Read Sangtam Naga LUK 19 Bible Online

LUK 19 - Sangtam Naga bible

LUK 19

¹Jisu Jeriko lang züdu khu tsichi yacho.

²Hütsüla alihmüthsü dhrirü aying alirü khüdu anengnü Zakeus licho.

³Abinü Jisu tsü sünangpü dhengnyücho, ta abi akhikyah thsacho ko nyitsarü sühdirachonü abinü müngucho.

⁴Achotsü abinü sühdi bekhu shang wünü papasi dong khüdu chah abi dhengnung küducho, tunüo abi hütsüba lang tsünü tsinung licho.

⁵Jisu hütsüba müdüm chii rode, abinü kehchü dheng Zakeus te yocho, “Zah jürung, Zakeus, tunüo chünye Ih nü kuhla müdongnung.”

⁶Achotsü Zakeusnü dhsüthsa jüro abi künyangseh khyüchocho.

⁷Hütsü ngurü nyitsarü atümungnü nyingkongnü yocho, “Hiba nyitsarü münyirü khüdu shikuh kang müdongnung wüko!”

⁸Zakeusnü shemüsu yapü Abüdongba te yocho, “Abüdongba nyieng! I kuthsi achangsho Ihnü ailümrü khyang jünung, ko Ihnü khürü kihyocho likhang, müyüshinü alaa thali jünung.”

⁹Jisunü abi te yocho, “Chünye hiba kuhla akangcheh ro lile, tunüo abi mii Abraham chahnü sihchocho.

¹⁰Tunüo Nyitsarü Tsurü achahcho yangchinung ko khümchonung rocho.”

¹¹Nyitsarütinü hi nyi yade, Jisunü mütozah yukita khüdu yocho. Ade abi Jerusalem amünyethsa rocho, ko arühnü Tsingrangba yanglih tsü ronung thsakopü lümcho.

¹²Achotsü abinü yocho, “Shikhe khüdu adirü khüdu yanglih khüdu khyüchopü thali ronung limih ashu lang wücho.

¹³Abi mütsiede, abinü akulirü dhüre dsinü arüh müipi khyang thsi khüdu-khüdu jonü yocho, ‘Ih mürode hinü shithsabhüleh yang.’

¹⁴Ta apu nyitsarütinü abi thrünyicho, hütsünü abi khanglang yusi hirü müthehnü yocho, ‘Ihrünü hiba nyitsarü hi ihrü yangthsarü mükangsohnyüre.’

¹⁵“Nyitsarüba tsü yangthsarü kangpü thali rocho. Abinü akulirütinü khüdodo jingchochonang müdhenung abi bete shibülungnung yuzeng jücho.

¹⁶Akhoba tsünü ro yocho, ‘Adirü, nühnü jüba tsünü Ihnü thsi dhüre jingchoko.’

¹⁷Abinü yocho, Mahso, nüh kulirü atsa. Nüh azikyah la longlangchehchonü, nüh Yangdi dhüre michah tase linung.

¹⁸Anyüubanü ro yocho, ‘Adirü, nühnü jüba tsünü Ihnü thsi münga jingchoko.’

¹⁹Hivi te abinü yocho, ‘Nüh yangdi münga michah tase linung.’

²⁰“Aparü kulirü khüdunü ro yocho, ‘Adirü, nü thsi hila lile, Ihnü shü la khapü yohpüchoe.

²¹Nüh amütsa nyitsarü thsachonü Ihnü nüh drücho. Nühnü bürü yo khyüre ko nühnü müchicho la xare.’

²²Abinü abi te yocho, ‘Nüh kulirü amütsa! Ihnü nüpu yunü nüh mülangjünung. Ih zii amütsa nyitsarü, bürü yo khyürü ko Ihnü müchicho lanü xarepü nühnü müdhele.

²³Khang, tuepü I thsi thsikuh la müzahkehcho? Arelang, Ih thali rode ajehyoh zeh nguba thsacho.’

²⁴“Hütsüpü abinü hütsüla yarü te yocho, ‘Abi kheh lanü thsi tsü khyüng ko thsi dhüre liba kuliba khyang jüng.’

²⁵Ta arühnü abi te yocho, ‘Adirü, abi thsi dhüre limado!’

²⁶Abinü lalingcho, ‘Ihnü nührü te yore,’ ‘Sü lango liro abi khyang alaa mii jünung; ta sü müliro, abi azikyah liba tsü mii hitsinung.

²⁷Ko I rorüti sürünü arüh michah Ih yangthsarü mükangsohnyücho, arüh tsü hila norung ko I betenü arüh kyüsehng!’ ”

²⁸Jisunü hi yopü arüh müngu Jerusalem lang wüchi yacho.

²⁹Khode abi Olive zong la Bethfage ko Bethany amünyethsa rocho, abinü mono anyüh tsehleh yu hiri yopü müthehcho.

³⁰“Nührü bekhu liba yang la tsü züdung; nührü züdude, khodesü müpümdhengcho Gaduza khüdu xohchingpo ngunung. Hütsü lehcheh hila norung.

³¹Ko khürünü tuepü lehchehropü yokhang, Abüdongba shulüm hi thsütahlepü young.”

³²Achotsü arühnü wücho ko Jisunü arüh te yocho roh-i ngucho.

³³Arühnü Gaduza tsü lehchehchi yade, abüdongrünü arüh te yocho, “Tuepü hütsü lehchehro?”

³⁴Arühnü lalingcho, “Abüdongbanü hi thsütahle,”

³⁵ko arühnü gaduza tsü Jisu yang norocho. Hütsüpü gadu michah tsü arühnü shü phakehjücho, ko hütsü chah tsü Jisu pümsocho.

³⁶Ko abi wüde, nyitsarütinü arüh shü lang la khyangjücho.

³⁷Abi Jerusalem amünyeh Olive Zong langnü jüroba lang müdüm tsü chii rode, abi mono sühdi tsünü arühnü ngucho anyemüyangnungti nengdang züde Tsingrangba neng senung dikehcho:

³⁸“Abüdongba nengla roba Yangthsaba tsü müwajüng! Ninglang atbachi ko Tsingrangba te ahechi thsaang!”

³⁹Hütsüde amülung la Farisirü khürünü Jisu te yocho, “Athsingyurü, nü monoti tsü mürongrongnung yuzeng jüng!”

⁴⁰Jisunü lalingcho, “Ihnü nührü te yonung, arühnü yah-a du likhang, lungnü züdemüsunung.”

⁴¹Khode abi yangdi amünyethsa rocho, abinü hütsü ngu tranü yocho,

⁴²“Nührünü chünye dusü yangtsa chürosohnung müdherelang! Ta nührünü hütsü ngunung mükoh!

⁴³Nührü rorünü thsu-tbünü nührü kyahtinung, ko apüm langnü nührü thsuti khangtinung bekhyah ronung.

⁴⁴Arühnü nührü riri changsohnung ko hütsüla lirü atümung mapsehnung; arühnü lung khüdu dusü ajoji la müjosohnung, tunüo Tsingrangbanü nührü khümchonung rocho bekhyah tsü nührünü mümüdhecho!”

⁴⁵Hütsüpü Jisunü amübükuh la züdu shithsabhülehrüti iipehnung dikehnü

⁴⁶arüh te yocho, “Amüsa yula hi thrah lile, ‘I kuh te dangkhidangnang kuh pü dsinung.’ Ta nührünü aführü ku münyiji kangsohre!”

⁴⁷Ko Jisunü nyümong mükhu amübükuh la docho. Bebü ayingti, yuzeng dorüti ko amülung yola langnürütinü abi mapsehnung yangchicho,

⁴⁸ta arühnü nguchinungthsa tu lang müngucho, tunüo atümungnü abi yu nyinung müsijo licho.