi xüpnung ko mapsehnung, ta nyümong asang lipü abi kangli ronung.”

³⁴Ta monotinü hiri tusü münyichehcho; Yu adüzü tsü arüh tenü rangpo licho, ko Jisunü tu chorünang arühnü mümüdhecho.

³⁵Jisu Jeriko amünyethsa rode, nahtohrü khüdu langthsilang pümpü chingkichingnang pümcho.

³⁶Sühdi tsü lahkhu tsicho yuchinü abinü tsingdhengcho, “Hi tuo?”

³⁷Arühnü abi te yocho, “Nazaret-rü Jisu lahkhu tsiyale.”

³⁸Abinü züdecho, “David tsurü Jisu! I te chomang!”

³⁹Bekhulangrünü abi te tübolo pü yübücho. Ta abinü alaa du züdecho, “David tsurü! I te chomang!”

⁴⁰Hütsüde Jisunü nyehli anatohba tsü abi yang norung pü yuzeng jücho. Khode abi amünyethsa rocho, Jisunü abi te tsingdhengcho,

⁴¹“Ihnü nü nengdang tu nguchisohnyüro?” Abinü lalingcho, “Abüdongba, Ihnü ngunyüre.”

⁴²Jisunü abi te yocho, “Ngung, nü yudsinü nüh kyangjüko.”

⁴³Hütsüdenü abinü ngunung kohcho, ko Tsingrangba nengse Jisu khanglang iiwücho. Khode sühdi tsünü hütsü ngucho, arüh atümungnü Tsingrangba neng secho.